Ua lipotia mai i Amerika le maliu o Madeleine Albright, le tama'itai muamua na tofia e avea ma failautusi aoao o le malo Amerika.
O ia na fanau i le atunu'u o Czechoslovakia (Czech Republic) i le taimi o le taua lona lua o le lalolagi, ma na sulufa'i ai ma ona matua i Amerika.
Na tofia o ia e Bill Clinton ie avea ma failautusi aoao o lana faigamalo i le 1997 e tau i le 2001.
E maliu nei Madeleine Albright ua 82 tausaga lona soifua.
********
Ua faaalia e le Kamupani a Moderna le fuafuaga e gaosia ai ana vaila'au puipui (vaccines) i Melbourne.
E faitau $billion le tau o le galuega i su'esu'ega ma le gaosiga o vaccines mo le KOVITI-19 ma le influenza, vaila'au puipui o loo faaigoaina o mRNA vaccines.
O le galuega o loo faamoemoe e faatupeina e le Kamupani a Moderna, le malo setete o Vitoria ma le malo tele.
********
I fuainumera mulimuli nei o le KOVITI-19 i Ausetalia;
E to'a 10,259 tagata na pesia mo le taimi muamua i Vitoria ma le to'a 11 na maliliu ai i le 24 itula ua mavae.
To's 24,803 tagata na pesia mo le taimi muamua i New South Wales, ma le to'a 8 na maliliu ai.
********
Ua faailoa mai e le palemia Scott Morrison lona tete'e i se vala'aulia mo le peresitene o Rusia, Vladimir Putin, e auai ai i le fonotaga a ta'ita'i o malo o le G-20 lea o loo faamoemoe e usuia i Bali, Indonesia i le masina o Novema o le tausaga nei.
Na ta'ua e le palemia, ua faataunu'u i le peresitene o Indonesia, Joko Widodo, lona manatu e le talafeagai ona fono faatasi ma le ta'ita'i o Rusia ona o le osofa'iga o Ukraine.
**********
