Ra'iisul Wasaarada New Zealand Jacinda Ardern ayaa raalin galin ka siisay bulshada Muslimiinta ah in dawladu ku guuldaraysatay amaanka ka hor inta uu san dhicin weerarkii argagixiso ee Christchurch.
Hadalka Ra'iisul Wasaarada ayaa imanaya kadib markii la siidaayay warbxin laga sameeyay baaritaan qaran oo loo saaray toogashadii ka dhacday labada masaajid ee ku yaal magaalada oo ay ku dhinteen 51 qof.
Warbixintan oo ka koobnayd 792 bog ayaa lagu faah faahiyay sida ay booliska iyo hay'adaha amaanka NZ ay ugu guuldaraysteen laakiin ma aysan qeexin wax gaar ahaan la qaban karay oo joojin lahaa weerarka.
Ms Ardern ayaa sheegtay inay mabdiyan aqbaleen dhamaan 44 talooyinka warbixinta laga soo jeediyay iyadoo balanqaaday inay abuurayso qorshe lagu hirgalinayo marka la gaaro Maarso sanadka soosocda.
"Ugu danbaynta warbixintan 800 oo bog ah waxaa lagu soo koobi kara hal wax- Muslimiinta reer New Zealand waa inay amaan helaan. Qofkasta oo NZ deggan midabkay doontaan ha yeesheen, diintay doonaan ha haystaan, jinsigay doonaan ha noqdeen waa inay amaan dareemaan. Shacabka NZ waxay mudan yihiin inay haystaan nidaam amni ay ku helaan, taas ayaan naga go'an inaan dhisno."
