Kadib guuldaradii doorashada Australia ee isbahaysiga wadanka ka talinayey (Xisbiga Leberalka iyo Xisbiga Nationalka), ayaa labada xisbiba waxaa soo baxdey in ay jirto doonitaan labada xisbi dhaxdooda ah – mid walba gaarkiisa – in ay jirto, tahayna in hogaan cusub la yeesho. Balse labada xisbi ayaa ku kala duwanaa sideey u maareeyeen.
Ugu horeyn, Xisbiga Leberaalka ee uu hogaamineyey Raysul Wasaarihii doorashada looga adkaadey Mr Scott Morrison, ayaa isagu si iskiisa ugu dhawaaqay waqtigii uu aqbalayey in laga guuleystey, waxa uu hadalkiisii uu ugu hanbalyeynayey hogaamiyaha Laborka Albanese , waxa uu ku daray in uu isagu si iskiisa hogaanka xisbiga Leberalka uga tagayo, xisbiguna uu hogaan cusub soo dooran doono sida ugu dhakhsaha badan.
Sidaa daraadeed, Xisbiga Leberalku hada waxa uu ku jiraa raadinta hogaan cusub, ilaa iyo haatana waxaa muuqatay in Peter Dutton, wasiirkii horee gaashaandhiga Australia, uu yahay musharaxa kaliya ee u taagan jagada Hogaamiyaha Xisbiga Leberalka ee Mucaaradka.
Balse dhanka Xisbiga Nationalka, ayaa xaaladiisu sidaas ka duwantahay, kadib markii uu hogaamiyaha Xisbigu Barnaby Joyce uu u dhigay guuldaradii dhanka doorashada in Leberalku masuuliyadaas leeyihiin, xisbigiisuna wax guuldara ayna masuul ka ahayn, sidaasna uu iskaga fogeeyey xanbaarida qayb ka mida masuuliyada guuldarada isbaheysiga ay kamidka ahaayeen doorashadii kasoo gaadhey.
Sidaas darteedna uu muujiyey in uusan diyaar u ahayn in uu si iskii ah u baneeyo hogaanka xisbiga.
Tan ayaa xisbiga dhaxdiisa ka abuurtay dareen sababay in uu Barnaby Joyce xaqiiqada iska indha tirayo.
Hada xisbiga Nationalka Australia - oo u balansan maalinta Isniinta in hogaanka xisbiga cidii daneyneysa ay u baratanto - waxaa ka dhex jira dareen siyaasadeed oo ugu danbeynta u muuqda in uu maalinta Iniinta ee soo socota sigi doon ama uu saari doono Barnaby Joyce .
