සංචාරක සිම්බාබ්වේ කණ්ඩායම සහ ශ්රී ලංකාව අතර කොළඹ ආර්. ප්රේමදාස ක්රීඩාංගනයේදී පැවැත්වෙන ප්රථම හා එකම ටෙස්ට් තරගයේ තෙවන දිනය ඊයේ (16/07) නිමා වන විට සිම්බාබ්වේ කණ්ඩායම සිය දෙවන ඉනිම සඳහා කඩුලු 6 ක් දැවී ලකුණු 252 ක් ලබාගෙන සිටියි.
කාසියේ වාසිය දිනූ සිම්බාබ්වේ කණ්ඩායම ප්රථමයෙන් පන්දුවට පහර දීමට තීරණය කළ අතර සිය පළමු ඉනිම සඳහා ඔවුන් සියලු දෙනා දැවී ලකුණු 356 ක් රැස් කළේය.
සිම්බාබ්වේ පිළ වෙනුවෙන් ක්රෙග් අර්වින් අගනා ලකුණු 160 ක් ලබා ගත්තේය.
ශ්රී ලංකා පිළේ රංගන හේරත් කඩුලු 5ක්ද අසේල ගුණරත්න හා ලහිරු පෙරේරා කඩුලු 2 බැගින් ද දිල්රුවන් පෙරේරා එක් කඩුල්ලක්ද දවා ගත්තේය.
ශ්රී ලංකාව සිය ප්රථම ඉනිම වෙනුවෙන් සියල්ලන්ම දැවී ලකණු 346 ක් රැස් කරගත්තේය.
ශ්රී ලංකා පිළ වෙනුවෙන් උපුල් තරංග ලකුණු 71 ක්ද දිනේෂ් චන්දිමාල් ලකුණු 55 ක්ද ඇන්ජලෝ මැතිව්ස් ලකුණු 41ක්ද අසේල ගුණරත්න ලකුණු 45 ක් ද ලබා ගත්තේය.
සිම්බාබ්වේ කණ්ඩායම මේ වන විට ශ්රී ලංකාවට වඩා ලකුණු 262 ක් ඉදිරියෙන් සිටියි.
අද (17/07) තරගයේ සිව්වන දිනය වේ.
