Madaxweynaha maraykanka / Donald Trump, ayaa sidii uu hory oogu baaqay kaga dhabeeyay balamihiisii, isagoo magaalada Qudus u aqoonsaday in ay tahay caasimada Israel.
Khudbad uu arintaasi ka jeediyay ayaa waxa uu ku sheegay in aqoonsigani uu yahay oo kaliya in dhabta la garawsaday.
Go’aankan ayaa isagu abuuray dareen weyn oo dunida ka abuurmay, iyadoo ilaa iyo haatan madaxda dunida ee go’aankan ka jawaabtay ayna soo dhaweynin, iyagoo ku tilmaamay in uu dhaawacayo wadaxaajoodkii nabadaynta ee Bariga Dhexe, ee Maraykanku udub dhaxaadka ka ahaa.
Falastiiniyiinta ayaan iyagu soo dhawaynin go’aankan, iyagoo sheegay in maraykanku dhexdhaxaadnimadii ay ka baxeen.
Trump, ayaa sidoo kale go’aankiisaas ku daray in wasaarada arimaha dibada ee maraykanku ay ka hawlgasho, isuna diyaariso sidii safaarada Maraykanka Qudus loogu wareejin lahaa.
Golaha Amaanka ee Qaramada Midoobay, ayaa sideed wadan oo ka mida ay codsadeen in kulan degdega arintaa laga qabto, iyada oo ay jirto baqdin ku saabsan in arintan ay sababi karto qalalaasooyin colaadeed oo si cusub ooga abuurma gobalka Bariga Dhexe, saameyn weyna ku yeesha dunida inteeda kale.
