Golaha wasiirada cusub ee RW Anthony Albanese ayaa maanta la dhaariyay waxaana golaha wasiirada ka mid ah tiradii ugu badnayd taariiqda oo haween ka mid noqda golaha wasiirada dalka.
Dhaarinta 30 ka xubnood ee golaha wasiirada ayaa ka dhacday aqalka dawlada ee uu degan yahay Govorner Generalka ee ku yaal Canberra, waxaana ka mid ah 13 haween ah oo loo magacaabay jagooyin wasiirnimo.
RW ayaa ku dhawaaqay golihiisa wasiirada shalay galabtii isagoo isu dheeli tiray wajiyo cusub iyo xildhibaano hore uga mid ahaa dawladihii hore ee Laborka.
Dhaarinta ayaa ku soo aadday iyadoo Laborku ku guulaysteen 77 xildhibaan oo ka mid ah aqalka wakiilada kadib markii kursiga la isku hayay ee Gilmore oo ku yaal NSW South Coast ay ku guulaysatay Fiona Phillips oo hore u haysatay kursigaas. Taas ayaa macneheedu yahay in Laborku hadda haystaan aqlabiyad ku filan oo aysan u baahnayn taageerada cid kale si ay shuruucda u marsadaan aqalka hoose ee baarlamaanka.
Golaha wasiirada ayaa waxaa markii ugu horaysay taariiqda ku jira labo wasiir oo Muslim ah. Ed Husic oo laga soo doorto NSW ayaa laga dhigay wasiirka warshadaha iyo sayniska, halka Anne Aly loo magaacabay wasiirada dhlinyarada.
