ཞིབ་དཔྱོད་ཁང་དེས་ཕྱི་ལོ་ ༢༠༡༢ ནས་ ༢༠༡༨ བར་གྷ་ལི་ཌིས་ནིའུ་སའོ་ཐི་ཝལ་མངའ་སྡེའི་ནང་རང་དང་སྒེར་གྱི་འབྲེལ་བ་ཡོད་པའི་ཚོགས་སྡེ་ཁག་ཅིག་ལ་དམིགས་བསལ་ཁེ་ཕན་བསྐྲུན་པའི་ཉེས་འཛུགས་དང་། དེའི་ནང་དམིགས་བསལ་ཕྱི་ལོ་ ༢༠༡༦ དང་ ༢༠༡༧ ནང་ནིའུ་སའོ་ཐི་ཝལ་མངའ་སྡེའི་གྲོང་ཁྱེར་ཝ་དགའ་ཝ་དགའ་ Wagga Wagga ནང་ Clay Target Association ཞེས་པའི་རྩེད་ཐང་འཛུགས་བསྐྲུན་ལས་གཞི་ལ་ཨོ་སྒོར་ས་ཡ་ ༥་༥ དང་། ཕྱི་ལོ་ ༢༠༡༨ ལོར་ཝ་དགའ་ཝ་དགའི་ནང་ Riverina Conservatorium of Music ཞེས་པའི་རོལ་དབྱངས་བསྟི་གནས་དེ་ལ་རོགས་དངུལ་ཨོ་སྒོར་ས་ཡ་ ༢༠ སྤྲད་རྒྱུའི་ཐད་(དེའི་སྐོར་འདི་ལོར་མངའ་སྡེའི་གྲོས་ཚོགས་ཀྱིས་འདྲི་ཞིབ་སྐབས་གསལ་བསྒྲགས་བྱས་ཡོད་པ་རེད་)དེ་གཉིས་དང་འབྲེལ་བ་ཡོད་ཅིང་། རོགས་དངུལ་དེ་གཉིས་ཞུ་མཁན་ནི་དེ་སྔོན་ཝ་དགའ་ཝ་དགའ་ནས་གྲོས་ཚོགས་འཐུས་མི་ཟུར་པ་ཌ་རལ་མཱ་གྷུར་ Daryl Maguire དང་གྷ་ལི་ཌི་གཉིས་དབར་གསང་བའི་འབྲེལ་བ་ཡོད་མེད་གཙོ་འདོན་ཞིབ་འཇུག་བྱེད་བཞིན་ཡོད་འདུག
གསར་འགྱུར་བརྒྱུད་ལམ་ཁག་གི་ནང་ནིའུ་སའོ་ཐི་ཝལ་མངའ་སྡེའི་སྲིད་བློན་ཟུར་པ་ལྕམ་གྷ་ལི་ཌི་དང་། ཝ་དགའ་ཝ་དགའི་གྲོས་ཚོགས་འཐུས་མི་ཟུར་པ་ཌ་རལ་མཱ་གྷུར་གཉིས་དབར་ལོ་ ༥ རིང་དམིགས་བསལ་སྒེར་གྱི་འབྲེལ་བ་ཡོད་སྐོར་དང་། གྷ་ལི་ཌིས་རང་གིས་ཉེ་འབྲེལ་ལ་དམིགས་བསལ་ཁེ་ཕན་བསྐྲུན་པ་ནི་མང་ཚོགས་ཀྱི་ཡིད་ཆེས་བརླག་གཞིའི་ཁྲིམས་འགལ་ལས་དོན་ (Breached Public Trust) ཞིག་ཡིན་སྐོར་བརྗོད་བཞིན་ཡོད་པ་རེད།
འོན་ཀྱང་ལྕམ་གྷ་ལི་ཌིས་གསར་འགོད་གསལ་བསྒྲགས་ཐོག་ངས་ནོར་འཁྲུལ་གང་ཡང་བཟོས་མེད་ཅེས་ ICAC ཞིབ་དཔྱོད་ཁང་གི་ཉེས་འཛུགས་ངོས་ལེན་བྱས་མེད་ཀྱང་། གནས་ཚུལ་དེ་གསལ་པོ་མ་ཆགས་བར་དུ་བདམ་ཁ་གཞན་མེད་པར་སྲིད་བློན་གྱི་ལས་གནས་ནས་དགོངས་ཞུ་བྱ་རྒྱུ་ཡིན་སྐོར་བརྗོད་ཡོད་པ་རེད། སྐབས་དེར་གསར་འགོད་པའི་དྲི་བར་དང་ལེན་གནང་མེད་པ་རེད།
ཁོ་མོ་དགོངས་ཞུ་བྱས་རྗེས་མི་མང་ཁག་ཅིག་གིས་ཁོ་མོ་ནིའུ་སའོ་ཐི་ཝལ་མངའ་སྡེའི་བློན་ཆེན་གྱི་ལས་ཡུན་རིང་། མངའ་སྡེའི་ནང་ཆུ་ལོག་ Floods གི་གནོད་སྐྱོན་དང་། ཤིང་ནག་མེ་སྐྱོན་་Bushfires ཙི་ཙིའི་དམག་འཁྲུག Mice plague ཏོག་དབྱིབས་ན་ཚའི་དཀའ་ངལ་སོགས་དཀའ་ངལ་གཅིག་རྗེས་གཉིས་མཐུད་དུ་བྱུང་ནས་ཁོ་མོ་ནི་ལམ་འགྲོ་མེད་པའི་སྲིད་བློན་ཞིག་ཡིན་སྐོར་དང་། ཡང་མི་མང་མང་པོ་ཞིག་གིས་ཁོ་མོ་ལས་གནས་ལ་བསྐྱར་དུ་ཡོང་དགོས་པའི་རེ་སྐུལ་དང་། ཁོ་མོའི་ལས་ཁུངས་འགྲམ་དུ་མེ་ཏོག་དང་གདུང་སེམས་མཉམ་བསྐྱེད་ཀྱི་ཡི་གེ་བརྒྱ་ཕྲག་མང་པོ་བཞག་ཡོད་པ་རེད།
ཨོ་སི་ཊོ་ལི་ཡའི་སྲིད་བློན་སི་ཀོ་ཊི་མོ་རེ་སོན་མཆོག་གིས་ཕྱོགས་གཞན་ཞིག་ནས་སྐྱོན་བརྗོད་ཡོང་གི་ཡོད་མེད་ལ་བལྟོས་པར་ནིའུ་སའོ་ཐི་ཝལ་མངའ་སྡེའི་སྲིད་བློན་ལྕམ་གྷ་ལི་ཌི་ནི་མི་མང་གི་མངོན་འདོད་གཙོ་བོར་བཟུང་མཁན་དང་། ལས་དོན་ཧུར་ཐག་སྒྲུབ་མཁན་ཞིག རྒྱུན་དུ་མངའ་སྡེའི་ནང་མི་མང་གིས་ཡིད་ཆེས་དང་གདེང་འཇོག་ཆེན་པོ་ཡོད་པ། ཁོ་མོ་ནི་ང་ཡི་ཡིད་ཆེས་ཆེན་པོ་བྱེད་སའི་གྲོགས་མོ་ཞིག་དང་གདེང་འཇོག་ཆེན་པོ་བྱེད་སའི་ལས་གྲོགས་ཤིག་ཡིན་ཞེས་གསུངས་ཡོད་པ་རེད།
ནིའུ་སའོ་ཐི་ཝལ་མངའ་སྡེི་སྲིད་བློན་ཟུར་པ་ལྕམ་གྷ་ལི་ཌི་བྷིར་ཇི་ཁི་ལིམ་ Gladys Berejiklian ནི་ནིའུ་སའོ་ཐི་ཝལ་མངའ་སྡེའི་སྲིད་བློན་སྐབས་ ༤༥ པ་དང་། ཁོ་མོ་ནི་ཨོ་སི་ཊོ་ལི་ཡའི་ Liberal Party ཆབ་སྲིད་ཚོགས་པ་དང་། ༢༠༡༧ ཟླ་ ༡ ཚེས་ ༢༣ ནས་ ༢༠༢༡ ཟླ་ ༡༠ ཚེས་ ༥ བར་སྲིད་བློན་གྱི་ལས་འཁུར་ཞུས་ཡོད་པ་རེད།
དེ་རྗེས་ཕྱི་ཚེས་ ༥ ཉིན་མངའ་སྡེའི་གྲོས་ཚོགས་ཐོག་ནིའུ་སའོ་ཐི་ཝལ་མངའ་སྡེའི་སྲིད་བློན་གཞོན་པ་ཇོན་བྷར་ལོ་ John Barilaro ཡང་ལས་གནས་ནས་དགོངས་ཞུ་བྱས་རྗེས། དངུལ་རྩིས་བློན་ཆེན་ཌོ་མི་ནིང་ཁི་ཕི་རོ་ཊི་ Dominic Perrottet མངའ་སྡེའི་སྲིད་བློན་དང་འཆར་འགོད་བློན་ཆེན་རོབ་སི་ཊོ་ཁིས་ Rob Stokes སྲིད་བློན་གཞོན་པར་འདེམས་ཐོན་བསྐོ་བཞག་བྱས་ཡོད་པ་རེད།
