Na faaalia e Ash Barty i le aso analeila, ua litaea mai le ta'aloga tenisi faapolofesa.
E aumaia lenei faaaliga ae o loo umia pea e Ash Barty le tulaga muamua le #1 i le tenisi a tamaita'i i le lalolagi ma e aofia ai nisi o manumalo mata'ina e pei o le Australian Open i le masina o Ianuari o le tausaga nei.
E litaea nei Ash Barty faato'a 25 tausaga lona matua, ma na ia ta'ua ua tatau ona tautau le lake tenisi ae amata seisi itulau fou o lona soifuaga.
********
Ua faamavae ma le Lotu Hillsong se tasi na avea ma ona ta'ita'i i le tele o tausaga, le faife'au Brian Houston.
Na fatula'u 'ese Houston ma lona tofi ina ua alia'e ni tu'ua'iga a ni tamaita'i se to'a 2 i ni ana amioga le taupulea ma le talafeagai ai ma lona tofi faife'au.
Na faaalia i se faamatalaga tusitusia a le komiti faatonu o le Hillsong, o loo faia se suesuega tuto'atasi i le pulega o le Lotu.
********
Ae o faia le galuega o le toe faamamaina o nisi o pitnu'u ma itumalo i NSW na a'afia i le tetele o lologa i le 4 vaiaso ua mavae, ua aumaia se lapata'iga i le toe feagai o ia vaega o le setete ma le tetele o timuga ma toe molimauina ai lologa i aso ma vaiaso o lumana'i nei.
I se faaaliga a le ofisa va'aitau, le Bureau of Meteorology, e atoa seisi vaiaso o timuga i le gataifale i Sasa'e o NSW, mai Sini, le Hunter, Mid-North Coast ma le Northern Rivers; o nisi o 'a'ai nei na matua a'afia i lologa i vaiaso ua tuana'i.
Na faaalia e Jackson Browne o le ofisa va'aitau, e ono toe tetele lologa i le Northen Rivers.
