කොවිඩ් මාරයා හිටපු අමාත්‍ය මංගල සමරවීර මහතාව බිලිගනී

හිටපු අමාත්‍ය මංගල සමරවීර මහතා අද (24 අගෝ:) අභාවප්‍රාප්ත වී තිබේ. කොවිඩ් වෛරසය ආසාදනය හේතුවෙන් ඒ මහතා කොළඹ පෞද්ගලික රෝහලක ප්‍රතිකාර ලබමින් සිටියේය.

මංගල සමරවීර මහතා ශ්‍රී ලංකා නිදහස් පක්ෂයේ මාතර සංවිධායකවරයා වශයෙන් 1983 වසරේදී දේශපාලනයට පිවිසියේය. ඉන් අනතුරුව ඔහු 1989 වසරේදී මන්ත්‍රීවරයෙකු ලෙසින් පාර්ලිමේන්තුවට ප්[පත්වූයේය.

චන්ද්‍රිකා බණ්ඩාරණායක ආණ්ඩුව යටතේ සමරවීර මහතා හට මුල්ම වතාවට කැබිනට් අමාත්‍යවරයෙකු ලෙසට කටයුතු කිරීමේ අවස්ථාව උදා විණ. පසුව ඒ මහතා එක්සත් ජාතික පක්ෂය සමඟ එක්වුනු අතර වසර 2015 දී පත්වුනු යහපාලන රජයේ මුදල් අමාත්‍යවරයා ලෙස කටයුතු කළේය.

අභාවප්‍රාප්ත මංගල සමරවීර මහතා කොළඹ රාජකීය විද්‍යාලයේ ආදි ශිෂ්‍යයෙකි. මිය යන විට ඒ මහතා 65 වෙනි වියෙහි පසුවුයේය. අද උදෑසන ශ්‍රී ලංකා වේලාවෙන් ඒ මහතාගේ අභාවය සිදුවී ඇතැයි වාර්තා වේ.