O loo malosi faitioga mai faalapotopotoga o loo gafa ma le tausiga o tagata matutua, i le aofa'i na faamatu'u mai e le malo tele mo ia 'au'aunaga i le tala i le tupe anapo. .
E $468.3 million na folafola mai e le teutupe mo le faaauauina o 'au'aunaga e pei ona fautuaina e le komisi, le aged care royal commission.
Peita'i o loo finau faalapotopotoga aged care, e leai se mea o faaauau, ona e le'i amataina e le malo tele ona faatino fautuaga mai le royal commission.
O loo i luma o le Komisi le Fair Work Commission, se tagi a faalapotopotoga o auaunaga aged care i se si'itaga i o latou totogi.
Na faaalia e le failautusi o le Health Services Union, Lauren Hutchins i le SBS News, na matua le fiafia i le tala i le tupe anapo ma fesoasoani auaunaga o le tausiga o tagata matutua.
***************************************
Ua faamaonia mai e le Labor o loo agaia le malo tele, o le a latou lagolagoina fuafuaga e pei ona aumaia i le tala i le tupe a le malo tele anapo mo se faamama'avega i aiga.
E aofia ai i nei fuafuaga le tipiina o lafoga i le suau'u ma isi faamama'avega i le tau o le soifuaga.
Na saunoa le sui faaolioli o le Labor i le tofi teutpe, Jim Chalmers, o le tala i le tupe na mafuli i le faaalu o tupe ma le faamoemoe e faatosina mai ai palota i le malo i faigaplota ia o loo faamoemoe e faia i le masina o Me.
Na faaalia e Jim Chalmers i se talanoaga ma le ABC pau le mafuaaga ua lagolagoina ai e le Labor vaega ia o le tala i le tupe, ona ua iloa le mana'omia tele e le atunuu o se faamama'avega i le taugata o le tau o le soifuaga.
*****************************************
I Queensland...
Na faaalia e le palemia setete, premier Annastacia Palaszczuk, e to'a 5 tagata na lavea'ina mai lologa i le Darling Downs region.
Na ta'ua e le premier i lana saunoaga i le palemene analeila, o i latou uma nai se tulaga lamatia ina ua malosi tafega ae o poloka a latou taavale i le vai e lata i le pitonuu o Dalby.
Ae i Matu o New South Wales, o loo tau sa'ilia se fafine o loo masalomia le tafea i lologa i Lismore.
E faapea se ripoti na tafea le taavale a le fafine e lata i le pitonuu o Monal-trie i le po anapo - o le taavale o le ituaiga Holden Captiva station wagon lanu paepa'e.
Ua lapata'ia e le minisia o 'au'aunaga lavea'i le New South Wales Emergency Services Minister Steph Cooke, le mamalu lautele ina ia faautagia mai lapata'iga ma siaki faifaipea le tala i le tau....
*********************************************
Ua tali le palemia Scott Morrison i lafoga a se tasi o sui sinia o le Liberal Party o loo faaalia ai le le faatuatuaina o le taitaiga a Scott Morrison o le atunuu.
O le lafoga na faia e Senator Concetta Fierravanti-Wells, ina ua le toe filifilia o ia pe na faia'ina i preselections mo tofi o le Liberal i le Senate.
Na saunoa le sui o le Senate, o le palemia o se tagata e fiafia e tutuli ma ta'ifau ae leai se faatuatuaga o toe iai i lana taitaiga.
Ae na faaalia e le palemia i le SBS News, e iai le avanoa o Senator Fierravanti-Wells e faaulu ai ona lagona i le komiti tutoatasi a le palemene e iloiloina ni faiga faaalatua ma le tusa ai ma tulafono tumau ma pe a o iai ni ona atugaluga.
********************************************
I se tala faavaomalo....
Ua faaalia e le palemia o Isaraelu, Naftali Bennett, le iai o lona atunuu i se tulaga lamatia mai osofa'iga terorisi.
E to'a 4 tagata na mliliu ina ua tafanaina e seisi ae o ti'eti'e i se pasika i le ogatotonu o le taulaga ananafi, ma o le faalua ai lenei o osofa'iga terorisi ua maliliu ai tagata i Isaraelu i le vaiaso nei.
O loo masalomia o nei osofa'iga o loo faia e faatatau i le amataga o le masina pa'ia i le kalena Moselemi le Ramadan. Na faaalia e Naftali Bennett, o le a suesueina auiliili ma faasalaina i latou na faia nei osofa'iga.
______________________________________END____________________________________
