අද SBS සිංහල සේවයේ අපි නර්තනය, ගායනය, වේශ නිරූපණය, ඇඳුම් නිර්මාණය, ලාංකික විවාහ මංගල උත්සව මෙහෙයවීම, වේදිකා සැරසිලි යනාදී විවිධ කලා ක්‍ෂේත්‍රවල අති දක්ෂයෙකු හමු වනවා. ඔහු නර්තනය හැදෑරීම කෙනෙකුට සුදුසු නොවන බව විශ්වාස කෙරෙන මුස්ලිම් පවුලකින් පැවත ඒම ඔහුගේ විශේෂත්වයයි. නමුත් ඔහු එම රීතිය බිඳ දමා නර්තනය හදාරන්නට පෙළඹෙනවා. ඒ අනුව ඔහු දැනට විශ්වාස කෙරෙන පරිදි උඩරට නර්තනයේ සම්ප්‍රදායික වෙස් බැඳීම සිදු කරන ලද ලොව පළමුවන මුස්ලිම් පසුබිමක් සහිත පුද්ගලයා බවට පත්වනවා. මේ ඔහුගේ කතාවයි.
මුස්ලිම් තරුණයෙක් ලෙස රශාන් නර්තන කලාව හදාරන්න මුල පිරීම සිදු වුණ ආකාරය.
මීට දශක දෙකකට ඔබ්බෙන් ලාංකික මුස්ලිම් තරුණයන් නර්තනයට යොමු වීම ඉතා දුලබ කරුණක්. එවැනි පසුබිමක පුංචි රශාන් පාසලේ පළමු වසරේ අධ්‍යාපනය හදාරන විට ඔහුගේ වැඩිමහල් සොහොයුරා එකොළොස් වන ශ්‍රේණියේ ඉගෙනුම ලබමින් සිටියා. දහවල් 12.30ට පාසැල නිමා වුණත් පුංචි රශාන්ට තම සොහොයුරා පාසැල අවසන් වන තුරු පාසලේ නැටුම් කාමරය අසලට වෙලා ඉන්න සිදු වෙනවා. එතැනදී දිනක් රශාන්ට තම සොහොයුරා සාමාන්‍යපෙළ නර්තන ප්‍රයෝගික පරීක්ෂණය සදහා පුහුණුවීම් වල නිරත වෙනවා දකින්නට ලැබෙනවා. "මොකක්ද මේ , එක්කෙනෙක් සද්දෙට බෙරේට ගහද්දි, අනිත් අය එක එක හැඩේට අත් කකුල් තිය තියා කරන අපූරු වැඩේ?" පුංචි රශාන්ගේ හිතේ කුතුහලයක් හට ගන්නවා. එදා ඒ උපන්න ආශාව අද රශාන්ව නර්තනයේ පරතෙරටම රැගෙන යන්න මූල බීජය වූ බව ඔහු SBS සිංහල සේවයට පැවසුවා.
Source: Supplied / Supplied
පාසල් අවදියේ නර්තන අංශයෙන් හරි හරියට දස්කම් දක්වන රශාන් ට පාසල නියෝජනය කරමින් විවිධ නර්තන තරගාවලි සදහා සම්බන්ධ වන්නට අවස්ථාව උදා වෙනවා. එහිදී ජාතික මට්ටමේ නර්තන තරග සදහා සම්බන්ධ වීමේදී එක් අවස්ථාවක ඔහුට උඩරට වෙස් ඇදුම් කට්ටලය අනිවාර්යයෙන් පළදින්න වූ බව SBS සිංහල සේවයේ අපට රශාන් පැවසුවා. එහිදී හදහනක් වත් නොමැති රශාන්ට උඩරට චාරිත්‍රානුකූලව නැකතට වෙස් බැදීමේ අභියෝගයට මුහුණ පාන්නට සිදු වෙනවා. මන්ද යත් සාමාන්‍ය සම්ප්‍රදායට අනුව උඩරට වෙස් බැදීමේදී ශිල්පියාගේ හදහනට අනුකුලව නැකත් සදා චාරිත්‍රානුකූලව වෙස් බදිනු ලබන නිසා.
උඩරට නර්තනය හදාරන ශිල්පියෙක්ට මුල් වරට වෙස් ඇදුම් කට්ටලය පැළදීම ඉතාම සුවිශේෂී අවස්ථාවක්. මේ සදහා නර්තන ශිල්පියා තුන් මසක් මස් මාංශ ඇතුළු 'කිලි' යැයි සැළකෙන සියල්ලෙන් ඈත්ව සිටීම අනිවාර්ය වෙනවා. මේ නිසා තුන් වේලම මස් මාංශ අනුභවයට හුරු වුණ රශාන්ගේ පවුලෙන් ඈත්ව ඔහු කෙටි කලකට තම නර්තන ආචාර්‍යවරියගේ නිවසේ නැවතී වෙස් මංගල්‍ය සදහා පේ වූ බව ඔහු SBS සිංහල සේවයට පැවසුවා.
Source: Supplied / Supplied
සම්ප්‍රදායික උඩරට මංගල උත්සවයක අෂ්ඨක ගයන්නා සහ නර්තන වේශ නිරුපන ශිල්පියෙක් ලෙස Source: Supplied / Supplied
නර්තන කලාව, ගායනය, වේශ නිරූපණය, රංග රචනය, රංගවස්ත්‍ර නිර්මාණය , වේදිකා සැරසිළි වැනි විවිධ අංශයන්ට උපන් හපන්කන් දක්වන මොහු තම පාසල් අවදියේදීම රියැලිටි තරගාවලි දෙකක් ජය ගන්නවා. ඉන් අනතුරුව ඔහුට කොළඹ දී ඉන්දීය භරත නර්තන කලාව හදාරන්නට අවස්ථාව උදා වනවා. ඉන් නොනැවතුණු ඔහු ලොව අංක එකේ භරත නාට්‍යම් උසස් අධ්‍යාපනය ලබා දෙන කලාක්ෂේත්‍රා විශ්වවිද්‍යාලයට අයදුම්පත් යොමු කරනවා. නමුත් ඔහුගේ පවුලට සමාජයෙන් එල්ල වන යම් යම් බලපෑම් නිසාවෙන් ඔහුට නර්තනයෙන් උසස් අධ්‍යාපනය හදාරන්නට ඔහුගේ දෙමවුපියන් ඉඩ හසර ලබා දේවිදැයි ඔහු තුළ ඇති වුණේ චකිතයක්. මේ හේතුවෙන් ඔහු තමන්ට මෝස්තර නිර්මාණකරණය හැදෑරීම සදහා ඉන්දියාවට යාමට අවශ්‍ය බව ඔහුගේ දෙමවුපියන්ට පවසනවා. යහපත් සිතින් පුංචි බොරුවක් කියූ ඔහ ු අන්‍යන්ගේ උපකාරයෙන් ද ඉතා තරුණ වියේදී ම තමන් ද උපයාගත් මුදල රැගෙන සම්මුඛ පරීක්ෂණය සදහා ඉන්දියාව බලා පිටත් වනවා. එහි දී පෙන්වූ දස්කම් හේතුවෙන් ඔහුට දෙවන වසර සදහා උසස්වීමක් සමගම තම උපාධිය හැදෑරීම ආරම්භ කිරීමට අවස්ථාව උදා වූ බව ඔහු SBS සිංහල සේවයට පැවසුවා..
රශාන් හින්දු භරත නර්තනයේ යෙදෙමින් Source: Supplied / Supplied
2015 වසරේ ඔස්ට්‍රේලියාවට පැමිණි රශාන් එක ළමයෙක්ට මාස ගණනාවක් නර්තනය උගන්වනවා. ඉන් පසු ටිකෙන් ටික දරුවන් ඔහු ළගට නර්තනය හදාරන්නට යොමු වනවා. සාම්ප්‍රදායික නර්තනයට මුල් තැන දෙන මොහු දරුවන්ගේ නර්තන කළ එළි මංගල්‍ය, අරංගේත්‍රම් උත්සව ද පවත්වමින් දශකයකට ආසන්න කාලයක් ඔස්ට්‍රේලියාව තුළ නර්තන පාසලක් පවත්වනවා. ඕස්ට්‍රේලියාවේ තම නර්තන දිවියට දශකයක් සපිරීම නිමිත්තෙන් ඔහු දළදාව වටා ගෙතුණු නර්තන නාට්‍යක නිර්මාණ කටයුතුද සිදු කරමින් සිටිනවා.
ඔහුගේ වචන වලින් නර්තනය සහ ආගම අතර ඇති සම්බන්ධය ඔහු හරිම අපුරු ආකාරයකට SBS සිංහල සේවය හරහා පෙන්වා දෙනවා; 'නර්තනයයි ආගමයි පටලව ගන්න එපා. නර්තන කියන්නෙ මිනිස් සංහතියටම ඇදහිය හැකි ආගමක්. නර්තනය ඇතුලේ විවිධ ආග්මික දේවල් දකින්න තියෙනවා. එත් නර්තන බාර සර්ව ආගමික දෙවියෙකුට කියල තමයි මම විශ්වාස කරන්නේ '.
Source: Supplied / Supllied
නර්තනාචාර්ය වරයෙක් ලෙස ඔහු සමාජයට දෙන පණිවිඩය
තරගකාරී ලෝකය තුළ හැල්මේ දුවන පුංචි දරුවන් හට ළමා කාලයේ රස විදින්නට, ඔවුන් තුළ වූ කළාකරුවා හදුනා ගන්නට දරුවන්ට කලාව පිළිබඳ අධ්‍යාපනය ලබා දීම වටිනා දායාදයක් බව රශාන් පවසනවා. දරුවන් තුළ විනය ඇති කරන්නට, අනෙකා සමග එක්ව කටයුතු කරන්නට දරුවන්ට එයින් මනා පිටුවහලක් ලැබෙන බව ඔහු පවසනවා.
එමෙන් ම, සාම්ප්‍රදායික ශ්‍රී ලාංකික නර්තන කලාව දිගින් දිගටම වෙනස් කරමින් ඉදිරියට ගෙන ගියහොත් අනාගතයේදී සාම්ප්‍රදායික ශ්‍රී ලාංකික නර්තන සම්ප්‍රදායක් මීළග පරම්පරාවලට දැක ගැනීමට ඉතුරු නොවෙන නිසා අපේ ශ්‍රී ලාංකික නර්තන සම්ප්‍රදාය විකුර්ති නොකර ඇති සැටියෙන් ඉදිරි පරම්පරාවලට දායාද කරන ලෙස ඔහු SBS සිංහල සේවය හරහා ඔබ සැමගෙන් ඉල්ලා සිටිනවා.
