ཕྱི་ལོ་ ༢༠༢༠ ཟླ་ ༧ ཚེས་ ༧ ཉིན་བོད་མིའི་སྒྲིག་འཛུགས་ཀྱི་དབུས་འོས་བསྡུ་ལྷན་ཁང་ནས། ཨོ་སི་ཊོ་ལི་ཡའི་སྐུ་ཚབ་དོན་གཅོད་སྐུ་ངོ་ལྷག་པ་མཚོ་སྒོ་མཆོག་སླར་ཡང་འོས་བསྡུ་འགན་འཛིན་བསྐོ་བཞག་དང་། ཕྱི་ཟླ་ ༨ ཚེས་ ༢༥ འགྱང་མེད་ཨོ་སི་ཊོ་ལ་དང་ནེའུ་ཛི་ལན་ཌི་གཉིས་ནང་ས་གནས་འོས་བསྡུ་ལས་ཁང་གི་ཚོགས་མི་དང་ཟུར་དཔང་གསར་འདེམས་ཟིན་པ་དགོས་པའི་བཀོད་ཁྱབ་བཏང་གནང་འདུག
སྤྱིར་དེ་སྔོན་བཀའ་ཤག་གིས་ཤེས་རིག་དྲུང་ཆེ་ཀརྨ་སེང་གེ་མཆོག་ཕྱི་ལོ་ ༢༠༢༠ ཟླ་ ༦ ཚེས་ ༡ ནས་ཨོ་སི་ཊོ་ལི་ཡ་སྐུ་ཚབ་དོན་གཅོད་དང་། ཨོ་སི་ཊོ་ལི་ཡའི་སྐུ་ཚབ་དོན་གཅོད་ལྷག་པ་མཚོ་སྒོ་མཆོག་ཕྱི་ཟླ་ ༦ ཚེས་ ༢༢ ནས་བོད་མིའི་སྒྲིག་འཛུགས་ཀྱི་ཆོས་རིག་དྲུང་ཆེར་གནས་སྤོ་བཏང་རྒྱུ་བྱས་ཀྱང་། ཏོག་དབྱིབས་ནད་ཡམས་ཀྱིས་རྐྱེན་པས་རྒྱལ་ཁབ་ཕན་ཚུན་དབར་འགྲོ་བསྐྱོད་བཀག་འགོག་བྱས་པར་བརྟེན་རྩིས་སྤྲོད་རྩིས་ལེན་དང་ལས་འཁུར་ཕར་འགྱངས་བཀའ་ཁྲོལ་གནང་སྟབས། ཐེངས་འདིར་ཨོ་གླིང་སྐུ་ཚབ་དོན་གཅོད་ལྷག་པ་མཚོ་སྒོ་མཆོག་སླར་ཡང་ཨོ་གླིང་དང་ནེའུ་ཛི་ལན་ཌི་ས་གནས་འོས་བསྡུ་འགན་འཛིན་བསྐོ་བཞག་བྱས་པ་རེད་འདུག
མ་ཚད་ཨོ་སི་ཊོ་ལི་ཡ་དང་ནེའུ་ཛི་ལན་ཌིའི་ནང་ས་གནས་འོས་བསྡུ་ལས་ཁང་ཁག་གི་ཚོགས་མི་ཕྱི་ཟླ་ ༥ ཚེས་ ༡ ནས་དུས་ཡུན་གཙང་ཡོད་ཀྱང་ཏོག་དབྱིབས་ནད་ཡམས་ཀྱིས་རྐྱེན་པས་ཚོགས་མི་དང་ཟུར་དཔང་གསར་པ་དུས་ཐོག་བསྐོ་བཞག་གནང་ཐུབ་མེད་པར། དབུས་འོས་བསྡུ་ལས་ཁང་ནས་ས་གནས་འོས་བསྡུ་ལས་ཁང་གི་ཚོགས་མི་དང་ཟུར་དཔང་གི་འོས་བསྡུའི་ལས་རིམ་གནས་སྐབས་ཕྱིར་འཐེན་གནང་ཡོད་འདུག
ཨོ་གླིང་སྐུ་ཚབ་དོན་གཅོད་ཀྱིས་གསལ་བསྒྲགས་གནང་གསལ་ལྟར་ན། ཨོ་གླིང་དང་ནེའུ་ཛི་ལན་ཌི་གཉིས་ནང་ས་གནས་འོས་བསྡུའི་ཚོགས་མི་འདེམས་ཕྱོགས་རིམ་པ་གཉིས་སུ་བགོས་ཏེ། རིམ་པ་དང་པོར་ཨོ་གླིང་ཁུལ་ (VIC) ཝིག་ཊོ་རེ་ཡ་དང་། (ACT) རྒྱལ་ས་མངའ་ཁུལ། (QLD) ཁུན་སི་ལན་ཌི། (Adelaide) ཨེ་དྷེ་ལན་ཌི། (Tasmania) ཏཱ་སི་མ་ནི་ཡ་བཅས་ཁག་ལྔ་དང་། (New Zealand) ནེའུ་ཛི་ལན་ཌི་དང་། (Auckland) ཨོཀ་ལན་ཌི། (Duniden) ཌུ་ནེ་ཌིན། ས་གནས་ཁག་གཉིས་བཅས་བསྡོམས་ས་གནས་ཁག་བདུན་གྱི་ས་གནས་འོས་བསྡུའི་ཚོགས་མི་དང་ཟུར་དཔང་ཕྱི་ཟླ་ ༨ ཚེས་ ༡༠ གོང་གཏན་འཁེལ་གནང་ཡོད་པ་དང་། རིམ་པ་གཉིས་པ་ (NSW) ནེའུ་སོ་ཐི་ཝལ་མངའ་སྡེའི་ཁུལ་དུ་འོས་བསྡུའི་ཚོགས་མི་དང་ཟུར་དཔང་ཕྱི་ཟླ་ ༨ ཚེས་ ༡༩ སྔོན་ཚུད་གཏན་འཁེལ་གནང་ཡོད་འདུག
ཡང་དབུས་འོས་བསྡུ་ལྷན་ཁང་གིས་ཕྱི་ལོ་ ༢༠༢༠ དང་། ཕྱི་ལོ་ ༢༠༢༡ ལོའི་སྲིད་སྐྱོང་དང་། བོད་མི་མང་སྤྱི་འཐུས་སྐབས་བཅུ་བདུན་པའི་འོས་བསྡུའི་ལས་རིམ་རིང་མིན་འགོ་འཛུགས་གནང་རྒྱུ་ཡིན་པ་དང་། འོས་བསྡུའི་སྐབས་འོས་འཕེན་དང་བླངས་དཔྱ་དངུལ་ལག་དེབ་དགོས་གལ་ཁར་དཔྱ་དངུལ་དུས་ཐོག་ཕུལ་ཟིན་པ་ཞོག་དགོས་སྟབས།་དང་བླང་དཔྱ་དངུལ་ལག་དེབ་ཞུ་ཕྱོགས་དོན་ཚན་ཁག་བཞི་ལམ་སྟོན་གནང་འདུག
༡། བོད་མི་རང་ལོ་ ༡༨ སོན་པ་ཡན་གང་ཞིག་དཔྱ་དེབ་ནོར་བཅོས་དང་། ལོ་རྒྱུས་སྙིང་བསྡུས། མིང་བསྒྱུར་ཆེད་དཔྱ་དེབ་འདི་གར་ཕུན་ཟིན་ཀྱང་། ལམ་སྟོན་ལྟར་ཡིག་ཆ་འཐུས་ཚང་མེད་པའམ། ས་གནས་སུ་དོགས་འདྲི་བཏང་བས་ལན་འབྱོར་བསྡད་རྣམས་ཀྱི་དཔྱ་དངུལ་ལག་དེབ་འོས་བསྡུ་ཆེན་མོའི་མིང་གཞུང་དེབ་བསྐྱེལ་ཞུ་དགོས་ཀྱི་ཡོད་སྟབས། ཕྱི་ལོ་ ༢༠༢༠ ཟླ་ ༨ ཚེས་ ༣༠ ནས་ས་གནས་སོ་སོར་ཕྱིར་སློག་ཞུ་རྒྱུ་དང་། དཔྱ་དེབ་ཁག་ས་གནས་སོ་སོར་འབྱོར་འཕྲལ་དོ་བདག་སོ་སོར་རྩིས་སྤྲོད་ཀྱིས་དཔྱ་དེབ་ལག་སོན་བྱུང་བའི་དོ་བདག་སོ་སོའི་མཚན་རྟགས་དང་། རྩིས་སྤྲོད་གནས་ཚེས་ཁ་གསལ་འཁོད་པའི་ཐོ་གཞུང་ཟུར་ཉར་དགོས་པ།
༢། རང་ལོ་ ༡༨ སོན་པ་ཡན་ནས་ཕྱི་ལོ་ ༢༠༣༠ ཟླ་ ༨ ཚེས་ ༣༠ ནང་ཚུན་དོགས་འདྲི་ཁག་ལ་ལན་འདེབས་ངེས་འབུལ་དགོས་པ། གོང་གསལ་དུས་བཀག་ནང་ཚུན་ལན་འདེབས་མ་འབྱོར་ཚེ་དཔྱ་དེབ་ཁུངས་སུ་ཕྱིར་སློག་ཞུ་རྒྱུ་ཡིན་པ།
༣། དཔྱ་དེབ་ནོར་བཅོས་དང་། ལོ་རྒྱུས་སྣིང་བསྡུས། མིང་བསྒྱུར་དཔྱ་དེབ་དང་། འགེངས་ཤོག་བཅས་ ༢༠༢༠ ཟླ་ ༨ ཚེས་ ༣༠་ནས་བཟུང་འོས་བསྡུ་ཆེན་མོའི་ལས་རིམ་ཆ་ཚང་མཇུག་བསྒྲིལ་མ་ཟིན་བར་འདི་ག་ལས་ཁུངས་སུ་འབུལ་གཏོང་མེད་པ་དགོས་རྒྱུ།
༤། རང་ལོ་ ༡༨ སོན་པ་ཡན་གྱི་དཔྱ་དེབ་གསར་བཟོ་དང་། བོར་བརླག་བསྐྱར་བཟོའི་ཆེད་འདི་གར་ཕུལ་ཟིན་པ་རྣམས་ལ་དཔྱ་དངུལ་ལག་དེབ་གང་མགྱོགས་འབུལ་ཐབས་འབད་བརྩོན་ཞུ་རྒྱུ་དང་། ཟློག་མེད་རྒྱུ་རྐྱེན་གྱིས་འོས་བསྡུ་ཆེན་མོའི་ལས་རིམ་འགོ་འཛུགས་མ་ཟིན་གོང་ལག་དེབ་འབུལ་ཐབས་འགྱུར་དང་གྱུར་མིན་གྱི་གནས་སྟངས་ཆགས་སྲིད་སྐོར་འགྲེལ་བརྗོད་གནང་འདུག
དེ་མཚུངས་སིཌ་ནི་བོད་རིགས་མཐུན་ཚོགས་ནས་སྐུ་ཚབ་དོན་གཅོད་ལས་ཁུངས་ནས་དང་བླང་དཔྱ་དངུལ་ལག་དེབ་ལོ་ལྔ་རེའི་མཚམས་སུ་ཕར་འགྱང་ཞུ་དགོས་པ་ལྟར་ཟླ་ ༦ ཚེས་ ༣ ཉིན་རེས་གཟའ་ལྷག་པ་ནས་ཁྱབ་ཁོངས་མི་མང་གི་དང་བླང་དཔྱ་དངུལ་ལག་དེབ་ཕར་འགྱང་འགོ་འཛུགས་དགོས་པ་དང་། གཞན་ཡང་དཔྱ་དངུལ་དུས་ལྟར་ཕུལ་མེད་མཁན་རྣམས་ལ་སྒྲིག་གཞི་དགོངས་དོན་ལྟར་བརྒྱ་ཆ་བཅུ་འབུལ་ཆད་ངེས་པར་བསྡུ་དགོས་ཞེས་ལམ་སྟོན་ཕེབས་པ་ལྟ་སིཌ་ནི་བོད་རིགས་མཐུན་ཚོགས་ཀྱི་རྒྱུན་ལས་རེས་མོས་ཀྱིས་རེས་གཟའ་ལྷག་པ་དང་སྤེན་པ། ཉི་མ་བཅས་ཀྱི་ཕྱི་དྲོ་ཆུ་ཚོད་ ༣།༣༠ ནས་ ༦།༠༠ བར་དང་བླང་དཔྱ་དངུལ་དང་ཚོགས་དངུལ། གཞན་ཡང་ལག་དེབ་ཕ་འགྱང་བཅས་ཞུ་བཞིན་ཡོད་སྐོར་བསྒྲགས་འདུག
གཞན་ཡང་ Blue mountains ཨོ་གླིང་རི་སྔོན་པོ་ཁུལ་དང་སིཌ་ནི་ནུབ་ཕྱོགས་ཁུལ་གཙོ་བོར་ Campbelltown ས་གནས་ཁུལ་དུ་དང་བླངས་དཔྱ་དངུལ་བསྡུ་རུབ་ཚོགས་ཆུང་གསར་འཛུགས་གནང་ཡོད་པ་རེད།
