ངས་འདིར་དེ་སྔོན་གནས་མཁར་གསར་བོད་རིགས་མཐུན་ཚོགས་ཀྱི་ཚོགས་གཙོ་ཟུར་པ་དང་རྩོམ་པ་པོ་བློ་བཟང་ལུང་རྟོགས་ལགས་སུ་༼གནས་མཁར་གསར་༽ས་གནས་ཀྱི་ཐུན་མོངས་མ་ཡིན་པའི་ཁྱད་ཆོས་དང་། ཁུལ་དེར་གནས་སྡོད་བྱེད་མཁན་བོད་མིའི་འཚོ་བ་སོགས་ཀྱི་སྐོར་བཅར་འདྲི་ཞུས་ཡོད།
༡། རྒན་བློ་བཟང་ལུང་རྟོགས་ལགས་ཐོག་མ་དེར་ཁྱེད་རང་གནས་མཁར་གསར་ལ་འབྱོར་ནས་ལོ་ག་ཚོད་ཙམ་འགྲོ་བཞིན་ཡོད་པ་རེད། དེ་དང་ཆབས་ཅིག་ཁྱེད་རང་གི་སྐོར་ངོ་སྤྲོད་ཐུང་ཐུང་ཞིག་གནང་རོགས།
from left; Lobsang Lungtok (former President) Nutatali Nelmes (Mayor of Newcastle) Sharon Claydon (MP) Jane Gray (Rigpa Representative) Source: Lobsang Lungtok
ལན། གུས་པ་ནི་ཕྱི་ལོ་ ༢༠༡༤ ལོར་ས་གནས་འདིར་གནས་སྤོར་བྱས་པ་ཡིན་ལ། ས་གནས་འདིར་གནས་སྤོར་བྱེད་དོན་གཙོ་བོ་ནི་སྐབས་དེར་ཁང་གླ་དང་ཁང་པའི་རིན་གོང་ཆུང་ཆུང་ཡིན་པས་རེད། སྐབས་དེར་ས་གནས་འདིར་བོད་རིགས་ཁྱིམ་ཚང་ལྔ་དྲུག་ཙམ་མ་གཏོགས་མེད་པ་དང་། ཁོང་ཚོའི་རེ་འདོད་བཞིན་ལོ་གཅིག་ལྷག་གི་རིང་ས་གནས་བོད་རིགས་ཚོགས་པའི་དྲུང་ཆེ་བྱས་པ་ཡིན། ཕྱི་ལོ་༢༠༡༥ ལོར་ས་གནས་ཀྱི་ཚོགས་གཙོ་འོས་འདེམས་བྱུང་པ་དང་རིམ་བཞིན་ཨོ་གླིང་རྒྱལ་ཡོངས་བོད་རིགས་སྤྱི་མཐུན་ཚོགས་པའི་ཚོགས་གཙོར་འོས་འདེམས་ཀྱིས་བོད་པའི་སྤྱི་ཚོགས་ལ་ཞབས་ཞུ་སྒྲུབ་རྒྱུའི་སྐལ་བ་བཟང་པོ་བྱུང་།
༢། བོད་མི་ཐོག་མར་གནས་མཁར་གསར་ལ་ག་དུས་གཞིས་ཆགས་པ་རེད། ད་ལྟའི་ཆར་ས་གནས་དེར་གནས་སྡོད་བྱེད་མཁན་བོད་མི་ག་ཚོད་ཙམ་ཞིག་ཡོད་རེད་དམ།
ལན། ས་གནས་འདིར་ཕེབས་མཁན་ཐོག་མ་ནི་འདས་པོ་བསྟན་འཛིན་བློ་གྲོས་ཞུ་བ་ཁོང་ཡིན་ཞིང་། ཁོང་ནི་རྒྱ་གར་རྒྱལ་ཡོངས་ནང་ལྕགས་རྟ་ཞོན་ནས་བོད་དོན་ལས་འགུལ་སྤེལ་མཁན་ཐོག་མའི་གྲས་ཤིག་དང་བོད་མི་རིགས་བསྟན་སྲིད་ཆེད་ལྷག་བསམ་ཟོལ་མེད་གནང་མཁན་གྱི་མི་སྣ་ཞིག་རེད། ཁོང་ནི་ཕལ་ཆེར་ཕྱི་ལོ་ ༢༠༠༡ ལོ་ཙམ་ལ་གནས་འདིར་ཕེབས་ནས་བཟུང་རིམ་བཞིན་ཁྱིམ་ཚང་རེ་ཟུང་གནས་སྤོས་བྱས་པ་བརྒྱུད། ད་ལྟ་ཕྱི་ལོ་ ༢༠༢༡ ནང་ས་གནས་འདིར་བོད་རིགས་ཁྱིམ་ཚང་ ༤༠ ཙམ་དང་མི་གྲངས་ ༡༣༠ ལྷག་ཙམ་ཡོད། ས་གནས་བོད་རིགས་མཐུན་ཚོགས་ནི་ཕྱི་ལོ་ ༢༠༡༡ ལོར་གསར་འཛུགས་ཀྱིས་ས་གནས་གཞུང་ལ་ཁྲིམས་མཐུན་དེབ་སྐྱེལ་བྱས་ཡོད།
༣། གནས་མཁར་གསར་ས་གནས་དེར་ལ་ཁོར་ཡུག་གི་ཁྱད་ཆོས་དང་མཐུན་རྐྱེན་གྱི་ཁྱད་ཆོས་སོགས་གཙོ་བོར་ཁྱད་ཆོས་ག་རེ་ཡོད་པ་རེད་དམ།
ལན། སྤྱིར་བཏང་། ཨོ་གླིང་གི་ས་ཆ་གང་དུ་ཕྱིན་ན་ཡང་འཛུགས་སྐྲུན་སོགས་གང་ཅིའི་ཐད་ཆ་རྐྱེན་ཧ་ཅང་ལེགས་པོ་རེད། འོན་ཀྱང་། གནས་མཁར་གསར་ལ་མཚོན་ན་གནམ་གཤིས་དྲོད་གྲང་སྙོམས་པ་དང་། ཁོར་ཡུག་ཡོད་ཚད་རྒྱ་མཚོ་དང་ཤིང་ནགས་ཀྱིས་བསྐོར་ཡོད་པར་བརྟེན་གྲོང་ཁྱེར་ཆེ་ཁག་ལྟར་ཟིང་ཟིང་གི་འདུ་འཛི་དེ་ཙམ་མེད་ལ། སྲང་ལམ་རྣམས་ལ་རླངས་འཁོར་གྱི་འཚང་ཁ་དང་། བྲེལ་བྲེལ་འཚུབ་འཚུབ་ཀྱི་རྣམ་པ་དེ་ཙམ་མཐོང་རྒྱུ་མེད། དེ་བཞིན་རྒྱལ་སྤྱི་དང་རྒྱལ་ནང་ལ་འཕུར་སའི་གནམ་ཐང་དང་། གཙུག་ལག་སློབ་གྲྭ་ཆེན་མོ་སོགས་དང་། ལྷག་པར་དུ་ཕྲུ་གུ་རྣམས་ལ་ལུས་རྩལ་སྦྱོངས་སའི་གླིང་ཀ་མང་པོ་ཡོད། གཟའ་མཇུག་རྣམས་སུ་གླིང་ཀ་ཁག་གི་ནང་རྐང་རྕེད་སྤོ་ལོའམ། ལག་རྩེད་སྤོ་ལོ། དབྱུག་རྩེད་སྤོ་ལོ་སོགས་ལུས་རྩལ་རྩེད་མཁན་དང་ནང་མི་ཁེངས་པ་ལྟ་བུ་ཡིན།
༤། ས་གནས་དེར་འགྲིམ་འགྲུལ་གྱི་མཐུན་རྐྱེན་དང་ལས་ཀའི་གོ་སྐབས། འགྲོ་སོང་གི་གནས་བབས་གང་འདྲ་འདྲ་ཞིག་ཡོད་པ་རེད་དམ།
ལན། ས་གནས་འདིར་རང་ཉིད་ཀྱིས་རླངས་འཁོར་གཏོང་མ་ཐུབ་ན་སྤྱི་སྤྱོད་རླངས་འཁོར་གྱི་མཐུན་རྐྱེན་དེ་ཙམ་མེད། དེ་ཡང་གཙོ་བོ་སྤྱི་སྤྱོད་རླངས་འཁོར་བེད་སྤྱོད་གཏོང་མཁན་མེད་པས་རེད། འོན་ཀྱང་། གོང་དུ་ཞུས་པ་བཞིན་འདི་ནས་ས་གནས་སིག་ནེ་ལྟ་བུ་དང་གྲོང་ཁྱེར་གཞན་ལ་འགྲོ་དགོས་ན་གནམ་གྲུ་དང་མེ་འཁོར་གྱི་མཐུན་རྐྱེན་ཧ་ཅང་ཡག་པོ་ཡོད། སྤྱིར་བཏང་། ས་ཁུལ་འདི་ (REGIONAL) གྲོང་ཁྱེར་ཆེ་ཁག་མིན་པར་བརྟེན་ས་ཁྲལ་དང་ལམ་ལམ་ཁྲལ་སོགས་ཁྲལ་རིགས་དམའ་བོ་ཡིན་པས་འགྲོ་སོང་ཅུང་དམའ་བོ་ཡིན།
༥། གནས་མཁར་གསར་དང་དེའི་ཉེ་འགྲམ་དུ་གྲགས་ཅན་གྱི་ལྟེ་གནས་དང་། ཡུལ་སྐོར་སྤྲོ་འཆམ་གྱི་ས་ཚིགས་མཛེས་ལྗོངས་བཅས་ག་རེ་ག་རེ་ཡོད་མེད་ངོ་སྤྲོད་ཅིག་གནང་རོགས།
ལན། གནས་མཁར་གསར་ནི་རྒྱ་མཚོ་དང་མཚོ་མོས་སྐོར་བའི་ས་ཁུལ་ཅིག་ཡིན་པའི་མཚོ་ངོགས་ཧ་ཅང་མང་པོ་ཞིག་ཡོད་པ་དང་། ས་གནས་འདིའི་གཡས་གཡོན་ན་ལྟ་སྐོར་བ་ལ་ཧ་ཅང་མང་པོ་ཡོང་སའི་བྱེ་མའི་རི་བོ་དང་། ནེལ་སན་སྦེ་ཟེར་བའི་མཚོ་ངོགས་དང་། གྲུ་གཟིངས་ནང་ཕྱིན་ནས་ཉ་ཆེན་ཝེལ་དང་། ཉ་ཌོ་ཧྥན་བཅས་ལ་བལྟ་ས་བཅས་ཡོད་པར་མ་ཟད། ས་གནས་འདི་ཨོ་གླིང་གི་གནམ་དམག་གི་རྟེན་གཞི་ཆེན་པོ་ཞིག་ཡོད་པའི་གནམ་དམག་གི་སྟོབས་ཤུགས་མཁྱེན་འདོད་པ་རྣམས་ལ་གཟིགས་སྐོར་བྱེད་ས་སོགས་ཀྱང་ཡོད། དེ་ལས་གཞན་ཨོ་གླིང་གི་མི་རྣམས་སྦྲ་གུར་སྤྲོ་གསེང་ལ་འགྲོ་བའི་གོམས་སྲོལ་ཡོད་པ་ལྟར། སྦྲ་གུར་སྤྲོ་གསེང་ལ་འགྲོ་སའི་ས་ཆ་སྐྱིད་པོ་གང་མང་ཡོད། ལྷག་པར་དུ་ཕྱི་ཚོང་དངོས་ཟོག་དབོར་འདྲེན་བྱེད་པའི་གྲུ་གཟིངས་འབབ་ཚུགས་རྙིང་ཤོས་ཤིག་ཡོད་པ་དེར་ལོ་རེ་གྲུ་གཟིངས་ཆེན་པོ་བཞི་སྟོང་ལྷག་ཡར་འགྲོ་མར་ཡོང་བྱེད་ཀྱི་ཡོད།
༦། ས་གནས་དེར་ཡོད་པའི་བོད་མི་ཚོས་ལོ་གསར་གཙོས་པའི་བོད་པ་རང་གི་ཐུན་མོངས་མ་ཡིན་པའི་དུས་ཆེན་ཁག་སྲུང་བརྩི་གང་འདྲ་གནང་གི་ཡོད་དམ།
ལན། བོད་རིགས་ཚོགས་པ་སྤྱི་མཚུངས་ལྟར་ས་གནས་འདིར་བོད་ཀྱི་ལོ་གསར་དང་། གསུམ་བཅུ་དུས་དྲན། ༧གོང་ས་མཆོག་གི་སྐུའི་འཁྲུངས་སྐར། མང་གཙོ་དུས་ཆེན། ཞི་བདེའི་གཟེངས་རྟགས་སོགས་འཆར་ཅན་སྲུང་བརྩི་བྱེད་བཞིན་པ་དང་། ད་དུང་མདའ་རྕེད་དང་། བོད་དོན་ཁྱབ་བསྒྲགས་ཆེད་ས་གནས་ཀྱི་དུས་སྟོན་ཁག་ལ་མཉམ་ཞུགས་གནང་གི་ཡོད། འདུ་འཛོམས་དེ་དག་གི་སྐབས་དབུས་གྲོས་ཚོགས་འཐུས་མི་དང་། གྲོང་ཁྱེར་སྤྱི་ཁྱབ་པ། ཚོགས་པ་ཁག་གི་དབུ་ལས་རྣམས་གདན་ཞུ་དང་། ས་གནས་ཀྱི་མི་མང་བཅས་ལ་བོད་ཀྱི་གནས་སྟངས་དང་ཐུན་མོང་མ་ཡིན་པའི་རིག་གཞུང་ངོ་སྤྲོད་བྱེད་ཀྱི་ཡོད།
༧། ས་གནས་དེའི་བོད་མི་ཚོས་བོད་ཀྱི་སྐད་ཡིག་རིག་གཞུང་ལ་དོ་སྣང་གང་འདྲ་གནང་གི་ཡོད་མེད་ངོ་སྤྲོད་ཅིག་གནང་རོགས།
ལན། བོད་རིགས་མཐུན་ཚོགས་འཛུགས་པའི་དམིགས་ཡུལ་གལ་ཆེན་པོ་གཉིས་ཡོད་པ་ལས། གཅིག་ནི་རང་དབང་མེད་པའི་བོད་མི་མང་གི་སྐུ་ཚབ་གནང་ཏེ་བོད་དོན་ཁྱབ་བསྒྲགས་བྱེད་རྒྱུ་དང་། གཉིས་པ་བོད་ཀྱི་ཆོས་དང་རིག་གཞུང་སྲུང་སྐྱོབ་བྱེད་རྒྱུ་དེ་ཡིན་པ་གཞིར་བཟུང་། ས་གནས་འདིར་སྔོན་ཆད་ནས་བོད་རིགས་ཚོགས་པའི་སློབ་གྲྭ་ཞིག་ཡོད་པ་དེ་བཞིན་ད་ལྟ་འཛིན་སྐྱོང་དང་སློབ་མའི་གྲངས་འབོར་སོགས་གང་ཅིའི་ཐད་ཡར་རྒྱས་ལ་སོང་ཡོད་པ་དང་། དེའི་སྐོར་ལ་གསར་ཁང་ནས་དམིགས་བསལ་གྱི་ལེ་ཚན་ཞིག་བཟོས་ཏེ་འབྲེལ་ཡོད་རྣམས་པར་བཀའ་འདྲི་གནང་ན་ལེགས་པར་འདོད།
ལགས་སོ་རྒན་བློ་བཟང་ལུང་རྟོགས་ལགས་དུས་ཚོད་བཏོན་ནས་བཅར་འདྲིར་ལན་འདེབས་ཞིབ་ཕྲ་གནང་བར་ཐུགས་རྗེ་ཆེ་ཞུ།
