ཨོ་སི་ཊོ་ལི་ཡས་རྒྱལ་སྤྱིའི་སློབ་ཕྲུག་རྣམས་ཕྱི་ཟླ་བདུན་པའི་ནང་འཛུལ་ཞུགས་ཐུབ་རྒྱུའི་རེ་བ་རྒྱག་གི་ཡོད་འདུག

ཏོག་དབྱིབས་ནད་དུག་གིས་རྐྱེན་པས་ཨོ་སི་ཊོ་ལི་ཡ་གཞུང་གིས་རྒྱལ་ཁབ་གཞན་ནས་སློབ་ཕྲུག་དང་། གཞིས་སྤོ་བ། ཚོང་པ། ཡུལ་སྐོར་སྤྲོ་འཆམ་པ་སོགས་ཡོངས་སུ་བཀག་བསྡོམས་བྱས་ཡོད་ཀྱང་། ཕྱི་ཟླ་བདུན་པའི་ནང་རྒྱལ་སྤྱིའི་སློབ་ཕྲུག་ཨོ་སི་ཊོ་ལི་ཡའི་ནང་སློབ་སྦྱོང་བྱེད་མཁན་རྣམས་འཛུལ་ཞུགས་ཐུབ་རྒྱུར་བསམ་བློ་གཏོང་གི་ཡོད་འདུག

Source: SBS

ཉེ་ཆར་ཨོ་སི་ཊོ་ལི་ཡའི་སྲིད་བློན་སྐུ་ཞབས་སི་ཀོ་ཊི་མ་རེ་སོན་ Scott Morrison མཆོག་གིས་རྒྱལ་སྤྱི་སློབ་ཕྲུག་རྣམས་ཨོ་སི་ཊོ་ལི་ཡར་ཡོང་རྒྱུའི་འཆར་གཞི་དེ་ཨོ་སི་ཊོ་ལི་ཡ་གཞུང་གིས་ཉེ་ཆར་གསལ་བསྒྲགས་བྱས་པའི་ཏོག་དབྱིབས་ནད་དུག་གི་དམ་བསྒྲགས་རིམ་པ་གསུམ་པའི་རྗེས་ནས་ལག་བསྟར་ཐུབ་ཐབས་བྱ་རྒྱུ་དང་། དེ་ཡང་ཤེས་ཡོན་ལྟེ་གནས་ཁང་ཁག་དང་ལྷན་དུ་ལས་ཀ་བྱེད་ནས་གང་འདྲ་ཡོང་གི་འདུག་བལྟ་རྒྱུ་ཡིན། ལས་རིམ་མང་པོ་ཞིག་བརྒྱུད་ནས་འགྲོ་དགོས་པ་དང་། གོམ་པ་གཟབ་ནན་བྱེད་ནས་སྤོ་རྒྱུ་ཡིན་སྐོར་འགྲེལ་བརྗོད་གནང་འདུག

ཨོ་སི་ཊོ་ལི་ཡ་ཤེས་ཡོན་ལྷན་ཁང་དང་། ལག་རྩལ་དང་ལས་མི་སྡེ་ཚན་ནས་གནས་ཚུལ་སྤེལ་གསལ་ལྟར་ན། ཕྱི་ལོ་ ༢༠༡༩ ལོར་རྒྱལ་སྤྱིི་ནས་ཨོ་སི་ཊོ་ལི་ཡར་སློབ་སྦྱོང་ཐོ་འགོད་བྱེད་མཁན་སློ་ཕྲུག་གྲངས་ ༩༥༦༧༧༣ བྱུང་འདུག་པ་དང་། ཕྱི་ལོ་ ༢༠༡༩ ཟླ་ ༡༢ པའི་གོང་དུ་ཨོ་སི་ཊོ་ལི་ཡའི་ནང་ཡོད་བཞིན་པའི་རྒྱལ་སྤྱིའི་སློབ་ཕྲུག་གྲངས་ ༧༥༨༡༥༤ ཆགས་འདུག

དེ་བཞིན་ཕྱི་ལོ་ ༢༠༢༠ ལོར་རྒྱལ་སྤྱིའི་སློབ་ཕྲུག་ཨོ་སི་ཊོ་ལི་ཡར་སློབ་སྦྱོང་ཆེད་འཛུལ་ཞུགས་ཐོ་འགོད་བྱེད་མཁན་སློབ་ཕྲུག་གྲངས་ ༦༢༥༢༡༩ བྱུང་ཡོད་འདུག་པ་དང་། འདི་ལོ་ཕྱི་ཟླ་ ༢ པའི་ནང་ཨོ་སི་ཊོ་ལི་ཡའི་ནང་ཡོད་བཞིན་པའི་རྒྱལ་སྤྱིའི་སློབ་ཕྲུག་གྲངས་ ༥༩༣༧༡༨ ཆགས་འདུག

རྒྱལ་སྤྱིའི་སློབ་ཕྲུག་ལས་ལོ་རེར་ཨོ་སི་ཊོ་ལི་ཡར་ཡོང་འབབ་ཨོ་སྒོར་ཐེར་འབུམ་ ༤༠ ཙམ་ཟིན་གྱི་ཡོད་འདུག

ཕྱི་ལོ་ ༢༠༡༩ ལོའི་ལོ་སྟོད་དུ་ཨོ་སི་ཊོ་ལི་ཡའི་ནང་སློབ་སྦྱོང་བྱེད་མཁན།

རྒྱ་ནག་ནས་སློབ་ཕྲུག་གྲངས་ ༡༧༠,༥༤༧

རྒྱ་གར་ནས་ ༦༤,༣༦༤

མ་ལེ་ཤི་ཡ་ནས་ ༢༥,༣༩༦

བལཡུལ་ནས་ ༢༣,༦༡༤

བྷེ་རྫལ་ནས་ ༢༣,༥༣༤

ཝི་ཏི་ནམ་ནས་ ༢༣,༢༧༠

ལྷོ་ཀོ་རི་ཡ་ནས་ ༢༢,༦༥༠

ཐའེ་ལན་ཌི་ནས་ ༢༢,༤༣༩ བཅས་བྱུང་འདུག