ཕྱི་ལོ་ ༢༠༡༩ ཟླ་ ༡༢ པའི་ནང་ཏོག་དབྱིབས་ན་ཚ་ཆེས་ཐོག་མར་རྒྱ་ནག་ཝུ་ཧན་ནང་འགོས་ཁྱབ་ཤེས་རྟོགས་བྱུང་བ་ནས་བཟུང་། རིམ་བཞིན་འཛམ་གླིང་ཁྱོན་ལ་ན་ཚ་འགོས་ཁྱབ་ཕྱིན་ཡོད་པ་དང་། ཨོ་སི་ཊོ་ལི་ཡའི་ནང་ཕྱི་ལོ་ ༢༠༢༠ ཟླ་ ༡ ཚེས་ ༢༥ ཉིན་ཆེས་ཐོག་མའི་ཏོག་དབྱིབས་ནད་པ་ངོས་འཛིན་དང་རིམ་བཞིན་ཕྱི་ཟླ་ ༦ པ་བར་འཛམ་གླིང་གི་ལུང་པ་གཞན་ཁག་དང་བསྡུར་ན་ཏོག་དབྱིབས་ནད་པ་གསར་པའི་གྲངས་འབོར་དེ་ཙམ་མཐོ་པོ་མིན།
འོན་ཀྱང་འདི་ལོ་ཕྱི་ཟླ་ ༧ པ་ནས་བཟུང་དུས་ཡུན་ཟླ་བ་ ༣ ཙམ་གྱི་རིང་ཨོ་སི་ཊོ་ལི་ཡའི་ཝི་ཊོ་རི་ཡ་མངའ་སྡེའི་གཅིག་པུའི་ནང་གློ་བུར་ཏོག་དབྱིབས་ནད་པ་གསར་པའི་གྲངས་འབོར་ངེས་ཅན་ཞིག་འཕར་ཏེ། མངའ་སྡེའི་ནང་ཁྱིམ་སྡོད་བཀའ་རྒྱ་སོགས་ཝི་ཊོ་རོ་ཡ་མི་མང་གི་འགྲོ་བསྐྱོད་སོགས་ལ་དམ་བསྒྲགས་ཤུགས་ཆེ་བྱེད་དགོས་བྱུང་བ་མ་ཟད། ཨོ་སི་ཊོ་ལི་ཡའི་མངའ་སྡེ་གཞན་ཁག་གིས་ཀྱང་ཝོ་ཊི་རོ་ཡ་དང་འགྲོ་འོངས་ཡོངས་སུ་བཀག་བསྡོམས་དང་ས་མཚམས་ཁག་སྒོ་བརྒྱབ་ཡོད།
སྟབས་ལེགས་པ་ཞིག་ལ་ཉེ་ཆར་ཕྱི་ཟླ་ ༡༠ ཚེས་ ༣༠ ནས་བཟུང་ད་བར་ཝི་ཊོ་རི་ཡའི་ནང་ནད་པ་གསར་པ་རྐང་གཅིག་ཐོན་མེད་པར་བརྟེན། མངའ་སྡེའི་ནང་དམ་བསྒྲགས་ཁག་རིམ་བཞིན་ལྷོད་དུ་བཏང་ཡོད་པ་དང་། ད་ལྟའི་ཆར་མི་མང་རྣམས་རང་ཁྱིམ་ནས་འགྲོ་བསྐྱོད་བཀག་འགོག་མེད་པས་མ་ཚད། ཁང་པའི་ནང་ལོགས་སུ་མི་གྲངས་ ༥༠ མན་འདུ་འཛོམས་བྱེད་ཆོག ཁྱིམ་ཚང་མི་འདྲ་བ་ནས་ཁྱོན་མི་གྲངས་ ༡༥ ཕན་ཚུན་འགྲོ་འོངས་བྱེད་ཆོག
ཡེ་ཤུའི་འཁྲུངས་སྐར་དུས་ཆེན་གཏོང་ཕྱོགས་སྐོར་སྒྲིག་གཞི་ཕྱི་ཟླ་ ༡༢ པའི་ཚེས་ ༤ ནས་གསལ་བསྒྲགས་བྱ་རྒྱུ་དང་། དེ་ཡང་དུས་ཆེན་སྐབས་ཁྱོན་མི་གྲངས་ ༣༠ ནང་མི་ཕན་ཚུན་དབར་འགྲོ་འོངས་བྱེད་ཆོག་ཅིང་ འཚིག་ཇ་ཁང་དང་། ཟ་ཁང་། ཆང་ཁང་བཅས་ཁྱོན་མི་གྲངས་ ༣༠༠ མན་ལ་ཞབས་ཞུ་སྒྲུབ་ཆོག་གི་ཡོད། ཁང་པའི་ཕྱི་རོལ་གྱི་རྩེད་རིགས། ཆུ་རྐྱལ་དང་། ལུས་སྦྱོང་བཅས་ཁྱོན་མི་གྲངས་ ༡༥༠ མན་ཞབས་ཞུ་བྱེད་ཆོག་གི་ཡོད་ཅིང་། ཁང་པའི་ཕྱི་རོལ་དུ་ཁྱོན་མི་གྲངས་ ༥༠༠ འདུ་འཛོམས་བྱེད་ཆོག
དེར་བརྟེན་ཉེ་ཆར་ཕྱི་ཚེས་ ༢༢ རེས་གཟའ་ཉི་མའི་ཝི་ཊོ་རི་ཡ་མངའ་སྡེའི་བློན་ཆེན་སྐུ་ཞབས་ཌེ་ནལ་ཨན་ཌོར་སི་ Daniel Andrews མཆོག་གིས་”དགུན་ཁ་དེ་དུས་ཡུན་རིང་པོ་ཞིག་དང་དཀའ་ཚེགས་ཅན་ཞིག་བྱུང་ཡང་། ད་ཆ་ཉི་མའི་དྲོ་སྐྱིད་ལ་རོལ་རྒྱུའི་དུས་ཚོད་ཡིན་”ཞེས་པའི་བསྒྲགས་གཏམ་ཞིག་སྤེལ་འདུག
བསྒྲགས་གཏམ་དེའི་ནང་ཁོང་གིས་”ཟླ་བ་གསུམ་གྱི་གོང་ལ་ཝོ་ཊི་རོ་ཡའི་ནང་ཏོག་དབྱིབས་ནད་པ་ ༤༢༩༣ ཡོད་ཀྱང་དེ་རིང་ནད་པ་གཅིག་ལས་མེད། འདི་ནི་བློ་ཡུལ་ལས་འདས་པའི་གྲུབ་འབྲས་ཤིག་ཡིན། འདིས་ང་ཚོས་ཏོག་དབྱིབས་ན་ཚ་སྟངས་འཛིན་ཐུབ་ཀྱི་ཡོད་པ་སྟོན་པ་ཙམ་མ་ཡིན་པར། རྩ་མེད་གཏོང་རྒྱུའི་ཆོད་སེམས་དེ་མངོན་གྱི་ཡོད།
དེ་སྔོན་ང་ཚོས་ཡེ་ཤུའི་འཁྲུངས་སྐར་དེ་བཞིན་ཏོག་ཙམ་རྒྱུན་ལྡན་ལྟར་རོལ་ཐུབ་རྒྱུའི་དམིགས་ཡུལ་བཟུང་ཡོད་པ་དང་། ཝི་ཊོ་རི་ཡ་མི་མང་ཚང་མའི་འབད་བརྩོན་ལ་བརྟེན་ནས་ད་ཆ་ང་ཚོའི་དམིགས་ཡུལ་དང་རེ་བ་དེ་བཞིན་སྒྲུབ་ཐུབ་པ་བྱུང་ཡོད།” ཅེས་གསུངས་འདུག
ཡང་ཁོང་གིས་” འབྱུང་འགྱུར་གྱི་བདུན་ཕྲག་ཁ་ཤས་ནང་(དཔྱིད་ཀའི་ཏོག་དབྱིབས་སྔོན་འགོག་བདེ་འཇགས་)ཇི་ལྟར་ཆགས་མིན་ནི། མི་མང་ཚོས་འཕྲོད་བསྟེན་ཆེད་མཁས་མི་སྣའི་གང་བཤད་པ་ལྟར་གནས་མིན་དེ་ཆགས་ཡོད།
དེ་ལྟར་ནའང་ང་ཝི་ཊོ་རི་ཡ་མི་མང་རྣམས་ལ་ཐུགས་རྗེ་ཆེ་ཞུ་རྒྱུ་ཡིན། ད་ལྟ་གནས་སྟངས་འདི་འདྲ་ཞིག་ལ་སླེབས་པ་དེ་གདེང་ཚོད་ཡོད་པ་ཞིག་མིན་ཡང་། གཙོ་བོར་ཁྱེད་རང་གིས་འབད་བརྩོན་དང་ང་ཚོའི་འབད་བརྩོན་ལ་བརྟེན་ནས་བྱུང་བ་རེད།
དགུན་ཁ་དེ་དུས་ཡུན་རིང་པོ་དང་གནས་སྟངས་ཁག་པོ་ཞིག་བྱུང་ཡང་། ད་ཆ་ཉི་མའི་དྲོ་སྐྱིད་ལོངས་སུ་སྤྱོད་རྒྱུའི་དུས་ཚོད་དེ་རེད་”ཅེས་གསུངས་འདུག
ཡང་ཉེ་ཆར་ཨོ་སི་ཊོ་ལི་ཡའི་ལྷོ་ཕྱོགས་མངའ་སྡེའི་ནང་ནད་པ་གསར་པ་ཁག་ཅིག་ཐོན་པར་བརྟེན། དུས་ཡུན་ཉིན་གྲངས་ ༦ རིང་ཁྱིམ་སྡོད་བཀའ་རྒྱ་ཕབ་དགོས་བྱུང་ཡོད་པ་རེད། ཡང་ཨོ་སི་ཊོ་ལི་ཡ་ལྷོ་ཕྱོགས་མངའ་སྡེས་ཕྱི་ཟླ་ ༡༢ ཚེས་ ༡ རེས་གཟའ་ཕུར་བུ་ཉིན་ནས་ཝི་ཊོ་རི་ཡའི་ས་མཚམས་སྒོ་ཕྱེ་རྒྱུ་དང་། ཝི་ཊོ་རི་ཡ་མངའ་སྡེ་ནས་ཨོ་སི་ཊོ་ལི་ཡ་ལྷོ་ཕྱོགས་མངའ་སྡེའི་ནང་འགྲོ་འོངས་བྱེད་མཁན་རྣམས་དུས་ཡུན་ཉིན་གྲངས་་ ༡༤ རིང་གི་ཟུར་བཀག་དུ་སྡོད་དགོས་ཀྱི་མེད་པ་རེད།
ནེའུ་སོ་ཐི་ཝལ་མངའ་སྡེས་ཝི་ཊོ་རི་ཡ་མངའ་སྡེ་དང་ས་མཚམས་བསྐྱར་དུ་སྒོ་ཕྱེས་ཡོད།
ད་བར་ཨོ་སི་ཊོ་ལི་ཡའི་ནང་ཏོག་དབྱིབས་ནད་པ་གྲངས་ ༢༧༨༤༨ བྱུང་ཡོད་པ་དང་། དེའི་ནང་ནད་པ་གྲངས་ ༢༥༣༥༠ དྲག་བསྐྱེད་དང་། མི་གྲངས་ ༩༠༧ འདས་གྲོངས་སུ་ཕྱིན་ཡོད་པ་རེད།
དུས་ཡུན་ཆུ་ཚོད་ ༢༤ ནང་ཨོ་སི་ཊོ་ལི་ཡ་ཁྱོན་དུ་ནད་པ་གསར་པ་གྲངས་ ༡༣ བྱུང་འདུག་པ་དེའི་ནང་ནེའུ་སོ་ཐི་ཝལ་མངའ་སྡེ་ནས་ནད་པ་གྲངས་གསར་པ་གྲངས་ ༦ དང་། ཁུན་སི་ལན་ཌི་ནས་ ༡ དེ་བཞིན་ཨོ་སི་ཊོ་ལི་ཡ་ནུབ་ཕྱོགས་མངའ་སྡེ་ནས་ནད་པ་གསར་པ་ ༤ བཅས་ཐོན་ཡོད་པ་རེད།
འདས་པའི་དུས་ཡུན་ཆུ་ཚོད་ ༢༤ ནང་ཁྱོན་མི་གྲངས་ ༣༤༩༦༠ ལ་ཏོག་དབྱིབས་ན་ཚ་འགོས་ཡོད་མེད་བརྟག་དཔྱད་དང་། འདས་པའི་བདུན་ཕྲག་གཅིག་གི་ནང་ས་གནས་ནས་ནད་པ་གསར་པ་གྲངས་ ༡༠ དང་། རྒྱལ་ཁབ་གཞན་ནས་ཡོང་མཁན་ནང་ནད་པ་གསར་པ་གྲངས་ ༨༢ ཐོན་ཡོད་འདུག
ད་ལྟ་ཆར་ཨོ་སི་ཊོ་ལི་ཡའི་ནང་ཏོག་དབྱིབས་ནད་ཚས་མནར་བཞིན་པའི་མི་གྲངས་ ༡༤༠༩ དང་དེ་ཡང་མི་གྲངས་ ༢༡ སྨན་ཁང་ནང་ལྷག་ཡོད་འདུག
