Ua manumalo le Labor i faigapalota mo le palemene setete o South Australia.
I lona taliaina ai o le faai'uga ma le malolo o le Liberal Party i le palota, na faaalia mai ai fo'i ma le faamavaega a le sa avea ma premier o le setete mai le tofi ta'ita'i, Steven Marshall.
Peita'i na faaalia e Steven Marshal o le a tumau pea ona avea ma sui o Dunstan i le palemene setete.
********
Ae ua avea nei Peter Malinauskas ma premier lona 47 o le setete o South Australia ina ua ia ta'ita'ia le Labor Party i le manumalo i palota ananafi.
Ae le'i tula'i mai i le ta'ita'iga o le Labor, na avea muamua Malinauskas ma se sui o iuni a tagata faigaluega i South Australia.
E foliga mai i palota ua mae'a ona faitauina, e mafai e le Labor ona faavae ma'oti se faigamalo e aunoa ma le faalagolago i sui tuto'atasi.
I lana saunoa i le 'autusitala i Adelaide, na faaalia e Peter Malinauskas lona naunauta'iga e faaauau ona galulue faatasi vaega 'upufai i le palemene o Sotu Australia e tulei polokalame o puipuiga o le KOVITI-19.
********
E 24 itula o le a solitu ai tagata faigaluega i 'au'aunaga lavea'i i taavale a falema'i i New South Wales e faailoa ai lo latou te'ena o le tulaga o loo iai nei le 'au'aunaga ma le to'a gaogao o le 'aufaigaluega.
Na saunoa le peresitene o le Asosi, le Australian Paramedics Association, Chris Kastelan, o le 'aufaigaluega e saini e galulue a taeao, Aso Gafua 20 o Mati, o le a le tu'ua nofoaga e galulue ai e cover isi nofoaga poo pitonu'u e le o lava se 'aufaigaluega.
Na saunoa fo'i Chris Kastelan e 1500 tagata faigaluega e mana'omia e tai tutusa ai le malosi o le 'au'aunaga i NSW ma isi setete i le atunu'u.
********
Ua faaalia e le malo tele le faia o se tapu poo se sa i le toe faatauina atu o le alumini mai Ausetalia nei i Rusia.
E le gata i lea na faaalia fo'i nisi fesoasoani faaopoopo mo Ukraine.
Na faaalia i le faamatalaga, o le taofia ona toe faatau atu o le alumini, o le a a'afia ai le gaosiga o 'a'upega ma pulufana e Rusia.
Na faaalia e le minisita o le vaifafo, Marise Payne, o le a faatagaina tagata sulufa'i mai Ukraine i Ausetalia nei, ma e mafai ona latou mauaina 'au'aunaga soifua maloloina i lalo o le Medicare, atoa ai ma visa faigaluega le tumau.
Na ia ta'ua o le fe'au e avatu ai i Rusia, o le matua te'ena e le malo tele o lana osofa'iga o Ukraine.
********
Ua faaalia e le vaega 'upufai a le Greens le talafeagai ma le atina'e o le tamao'aiga o le si'itia o totogi o penefiti i tagata le faigaluega i le $88 i le aso.
I le taimi nei, o le income support payment o loo sima i le $40 i le aso.
O le fuafuaga a le Greens i le si'itaga, o le alu ai le $88 billion i le isi 4 tausaga o lumana'i, ae na saunoa le ta'ita'i o le Greens, Adam Bandt, e mafai ona 'ausia pe a toe fetu'utu'una'i le fua o lafoga.
Na ia ta'ua le to'atele o tagata o loo ola i se tulaga mativa ma le tagolima, ae o loo iai Kamupani tetele ma le 'aumaumea e le o totogia sa'o o latou sao i lafoga.
********
Ua aumaia se faatonuga a le tupusa, le ta'ita'i o le Ekalesia Katoliko Roma i le lalolagi, Pope Francis, ua faatagaina ai mo le taimi muamua ona tofia le itupa o tamaita'i i tofiga faauluulu o matagaluega o pulega o le Vatikana.
I le taimi nei, na o le itupa o ali'i, o le tele lava o Katinale ma e mautofi o le Ekalesia o loo pulea matagaluega o le Holy Roman See poo le Vatikana, ae o le a mafai nei e tamaita'i, o tagata lotu le'i faau'uina ona maua ia tofiga taualoa a le Ekalesia Katoliko Roma.
O Pope Francis na tofia i le 2013 ma o se tasi leneo o ana poloa'iga o le toe iloilo e faaleleia pe reform le pulega o le Ekalesia Katoliko Roma i le Vatikana.
