Wasiirka socdaalka ayaa doonaya in dawlada federalka la siiyo awood ay ku tuuri karto go'aanka ay maxkamada shibilku ka gaaro arimaha muwaadinimada sababtoo ah ayuu wasiirku "Australia waxay ku jirtaa waqti ka duwan kii 10 sano ka hor ay ku jirtay.
Peter Dutton ayaa horeba u haystay fursad uu ku diido go'aan ay maxkamada shibilku ka gaartay arimaha fiisooyinka, laakiin wuxuu doonayaa in awoodaas loosii kordhiyo iyadoo isbahaysiga taladaa hayaa ay wadaan qorshe isbadalo ah oo ay baarlamaanka horkeeni doonaan asbuucan.
Dutton ayaa yiri" Macneheedu ma ah inaan gabi ahaanba go'aanka maxkamada tuurayno sababtoo ah wali dadku waxay awood u leeyihiin inay maxkamada federalka aadaan"
"Waxaan kaliya oo aan doonayno waa in sharuucda muwaadinimadu ay la mid noqdaan kuwa fiisooyinka oo aan awood u leeyahay inaan bixiyo ama diido" ayuu intaa ku daray wasiirku.
Mr Dutton ayaa sheegay in inkastoo aqlabiyada dadka qaata dhalashada Australia ay yihiin dad fiican oo shaqaysta laakiin "Australia siday ahayd 5 ama 10 sano ka hor ma aha"
“Aad baan uga xumahay in dad badan oo siyaasadaha dhanka bidix iyo xisbiga Laborku ay markiiba ka horyimaadeena arintan aan isleeyahay waa mid sax ah" ayuu ku daray wasiirku.
Raiisul wasaarihii hore Tony Abbott ayaa ku raacay wasiirka socdaalka.
Mr Abbott ayaa intaa ku daray in haddii xubnaha ka tirsan maxkada shibilku ay gaaraan go'aan lama filaan ah in markaas aan loo cuusboonaysiin qandaraaska shaqada.
Andrew Leigh oo ka tirsan mucaaradka Laborka ayaa sheegay in xisbigiisu mari doono nidaamka caadada u ahaa marka ay go'aan ka gaarayaan inay taageeraan isbadalada muwaadinimada ee dawladu wado.
Laakiin Dr Leigh ayaa ku dhaliilay dawlada inaysan soo bandhigin faahfaahinta arintan ilaa markii ay ku dhawaaqday bishii April isagoo intaa ku daray in fikrada ah in imtixaan luqada oo adaga la qaado aysan ahayn wax macquul ah.
Afhayeenka arimaha socdaalka u qaabilsan xisbiga Greenka Nick McKim ayaa ku tilmaamay isbadalada dawladu wado kuwo ajanabi nacayb ah oo aan cadaalad ahayn loogana dan leeyahay in lagu wiiqo dhaqamada kala duwan ee Australia.
Wuxuuna uga digay Bill Shorten iyo xisbigiisa Laborku inaysan taageerin waxa uu ugu yeeray siyaasadaha ajanabi nacaybka ah.
Sharcigan lasoo hordhigayo baarlamaanka ayaa sidoo kale dheeraynaya waqtiga ay dadku sugayaan inay codsadaan dhalashada Australia iyadoo laga dhigayo 4 sano in qofku hasyto deganaansho. Waxaa sidoo kale laga qaadayaa imtixaan la xariira qayimka Australia iyo in dadku muujiyaan inay wadanka dhexgaleen.
