ඔස්ට්‍රේලියානු මහ මැතිවරණයෙන් කම්කරු පක්ෂය ලද නොසිතූ පරාජයේ සම්පූර්ණ වගකීම හිටපු කම්කරු පක්ෂ නායකයා බාර ගනියි.

පසුගිය මැයි මාසයේ පැවති ඔස්ට්‍රේලියානු මහ මැතිවරණයෙන් කම්කරු පක්ෂය ලද නොසිතූ පරාජයේ සම්පූර්ණ වගකීම තමන් බාරගන්නා බව එවකට සිටි කම්කරු පක්ෂ නායක Bill Shorten පවසයි.

පසුගිය ඔස්ට්‍රේලියානු මහ මැතිවරණයෙන් කම්කරු පක්ෂයට නියත ජයක් අත්වනු ඇතැයි බොහෝ මත විමසුම් මෙන්ම දේශපාලන විචාරකයෝ ද පැවසුහ.

නමුත් අවසන් ඡන්ද ප්‍රතිඵලයට අනුව ඔස්ට්‍රේලියානු මධ්‍යම පාර්ලිමේන්තුවේ පහළ මන්ත්‍රණ සභාවේ ආසන 77 ක් දිනාගනිමින් ලිබරල් සන්ධානයට විශිෂ්ඨ ජයක් අත්විය.

කම්කරු පක්ෂයට ලබාගත හැකිවූයේ ආසන 68 ක් පමණි.

එම පරාජයත් සමගින් කම්කරු පක්ෂ නායකත්වයෙන් Bill Shorten ඉල්ලා අස්විය.

ක්වීන්ස්ලන්තයේ සහ බටහිර ඔස්ට්‍රේලියාවේ ඡන්ද පිළිබඳ තමන් එතරම් අවධානයක් නොදැක්වූ බව ඔහු පැවසීය.