Na saunoa le failautusi aoao o le Ekalesia Faapotopotoga i Samoa ua pei o se masani ma talia o se vaega o le aganu'u, le sasa ma le fasi e faatonu ai le fanau. Ua tatou faalogo soo i le faa'upuga - o le Tama le Ulu o le Aiga - ma atonu o le manatu i nisi o tama, ua avatu ai i le faa'upuga lenei ma le aia e soona saua ai i le tina ma le fanau.
Ua amata ona faagasolo le fofogaina o molimau i luma o le Komisi su'esu'e i le sauaina o tina ma fanau i Samoa. O se tasi o molimau i le vaiaso mumaua o le Komisi, o se tina na ia ta'ua le tele o taimi na tili ai i leoleo mo se fesoasoani ona o le faao'olima o lona toalua ia te ia, ae o taimi uma lava e leai se su'esu'ega na faia, ma leai se puipuiga na ia maua mai le ofisa o leoleo. Na molimau foi nisi o faife'au ma latou fesiligia pe iai so latou sao i le faafitauli.
Share
