2016 AFL (Australian Football League ) තරගාවලියේ අවසන් මහා තරගය එළඹෙන ඔක්තෝබර් 1 සෙනසුරාදා Sydney Swans සහ Western Bulldogs කණ්ඩායම අතර MCG ක්‍රීඩාංගනයේදී පැවැත්වීමට නියමිතයි.
වසර 55කට පසුව මෙවර තරගාවලියේදී Bulldogs කණ්ඩායම අවසන් තරගයට සුදුසුකම් ලැබීම සුවිශේෂී කාරණයක් වන අතර, තරගාවලියේ මුලික වටය (home-and-away rounds) නිමාවට පත් වන විට 7 වැනි ස්ථානයේ පසු වූ ඔවුන් මෙලෙස අවසන් තරගය දක්වා පැමිණීම තවත් වැදගත් කරුණ ලෙස දැක්විය හැකියි.
Western Bulldogs කණ්ඩායම අවසන් වතාවට AFL අවසන් මහා තරගයට සුදුසුකම් ලබා ඇත්තේ 1961 වසරේදී වන අතර එම වසරේ Hawthorn කණ්ඩායම හමුවේ ඔවුන් පරාජයට පත් වූ අතර, අවසන් වතාවට ඔවුන් AFL ශුරතාවය හිමි කරගෙන තිබෙන්නේ 1954 වසරේ බව සදහන්. 1954 වසරේ Demons (Melbourne Football Club ) කණ්ඩායමට එරෙහිව පැවති අවසන් තරගය ජයගනිමින් AFL ශුරතාවය හිමි කරගන්නට Bulldogs කණ්ඩායම සමත් විය.
2016 AFL තරගාවලියේ අවසන් වටයේදී GWS (Greater Western Sydney ) කණ්ඩායම තියුණු තරගයකින් පරාජයට පත් කරමින් Western Bulldogs කණ්ඩායම අවසන් තරගයට සුදුසුකම් ලබන්නට සමත් විය. අවසන් ලකුණු සංඛ්‍යාව 83ට 86ක් ලෙස එම තරගයේ ජය සහතික කරගන්නට Bulldogs ක්‍රීඩකයින්ට හැකිවිය.
අවසන් වටයේදී Sydney Swans කණ්ඩායම Geelong Cats කණ්ඩායම සමගින් තරග වැදුනු අතර එම තරගයෙන් ලකුණු 37ක ජයක් අත් කරගනිමින් අවසන් මහා තරගයට සුදුසුකම් ලබන්නට Swans කණ්ඩායම සමත් විය. පසුගිය වසර 5 තුල Sydney Swans කණඩායම AFL අවසන් මහා තරගයට සුදුසුකම් ලැබූ තුන්වැනි වතාව මෙයයි. Swans කණ්ඩායම අවසන් වතාවට AFL අවසන් මහා තරගයට සුදුසුකම් ලැබුවේ 2014 වසරේදී වන අතර එහිදී ඔවුන් Hawthorn කණඩායම හමුවේ පරාජයට පත් විය. 2012 වසරේදී අවසන් වතාවට Swans කණඩායම AFL ශුරතාවය හිමිකරගත්තේ Hawthorn කණ්ඩායම පරාජයට පත් කරමින්.
AFL ඉතිහාසය තුල Sydney Swans කණ්ඩායම 5 වතාවක් ශුරතාවය හිමිකරගෙන ඇති අතර, Western Bulldogs කණ්ඩායම ශුරතාවය හිමිකරගෙන ඇත්තේ එක් වතාවක් පමණි.
2016 AFL තරගාවලියේ මුලික වටයේ තරග වලදී Swans සහ Bulldogs කණ්ඩායම් මුණ ගැසී ඇත්තේ එක වතාවක් පමණක් වන අතර, එම තරගයෙන් ලකුණු 4ක තියුණු ජයක් වාර්තා කරන්නට Bulldogs කණ්ඩායම සමත් විය.
MCG ක්‍රීඩාංගනයේදී Swans කණ්ඩායම සහභාගී වූ අවසන් තරග 14න් 9ක ජය ඔවුන් හිමි කරගෙන ඇති අතර, Bulldogs කණ්ඩායම MCG ක්‍රීඩාංගනයේ සහභාගී වූ අවසන් තරග 7න් 5ක ජය ඔවුන්ට හිමි වී තිබේ.
මෙවර අවසන් තරගයේ වැඩි වාසි Swans කණ්ඩායම හිමි බව බොහෝ විචාරකයින් ප්‍රකාශ කලත්, Bulldogs කණ්ඩායම බොහෝ දෙනෙක් නොසිතු ලෙස මෙවර තරගාවලියේ ඉදිරියට පැමිණීමත් සමග මෙවර අවසන් තරගය තියුණු තරගයක් බවට පත් වනු ඇති.
