ཨོ་སི་ཊོ་ལི་ཡ་ནས་ཕྱི་ལོ་ ༢༠༢༡ བར་ཕྱི་ལོགས་ལ་འགྲུལ་བཞུད་ཐུབ་རྒྱུ་ཁག་པོ་ཡིན་སྐོར་གསུངས་འདུག

ཏོག་དབྱིབས་ནད་དུག་གིས་རྐྱེན་པས་ཕྱི་ལོ་ ༢༠༢༡ བར་ཨོ་སི་ཊོ་ལི་ཡ་ནས་རྒྱལ་ཁབ་དང་ལུང་པ་གཞན་ལ་རྒྱུན་ལྡན་གྱི་འགྲུལ་བཞུད་ཐུབ་རྒྱུ་ཁག་པོ་ཆགས་སྲིད་སྐོར་འགྲེལ་བརྗོད་གནང་འདུག

OCI card, which is meant to be a lifelong visa to travel to India, and an Australian passport Source: SBS

ཉེ་ཆར་ཨོ་སི་ཊོ་ལི་ཡའི་ཡུལ་སྐོར་སྤྲོ་འཆམ་བློན་ཆེན་སི་མོན་སྦིར་མིན་གྷམ་ Simon Birmingham  མཆོག་གིས། ཡེ་ཤུའི་འཁྲུངས་སྐར་དུས་ཆེན་དང་གུང་སེང་གཞན་སོགས་ཀྱི་ཆེད་མི་སེར་རྣམས་ཀྱིས་འགྲུལ་བཞུད་ཀྱི་པཱ་སི་སོགས་སྔོན་མངགས་གནང་རྒྱུ་མེད་པའི་འབོད་སྐུལ་དང་། ཏོག་དབྱིབས་ནད་དུག་གིས་རྐྱེན་པས་ཕྱི་ལོ་ ༢༠༢༡ བར་ཨོ་སི་ཊོ་ལི་ཡ་ནས་རྒྱལ་ཁབ་དང་ལུང་པ་གཞན་ལ་རྒྱུན་ལྡན་གྱི་འགྲུལ་བཞུད་ཐུབ་རྒྱུ་ཁག་པོ་ཆགས་སྲིད་སྐོར་འགྲེལ་བརྗོད་གནང་འདུག

ཡང་ཁོང་གིས་འགྲིམ་འགྲུལ་བཀག་བསྡོམས་དེ་ག་དུས་ཕྱིར་འཐེན་བྱ་རྒྱུ་ཡིན་མིན་ད་ལྟ་བཤད་ཐུབ་རྒྱུ་ཁག་པོ་ཡིན་ཞིང་། དེ་ནི་སྐབས་དེའི་འཕྲོད་བསྟེན་གྱི་གནས་སྟངས་ལ་བསྟུན་དགོས་ཀྱི་ཡོད་སྐོར་འགྲེལ་བརྗོད་བྱས་འདུག

ཏོག་དབྱིབས་ནད་དུག་དང་ཨོ་སི་ཊོ་ལི་གཞུང་གིས་ཕྱི་ལོགས་འགྲིམ་འགྲུལ་དམ་དྲག་དེས་ཁྱོན་མི་སེར་ ༡༦༠༠༠ ཙམ་གྱི་ཡུལ་སྐོར་སྤྲོ་འཆམ་དང་གུང་སེང་འཆར་གཞི་སོགས་ལ་འགོག་རྐྱེན་བཟོས་ཡོད་འདུག

ཨོ་སི་ཊོ་ལི་ཡ་ནས་ཕར་ཚུར་འགྲུལ་བཞུད་ལ་དམ་དྲག་ཡོད་ཀྱང་། ད་ལྟའི་ཆར་ཨོ་སི་ཊོ་ལི་ཡའི་མི་སེར་ཚང་མ་དང་། གཏན་སྡོད་བྱེད་མཁན། ནང་མི་ཉེ་ཤོས། ལྟ་སྐྱོང་སྲུང་སྐྱོབ་བྱེད་མཁན་རྣམས་ལ་དམིགས་བསལ་ཆོག་མཆན་འོག་ཨོ་སི་ཊོ་ལི་ཡར་འཛུལ་ཞུགས་བྱེད་ཆོག་གི་ཡོད་པ་རེད།

གཞན་ཡང་ཨོ་སི་ཊོ་ལི་ཡ་ནང་སྲིད་ལྷན་ཁང་གིས་གལ་གནད་ཆེ་བའི་རྒྱལ་ཁབ་ཀྱི་ཁེ་ཕན་ཆེད་དང་། འགྲོ་བ་མིའི་བདེ་རྩ་དང་བྱམས་བརྩེའི་གཞི་རྩ་ལྡན་པ་རྣམས་ལ་དམིགས་བསལ་ཡོད་སྐོར་འགྲེལ་བརྗོད་བྱས་འདུག

ཨོ་སི་ཊོ་ལི་ཡའི་ནང་ད་ལྟའི་ཆར་འགྲིལ་འགྲུལ་དམ་དྲག་དང་། སྤྱི་ཚོགས་རྒྱང་བཀྱེད་ཀྱི་སྒྲིག་གཞི་དེ་ཚོས་རྐྱེན་པས་ཚོད་རྩིས་བྱས་ན་ཟླ་བ་རེ་ཁྱོན་ཨོ་སྒོར་ཐེར་འབུམ་ ༩ ཙམ་གྱོང་གུད་ཕོག་གི་ཡོད་འདུག