Qodobka loogu codaynayo in xilka looga qaado madaxweyne Trump ayaa ka helay aqalka wakiilada aqlabiyadii ugu saraysay markii ay 232 xildhibaan ay HAA u codeeyeen halka 197 ay MAYA ugu codeeyeen.
Aqalka ayaa ku eedeeyay madaxweynaha inuu 'huriyay kacdoonkii' ka dhacay caasimada markii taageerayaasha madaxweynaha ay weerareen aqalka baarlamaanka.
Afhayeenada aqalka wakiilada Nancy Pelosi ayaa sheegtay in loo baahan yahay in madaxweynaha lagala xisaabtamo falka uu ku kacay.
"Miyaysan na saarnayn waajibaad aan u dhaaranay inaan samayno wax kasta oo dastuuriyan kaga difaaci karno dalkeena iyo dimoqraadiyadeena danaha nin muujiyay inuu qatar ku yahay xoriyadeena iyo sharuucda dalka."
Madaxweyne Trump ayaa noqonayaa madaxweynihii ugu horeeyay taariiqda Maraykanka oo labo jeer loo codeeyo in xilka laga qaado.
Waxaa kayskiisa dhagaysan doona aqalka Senatka.
