වික්ටෝරියානු ප්රාන්තයේ දැනට පනවා ඇති ඇතැම් කොරෝනා නීති එළෙඹෙන ඉරිදා (27/09) ලිහිල් කරන විට එහි විශාල වෙනස්කම් බලාපොරොත්තු නොවිය යුතු බව වික්ටෝරියානු ප්රාන්ත අගමැති Daniel Andrews මෙල්බර්න් වැසියන්ට පවසයි.
මෙල්බර්න් මෙට්රොපොලිටන් කලාපයෙන් දෛනිකව වාර්තා වන කොරෝනා ආසාදිතයින් ගේ සංඛ්යාව ක්රමිකව පහළ යාමක් දක්නට ලැබෙන බැවින් සැලසුම් කළ ප්රමාණයට වඩා වැඩි කොරෝනා නීති ප්රමාණයක් ලිහිල් කරනු ඇතැයි බොහෝ දෙනා නගන ප්රශ්නය හමුවේ ඔහු මේ බව පැවසීය.
මෙල්බර්න් මෙට්රොපොලිටන් කලාපයට මේ වන විට පනවා ඇති සිව්වන මට්ටමේ කොරෝනා නීති ලිහිල් කර තුන්වන මට්ටමට ගෙන ඒමට එම සාමාන්ය අගය 30 ත් 50 ත් අතර සංඛ්යාවක පවත්වාගත යුතුය.
මෙල්බර්න් මෙට්රොපොලිටන් කලාපයේ පසුගිය දින 14 ක කාලය තුළ වාර්තා වූ දෛනික කොරෝනා ආසාදිතයින් ගේ සංඛ්යාවේ සාමාන්ය අගය අද (25/09) වන විට 25.11 ක් දක්වා තවදුරටත් පහත වැටී ඇත.
කලින් ප්රකාශයට පත් කළ ප්රමාණයට වඩා මේ සති අන්තයේ වැඩි ප්රමාණයක් කොරෝනා නීති ලිහිල් කරනු ඇති නමුත් සියලු ප්රාන්ත වැසියන් ඒ සඳහා ප්රවේශම් සහගත ප්රවේශයක් අනුගමනය කළ යුතු බව වික්ටෝරියානු ප්රාන්ත අගමැති Daniel Andrews පැවසීය.
