Ua vala'au leoleo su'esu'e i Melbourne i tupulaga e auai i Kegi ina ia fesoasoani i la latou galuega i le sa'iliga o le tagata poo ni tagata na mafua ai le maliu o Solomone Taufeulungaki.
O Solomone na maliu i le afiafi o le Aso Lua na te'a nei faato'a 15 tausaga lona matua ina ua osofa'ia e ni tupulaga pe maua le to'a 10 e lata i le Brimbank Shopping Centre i Deer Park i le itu i Sisifo o Melbourne.
E to'a 7 tamaiti i le va o le 13 ma le 16 tausaga le matutua ua saisaia ma molia e leoleo i le faamisa i nofoaga faitele, ae leai seisi ua molia i le maliu o Solomone.
"O se faiga pala'ai ma faatalale, ae maise i le ao teatea," na saunoa ai Detective Inspector Tim Day.
"Ua i'u ai i le maumau o le ola o se tamaititi talavou. O le a le ola a'e ma faauma lana a'oga, faigaluega ma atia'e sona lava aiga."
Na faaalia e leoleo, e iai lo latou talitonuga o le vevesi na tupu mai i le va o ni Kegi se lua i le pitonu'u.
O loo talitonu fo'i i latou o le maliu o Solomone e iai se so'otaga ma seisi faalavelave na faao'olima ai nisi i se tama talavou i le Aso Gafua lea na soso'o ma le maliu o Solomone i le Aso Lua na soso'o ai.
"Matou te iloa o le tele o lagona ita ma tiga na mafua ai, ae le'i iai se faamoemoe o seisi e faao'o le maliu i seisi tagata," na ta'ua e Det Insp Day.
"Peita'i e to'a 2 tagata na o ma naifi i le faalavelave lea i le Aso Lua."
Ua iloa e leoleo Kegi na aofia i le faalavelave ma ua amata ona talanoa i nisi o sui.
Ae na saunoa Detective Inspector Day e iai le avanoa e le maua ma faasalaina ai le tagata na faao'o le maliu ia Solomone.
"Se'i vagana ua maua le tagata tonu na faao'oina le maliu ia Solomone, o lona toto e i lima o i latou uma lava na auai i le faalavelave i le Aso Lua," na ia saunoa.
"O le faai'uga lenei e le o se faiga faatauva. Ae o le faia o le mea amiotonu mo Solomone"
E talitonu fo'i leoleo e iai tagata na pu'eina le faalavelave i a latou telefoni fe'avea'i, ma ua latou talosaga ia i latou mo a latou ata e fesoasoani i le suesuega.
O loo vala'au foi leoleo i ave taavale o taavale nai le mea na tupu ai le faalavelave i le va o le 3.30pm ma le 4.30pm i le Aso Lua, ina ne'i pu'eina nisi o ata i a latou dash cam.
