Wasiirka socdaalka Peter Dutton ayaa sheegay in loo baahan yahay in laga doodo isbadal balaaran oo lagu sameeyo imtixaanka la mariyo soogalootiga doonaya inay qaataan dhalashada Australia si meesha looga saaro in argagixiso la siiyo dhalasho.
Mr Dutton ayaa laga dhadhansaday inuu doonayo inuu arko in diirada la saaro awooda qofku u leeyahay inuu bulshada Australia dhexgalo.. rabitaanka qofka ee barashada afka Englishka, inay caruurtooda wax baraan, inuu qofku mustaqbalka shaqo heli karo iyo inuu ka madax banaanaan karo inuu ku tiirsanaado lacagta cayrta.
Waxa uu wasiirku joornaalka The Australian u sheegay inuu isagu qabo in dadkii aan qayimkaas la imaan inaysan iska filan inay qaataan dhalsho.
Imtixaanka la mariyo dadka dhalashada qaadanaya oo ahaa mid muran badan dhaliyay ayaa waxaa soo rogay dawladii John Howard 2007, waxaana su'aalaha ka mid ah taariiqda Australia, dadka caanka sportiga ku ahaa, dawlada, juquraafiga iyo dhaqanka Australia.
Dawladii Kevin Rudd ayaa waxoogaa ka badashay imtixaanka labo sano ka dib iyadoo ku dartay waajibaadka madaniga ah iyo masuuliyada saaran muwaadinka.
