ཨོ་སི་ཊོ་ལི་ཡའི་ནང་ཏོག་དབྱིབས་ནད་དུག་སྔོན་འགོག་ཆེད་དམ་བསྒྲགས་ཁག་ཅིག་ལྷོད་དུ་བཏང་འདུག འདི་ནས་བདུན་ཕྲག་འདིའི་ནང་ཁྱེད་རང་སྡོད་སའི་མངའ་སྡེའི་ནང་ག་རེ་བྱེད་ཆོག་གི་ཡོད་མེད་གསལ་ཡོད། ཏོག་དབྱིབས་ནད་དུག་སྔོན་འགོག་དམ་བསྒྲགས་དེ་བཞིན་ད་ཆ་ཅུང་ཇེ་ལྷོད་དུ་བཏང་ཡོད་སྟབས། ཨོ་སི་ཊོ་ལི་ཡའི་ནང་མི་མང་ས་ཡ་མང་པོ་བདུན་ཕྲག་འདི་ནས་བཟུང་རང་དབང་དང་གུ་ཡངས་ཐོབ་རྒྱུ་ཡིན། འོན་ཀྱང་མངའ་སྡེ་དང་ས་ཁུལ་སོ་སོའི་ནང་གི་སྒྲིག་གཞི་མ་འདྲ་བ་ཡོད་པ་རེད།
ཏོག་དབྱིབས་ནད་དུག་སྔོན་འགོག་ཆེད་ཨོ་སི་ཊོ་ལི་ཡའི་ནང་བདུན་ཕྲག་ཁ་ཤས་རིང་དམ་བསྒྲགས་ཆེན་པོ་བྱས་ཡོད་ཀྱང་། ཉེ་བའི་ཆར་མངའ་སྡེ་དང་ས་ཁུལ་འགའ་ཤས་ནང་ཏོག་དབྱིབས་ནད་དུག་འགོས་པའི་ནད་པ་གསར་པའི་གྲངས་འབོར་གཏུད་མ་མར་ཆགས་ཡོད་སྟབས། ནིའུ་སོ་ཐི་ཝལ་ NSW མངའ་སྡེ་ནི་ཨོ་སི་ཊོ་ལི་ཡའི་ནང་ཏོག་དབྱིབས་ནད་དུག་ཕོག་པའི་ནད་པའི་གྲངས་འབོར་ 6762 ལས་ཕྱེད་ཀ་ཙམ་ཟིན་ཡོད། འོན་ཀྱང་མངའ་སྡེ་དང་ས་ཁུལ་གཞན་ལྟར་བདུན་ཕྲག་འདིའི་འགོ་སྟོད་ནས་བཟུང་སྤྱི་ཚོགས་དམ་བསྒྲགས་ཐད་འགྱུར་བ་ཆེན་པོ་ཕྱིན་ཡོད་སྐོར་ནིའུ་སོ་ཐི་ཝལ་མངའ་སྡེའི་བློན་ཆེན་ལྕམ་ Gladys Berejiklian མཆོག་གིས་གསལ་བསྒྲགས་བྱས་འདུག
དེ་ཡང་བདུན་ཕྲག་འདིའི་རེས་གཟའ་པ་སངས་ནས་བཟུང་། (སྤྱི་ཚོགས་ཟུར་བཀག་ལྷོད་ཡངས་དང་སེམས་ཁམས་འཕྲོད་བསྟེན་ཆེད་) མི་རྒན་པ་ ༢ དང་དེ་དག་གི་ཕྲུ་གུ་རྣམས་ཁྱིམ་ཚང་གཞན་ལ་འགྲོ་ཆོག་གི་ཡོད་པ་དང་། ང་ཚོས་དགའ་ས་ཉེ་སར་ཐག་རིང་ཐུང་ག་ཚོད་བར་འགྲུལ་བཞུད་བྱེད་ཆོག་གི་ཡོད་མེད་ཚད་བཀག་བཟོས་མེད། འོན་ཀྱང་ང་ཚོས་མི་ཚང་མས་རང་འགན་རང་འཁུར་བྱེད་དགོས་པའི་འབོད་སྐུལ་བྱེད་བཞིན་ཡོད། འདི་དགོངས་སེང་མ་རེད་ཅེས་ཁོ་མོས་འགྲེལ་བརྗོད་གནང་འདུག
འགོ་ཁྲིད་ཚོས་སྤྱི་ཚོགས་རྒྱང་བཀྱེད་མུ་མཐུད་དུ་བྱེད་གནས་དགོས་པ་དང་འགྲུལ་བཞུད་བྱེད་སྐབས་འཕྲོད་བསྟེན་ལ་དོ་སྣང་སྔར་ལྷག་བྱེད་དགོས་པའི་སྐུལ་འདེད་གནང་འདུག
ཐུག་འཕྲད་དུ་འགྲོ་སྐབས་ཁང་པའི་ཕྱི་རོལ་གྱི་ཁོར་ཡུག་དཔེར་ན་ནང་གི་ལྡུམ་རྭ་དང་། སྒོ་རྭ། ཡང་ན་གཡབ་དེ་བར་བསྡད་ན་ནད་དུག་འགོས་པའི་ཉེན་ཁ་ཆུང་བ་ཡོད་སྐོར་མངའ་སྡེའི་བློན་ཆེན་མཆོག་གིས་ལམ་སྟོན་གནང་འདུག
ད་དུང་སིཌ་ནི་གི་ས་ཆ་གྲགས་ཆེ་བ་བྷོན་རྡེ་ (Bondi) མཚོ་ཁ་དང་། བྷ་རོན་ཐི་ (Bronte) མཚོ་ཁ་སོགས་ཆུ་རྐྱལ་དང་རླབས་ཤུད་རྩེ་བ་ཁོ་ནའི་ཆེད་བསྐྱར་དུ་འགྲོ་བསྐྱོད་ཆོག་གི་ཡོད་འདུག
འོན་ཀྱང་མཚོ་འགྲམ་ས་ཐོག་ཏུ་འདུ་འཛོམས་དང་། ཉི་མ་འདེ་བ། གོམ་བགྲོད་དང་རྒྱུག་ཤར་གློད་པ་སོགས་ད་དུང་མུ་མཐུད་དམ་བསྒྲགས་བཀག་བསྡོམས་བྱ་རྒྱུ་ཡིན་པས་མ་ཚད། དེ་མིན་གྱི་ནིའུ་སོ་ཐི་ཝལ་མངའ་སྡེའི་ནང་གི་དམ་བསྒྲགས་ཁག་མུ་མཐུད་གནས་ཡོད་འདུག
ནང་ཕན་ཚུན་བར་འགྲོ་བསྐྱོད་ཕུད་པའི་གཞན་མི་མང་རྣམས་ཀྱི་ད་དུང་རྒྱུ་མཚན་ངེས་ཅན་ཡོད་ན་མ་གཏོགས་ཕྱི་ལ་འགྲོ་བསྐྱོད་བྱ་རྒྱུ་མེད་ཀྱང་། ཟས་རིགས་དང་། ཞབས་ཞུ། ལས་ཀ་སློབ་སྦྱོང་ཆེད་འགྲོ་བསྐྱོད། སྨན་བཅོས་དང་ལྟ་སྐྱོང་། ལུས་རྩལ་སོགས་ནང་ནས་སྒྲུབ་མི་ཐུབ་པའི་དོན་དག་ཁག་དམིགས་བསལ་ཡོད་འདུག
ཁུན་སི་ལན་ཌི།
ཁུན་སི་ལན་ཌི་མངའ་སྡེའི་ནང་སྤྱི་ཚོགས་དམ་བསྒྲགས་ཁག་ཡོངས་སུ་འགྱུར་བ་ཕྱིན་ནས། བདུན་ཕྲག་འདིའི་གཟའ་འཇུག་ནས་བཟུང་མི་མང་རྣམས་ཀྱིས་སྤྲོ་སྐྱིད་གཏོང་བ་དང་། ཛ་དྲག་གི་དོན་དག་ཡོད་མེད་ལ་བལྟོས་པའི་མོ་ཊ་གཏོང་ནས་འགྲོ་བ་དང་། སྦག་སྦག་གཏོང་བ། གྲུ་གཟེངས་དང་སྦག་གྲུ་གཏོང་ནས་རྩེད་འཆམ་བྱེད་པ། སྤྱི་གླིང་ལ་འགྲོ་བསྐྱོད་དང་དགོས་གལ་ཆེན་པོ་ཡོད་མེད་ལ་བལྟོས་པའི་ཚོང་ཁང་ལ་འགྲོ་ནས་ཉོ་ཆ་རྒྱག་པ་སོགས་བྱེད་ཆོག་གི་ཡོད་འདུག
འོན་ཀྱང་མི་རྣམས་ནང་ནས་ལེ་དབར་ ༥༠ ལས་བརྒལ་ནས་འགྲོ་བསྐྱོད་མི་ཆོག་ཅིང་། གོང་གསལ་བྱེད་སྒོ་དེ་དག་ཁྱིམ་ཚང་གཅིག་གི་ནང་མཉམ་སྡོད་བྱས་ཡོད་པའི་མི་ཁོ་ནས་སྒྲུབ་ཆོག་གི་ཡོད་པ་དང་། གལ་སྲིད་ཁྱེད་རང་ཁེར་རྐྱང་ཡིན་ཚེ་སྤྱི་ཚོགས་ནང་མི་གཞན་གཅིག་དང་མཉམ་དུ་གོང་གསལ་བྱེད་སྒོ་དེ་དག་གཉེར་ཆོག་གི་ཡོད་འདུག
ཨོ་གླིང་བྱང་ཁུལ།
ཨ་གླིང་བྱང་ཁུལ་མངའ་སྡེའི་ནང་རེས་གཟའ་པ་སངས་ནས་བཟུང་རྩེད་ཐང་དང་། མི་མང་གི་ཆུ་རྐྱལ་རྒྱག་ས། རྒྱལ་ཡོངས་སྤྱི་གླིང་ཁག་ཅིག་བསྐྱར་དུ་སྒོ་ཕྱེས་ཡོད་པ་དང་། དེ་བཞིན་གྲོགས་པོ་དང་མཉམ་དུ་ཉ་འཛིན་པ་དང་དབྱུག་རྩེད་སྤོ་ལོ་རྩེ་བར་སོགས་འགྲོ་ཆོག་གི་ཡོད་འདུག
གཞན་ཡང་ལུས་སྦྱོང་བྱེད་ས་དང་། འཚིག་ཇ་ཁང་། ཟ་ཁང་དང་ཨར་ཁང་ཁག་ཅིག་ཕྱི་ཟླ་ ༥ ཚེས་ ༡༥ ཉིན་ནས་དུས་ཡུན་ཆུ་ཚོད་ ༢ རིང་ཚད་བཀག་འོག་བསྐྱར་དུ་སྒོ་ཕྱེ་འཆར་ཡོད་འདུག ཕྱི་ཟླ་ ༦ པའི་ཚེས་ ༥ ནས་བཟུང་ཚོང་ལས་ཁག་ཚང་མ་བསྐྱར་དུ་སྒོ་ཕྱེ་རྒྱུ་དང་། བྱེད་སྒོ་ཁག་ཚང་མར་འཛུལ་ཞུགས་བྱེད་ཆོག་གི་ཡོད་འདུག
འོན་ཀྱང་མི་ཕན་ཚུན་དབར་བར་ཐག་རྨིད་ ༡།༥ ཙམ་བསྡད་དགོས་པའི་སྤྱི་ཚོགས་རྒྱང་བཀྱེད་སྒྲིག་གཞི་དེ་བཞིན་མུ་མཐུད་གནས་དགོས་ཀྱི་ཡོད་འདུག
ཨོ་སོ་ཊོ་ལི་ཡའི་ནུབ་ཕྱོགས།
རེས་གཟའ་ཟླ་བ་ནས་ལུས་རྩལ་དང་། གཉེན་སྟོན། དུར་མཆོད་སོགས་ཀྱི་ཆེད་མི་གྲངས་ ༡༠ འདུ་འཛོམས་བྱེད་ཆོག་གི་ཡོད་པ་དང་། དེ་བཞིན་གླིང་ཁའི་ནང་སྤྲོ་སྐྱིད་གཏོང་བ་དང་། ཉ་འཛིན་པ། གྲུ་གཏོང་བ་སོགས་བྱེད་ཆོག་གི་ཡོད་ཀྱང་འགྲིམ་འགྲུལ་དམ་བསྒྲགས་མུ་མཐུད་གནས་ཡོད་འདུག
ཝི་ཊོ་རི་ཡ།
ཝི་ཊོ་རི་ཡ་མངའ་སྡེའི་སྲིད་བློན་ཨན་ཌི་རོ་སི་ (Daniel Andrews) མཆོག་གིས་མངའ་སྡེའི་ནང་ད་བར་འགྱུར་བ་གང་ཡང་ཕྱིན་མེད་པ་དང་། ཕྱི་ཟླ་ ༥ ཚེས་ ༡༡ ཉིན་ནས་དམ་བསྒྲགས་ཁག་ཅིག་འགྱུར་བ་འགྲོ་སྲིད་སྐོར་འགྲེལ་བརྗོད་གནང་འདུག
ཨོ་སི་ཊོ་ལི་ཡའི་ལྷོ་ཕྱོགས་དང་། ཏྭ་སི་མ་ནི་ཡ། རྒྱལ་ས་མངའ་ཁུ་ད་ལྟ་འགྱུར་བ་སྐོར་གསལ་བསྒྲགས་གང་ཡང་བྱས་མེད་པ་རེད།
