ཕྱི་ཚེས་ ༨ ཉིན་གྱི་ཞོགས་པར་གསར་འགོད་པ་གཉིས་ཕྱིར་ཨོ་སི་ཊོ་ལི་ཡའི་གྲོང་ཁྱེར་སིཌ་ནིང་དུ་འབྱོར་ཡོད་པ་དང་། གསར་འགོད་པ་སི་མི་ཐི་ Smith ལགས་ཀྱིས་འདས་པའི་ཉིན་གྲངས་ ༥ ཡི་རིང་དཀའ་ལས་ཁག་པོ་བྱུང་རྗེས། དེ་རིང་ཕྱིར་ནང་ལ་བདེ་འཇགས་ངང་ལོག་ཐུབ་པར་དགའ་པོ་བྱུང་ཞེས་ AFR གསར་ཁང་ལ་འགྲེལ་བརྗོད་གནང་འདུག
ཡང་ཁོང་གིས་ཁ་སང་དགོང་མོ་ངའི་ནང་ལ་ཉེན་རྟོག་པ་ཡོང་ནས་འཇིགས་སྐུལ་དང་། ད་ལྟའི་ཆར་རྒྱ་ནག་ནང་ཕྱི་རྒྱལ་གྱི་གསར་འགོད་པ་ཚང་མར་དགོས་མེད་ཀྱིས་དམིགས་བསལ་གནོན་ཤུགས་སྤྲོད་ཀྱི་ཡོད་སྐོར་འགྲེལ་བརྗོད་གནང་འདུག དེ་བཞིན་གསར་འགོད་པ་བྷིལ་ཊལ་ནང་ལའང་ཉེན་རྟོག་པ་འབྱོར་ནས་དེ་མཚུངས་བསུན་གཙེར་བཟོས་ཡོད་འདུག
དེ་སྔོན་རེས་གཟའ་ཕུར་བུ་ཉིན་ཨོ་སི་ཊོ་ལི་ཡ་ཕྱི་སྲིད་ལས་དོན་ལྷན་ཁང་གིས་ ABC གསར་ཁང་གི་གསར་འགོད་པ་བྷིལ་བྷར་ཊལ་ Bill Birtles ལགས་རྒྱ་ནག་ནས་ཐོན་དགོས་སྐོར་ཉེན་བརྡ་བཏང་ཡང་། དེ་ཉིན་མཚན་མོ་ཉེན་རྟོག་པ་བདུན་ཁོང་གི་སྡོད་གནས་སུ་འབྱོར་ནས། ཁོང་ལ་རྒྱ་ནག་ནས་ཐོན་རྒྱུ་བཀག་འགོག་བྱས་ཡོད་སྐོར་བརྗོད་ཡོད་འདུག
བྷི་བྷར་ཊལ་ལགས་ཀྱིས་རྒྱ་ནག་པེ་ཅིང་དུ་ཡོད་པའི་ཨོ་སི་ཊོ་ལི་ཡའི་གཞུང་ཚབ་ཁང་ལ་ཁ་པར་བཏང་ནས་བདུན་ཕྲག་རྗེས་མར་ཁོང་ལ་འདྲི་བརྩད་མ་བྱས་གོང་རྒྱ་ནག་ནས་ཐོན་ཆོག་པའི་ནང་འགྲིག་གནང་རོགས་ཞེས་རེ་སྐུལ་ཞུས་ཡོད་འདུག
དེར་བརྟེན་ཨོ་སི་ཊོ་ལི་ཡའི་ཕྱི་སྲིད་ལས་ཁུངས་ནས་རྒྱ་ནག་གཞུང་གི་འགོ་ཁྲིད་ཚོ་དང་གྲོས་མོལ་བྱས་ནས་ཁོང་གཉིས་ཀྱིས་འདྲི་བརྩད་མོས་མཐུན་བྱས་རྗེས། ཁོང་གཉིས་ཀ་རྒྱ་ནག་ནས་ཐོན་ཆོག་པའི་རེ་སྐུལ་བྱས་ཡོད་འདུག
རྒྱ་ནག་ཕྱི་སྲིད་ལྷན་ཁང་གི་མགྲིན་ཚབ་པ་ཀྲའོ་ལི་ཅན་ Zhao Lijian ཡིས་གསར་འགོད་པར་རྒྱ་ནག་གཞུང་གིས་ཁ་ཐུག་ཁྲིམས་ལུགས་ལག་ལེན་བརྒྱུད་ནས་ཁོང་ཚོ་ལ་འདྲི་བརྩད་བྱས་ཡོད་པ་དང་། གལ་སྲིད་ཕྱི་རྒྱལ་གྱི་གསར་འགོད་པ་ཚོས་ཁྲིམས་ལ་བརྩི་སྲུང་དང་ཁྲིམས་དང་མཐུན་པའི་གནས་ཚུལ་འགོད་སྤེལ་བྱས་ཚེ་སེམས་ཁྲལ་བྱེད་དགོས་པ་མེད་སྐོར་འགྲེལ་བརྗོད་བྱས་འདུག
རྒྱ་ནག་དང་ཨོ་སི་ཊོ་ལི་ཡ་གཉིས་དབར་གྱི་འབྲེལ་ལམ་ཇེ་སྡུག་ཏུ་ཕྱིན་ནས་ཕྱོགས་གཉིས་དབར་འགལ་བ་ཛ་དྲག་ཆགས་བཞིན་ཡོད་པ་དང་། དེ་བཞིན་ཉེ་ཆར་རྒྱ་ནག་གཞུང་གིས་རྒྱ་ནག་ནང་ཡོད་པའི་ཨ་རིའི་གསར་འགོད་པ་རྣམས་ལ་གསར་འགོད་པའི་ལག་འཁྱེར་དུས་འགྱང་མ་བྱས་པའི་གནས་སྟངས་སོགས་ཆགས་ཡོད་པ་རེད།
