Iha estudu ida foin lalais ne'e kona-ba ema LGBTQIA+ ne'ebé buka azilu no refujiadu iha Australia, hatudu katak natureza la'ós de'it uza hanesan fatin enkontru nian, maibé hanesan mos ambiente ida ne'ebé partisipante sira sente seguru sem hetan julgamentu.
Ian Seal maka diretór ezekutivu hosi Many Colored Sky, organizasaun ida ne'ebé fo apoia ba refujiadu LGBTQIA+ no ema sira ne'ebé buka azilu iha Melbourne. Nia hatete ba SBS Examines katak sentimentu mesak sai hanesan problema boot iha komunidade ida ne'e.
Nia hatete "Ema sira hosi sira nia orijen kulturál rasik maka sente ladún seguru no ladún iha ligasaun ho sira nia komunidade rasik iha Austrália, tanba sira reprezenta kultura ida ne'ebé ema barak haree hanesan moras nune'e hases an hosi sira ".
"Ami nia membru komunidade barak ko'alia kona-ba tenke halo opsaun entre: Ha'u liga nafatin ho ha'u nia kultura no ha'u nia orijen no ha'u nia família no komunidade? Ka ha'u hetan fatin iha komunidade LGBTIQ+ nian?"
Mim tenke navega ida-ne'e hafoin muda mai Austrália hosi Vietname tinan 11 liubá.
Nia hatete ba SBS Examines "Ha'u moe no ha'u nia Inglés mos limitadu tebes. Entaun ha'u hela barak liu ho ha'u nia komunidade vietnamista sira. Ha'u koko atu subar ha'u nia seksualidade no ha'u nia identidade mós".
Mim hetan konvite atu halo parte iha programa ida bazeia ba natureza durante semana ualu ho refujiadu no rekerente azilu LGBTQIA+ na'in 36 seluk. Partisipante sira halo ligasaun ho natureza, hanesan ba haree manu sira, fahe hahán no reflete iha liur, la'o iha tasi-ibun, no halo jardín.
Investigadór prinsipál, Nerkez Opacin, hatete ba SBS Examines katak sira ne'ebe tuir programa ne'e, iha ona redusaun iha partisipante sira-nia sentimentu mesak, no aumentu iha sira-nia ligasaun ho natureza.
"[Natureza] serve hanesan baze neutru, laiha julgamentu atu ema iha ligasaun ba malu".
Mim hatete katak programa ne'e hanesan dalan ida ne'ebé kmaan ba nia atu hasoru ema no kria ligasaun.
"Natureza kura tebes hau nia sentimentu ... ha'u sente dame."
Iha epizódiu ida-ne'e hosi SBS Examines, ami esplora oinsá natureza bele ajuda hasoru sentimentu mesak.
