Hay'adda Qaramada Midoobay u qaabilsan Nukliyeerka ayaa shir degdeg ah uga hadlaysa dagaalka Ukraine.
Axadii ayay Ukraine la socodsiisay hay'adda IAEA in gantaalo lagu dhuftay xaruntii shucaaca sunta lagu kaydiyo ee Kiev, laakiin illaa iyo hadda ma jiraan warar sheegaya in xarunta dhaawac soo gaaray ama shucaac ay sii daysay.
Hay'adda ayay madaxdeedu shir ku yeelanayaan maalinta Arbacada xaruntooda oo ku taala magaalada Vienna, halkaas oo ay kaga hadli doonaan arintan iyo dhaawaca ay dhici karto inuu gaaray warshada nukliyeerka ee Chernobyl oo hadda u gacan gashay ciidamada Ruushka maalintii qamiistii.
Warshadan ayaa wali shucaac sun ah leh 35 sano kadib markii halkaas ay ka dhacday shilkii nukliyeer ee ugu xumaa aduunka.
