Raysul wasaare Scott Morrison ayaa iska diiday inuu faala ka bixiyo yeelid ama diidmo, mar wax laga weydiiyey war soo shaac baxay oo sheegaya , in wasiirada arimaha dibada Marise Payne, ay soo bandhigtay qorshe ay ku dooneyso in la labanlaabo gargaarka la siiyo dalalka Baasifiga (Pacific) ku yaala.
Wargeysyada Australia qaar ka mida ayaa soo qorey in hindisahan ay soogudbisay wasiirada arimaha dibada waqti ahaana uu ahaa bishii November sanadkii na dhaafay, waqtigaas oo xili dhaxaadka qiimaynta Miisaaniyada dawlada ku beegnaa, iyadoo codsigeedu ahaa in la labanlaabo gargaarka ay Australia siiso wadamada Baasifiga .
Wargaysyadu sida ay sheegeen qorshahan ayey wasiirada ujeeda ahaan ka laheyd in lagaga hor tago saamaynta Shiinaha ee wadamada Baasifiga ku wajahan.
Gudiga Amaanka ee Baarlamanka oo qorshahan la hor dhigay ayaa diidey meelmarintiisa, iyadoo la sheegay iney ku cileeyeen in dhaqaala xad dhaafa uu ku baxayo . Waxaase wargaysyadu intaas ay ku darayaan in diidmada qorshaha wasiirada uu dhacay bilo ka hor heshiiska amniga ee Solomon Islands iyo China ay wada gaareen.
Warkan ayaa soo baxaya xili aad xasaasi u ah oo doorashada Australia ay saacada ka hadheen, wararka noocan oo kalena ay dhici karto in ey saameyn ku yeelato go'aan qaadashada dad badan oo Australian ah, si gaara dadka aan tirada yareyn ee aan wali go'aan ku qaadanin cida ay taageeri lahaayeen.
