ཨོ་སི་ཊོ་ལི་ཡ་གཞུང་གིས། སྤྱི་དམངས་འགྲིམ་འགྲུལ་ཞབས་ཞུ་སྡེ་ཚན་ཁག་གིས་མངའ་སྡེ་དང་ས་ཁུལ་སོ་སོར་རྒྱལ་ཡོངས་བློན་ཆེན་ལྷན་ཚོགས་ཀྱིས་ལམ་སྟོན་ལྟར། ལས་བྱེད་དང་མི་མང་གི་འཕྲོད་བསྟེན་བདེ་འཇགས་སྐོར་གྱི་རྩ་འཛིན་ལམ་སྟོན་དེ་བཞིན་ལག་བསྟར་གནང་དགོས་སྐོར་གསུངས་འདུག
དེ་བཞིན་མི་མང་རྣམས་ཀྱིས་ཛ་དྲག་ཡིན་ན་མ་གཏོགས་བདེ་ཐང་མིན་པའི་སྐབས་འགྲུལ་བཞུད་བྱ་རྒྱུ་མེད་པ་དང་། རི་ལི་དང་སྤྱི་བསྐྱོད་རླངས་འཁོར་སོགས་སུ་འགྲུལ་བཞུད་སྐབས་ཁ་ལོ་བ་དང་འགྲུལ་པ་གཞན་ལས་རྒྱང་བཀྱེད་ཀྱི་སྒྲིག་གཞི་མུ་མཐུད་ལག་བསྟར་གནང་དགོས་སྐོར་གསུངས་འདུག
འགྲུལ་པ་རྣམས་དབུག་འབྱིན་རྔུབ་དཀའ་བ་དང་ཚ་བ་འཕར་བ་སོགས་ཏོག་དབྱིབས་ནད་དུག་འགོས་ཡོད་པའི་ནད་རྟགས་ལྟར་བུ་ཐོན་ཚེ་སྤྱི་བསྐྱོད་འགྲིམ་འགྲུལ་ཁག་ནང་འགྲོ་མི་རུང་བ་ངེས་པར་དུ་སྒེར་གྱི་རླངས་འཁོར་ནང་འགྲོ་ནས་སྨན་བཅོས་བརྟག་དཔྱད་གནང་ཐབས་བྱེད་དགོས། གལ་སྲིད་ཛ་དྲག་ཡིན་ཚེ་ཛ་དྲག་འབྲེལ་གཏུགས་ཁ་པར་འབྲེལ་བ་བྱེད་དགོས།
གཞན་ཡང་སྤྱི་བསྐྱོད་འགྲིམ་འགྲུལ་སྐབས་ཤོག་དངུལ་སྤྲོད་ལེན་བྱ་རྒྱུ་མེད་པ་དང་། (ཤོག་དངུལ་ལས་ཏོག་དབྱིབས་ན་ཚ་འགོས་སྲིད་པའི་འགྲེལ་བརྗོད་གནང་གི་ཡོད་) མི་མང་འགྲིམ་འགྲུལ་བ་རྣམས་ཁ་རས་གྱོན་དགོས་པའི་གཏན་འབེབས་བྱས་མེད་ཀྱང་རང་ངོས་ནས་མ་སྐུལ་དང་བླངས་ཐོག་ཁ་རས་གྱོན་ན་དགེ་མཚན་ཡོད་སྐོར་འགྲེལ་བརྗོད་གནང་འདུག
གློ་རྒྱག་པ་དང་སྣ་ཆུ་འཛག་དུས་ལག་པ་གཙང་བ་བཀྲུ་དགོས་པ་དང་། འགྲུལ་བཞུད་སྐབས་རང་ཉིད་ཀྱི་དུག་སེལ་ཆུ་དང་དུག་སེལ་ལག་འཕྱིས་མཉམ་དུ་འཁྱེར་རྒྱུ་གལ་ཆེན་ཡིན་སྐོར་ལམ་སྟོན་གནང་འདུག
ཞབས་ཞུ་སྡེ་ཚན་ཁག་གིས་ལྟེ་གནས་ཁག་དང་། འབབ་ཚུགས་ཁག རླངས་འཁོར་ནང་ངོས་བཅས་ལ་འགྲུལ་པ་རྣམས་ཀྱིས་སྤྱི་བསྐྱོད་རླངས་འཁོར་སོགས་འགྲིམ་འགྲུལ་ནང་མ་འགྲོ་སྔོན་དང་། འགྲོ་བའི་སྐབས། དེ་རྗེས་མར་བབས་ཚར་དུས་བཅས་ལ་གཙང་སྦྲ་འཕྲོད་བསྟེན་གང་ལེགས་གནང་དགོས་པའི་རེ་སྐུལ་སྦྱར་ཡིག་སྦྱར་དགོས།
ཨོ་སི་ཊོ་ལི་ཡའི་ངལ་རྩོལ་བདེ་འཇགས་དང་འཕྲོད་བསྟེན་ལྷན་ཁང་གི་ལམ་སྟོན་གནང་བ་ལྟར་མི་མང་ཚོས་རྒྱུན་དུ་ལག་པ་ཡང་ཡང་འཆང་ས་དང་། གསང་སྤྱོད་སོགས་སུ་གཙང་བཟོ་གཙང་ཉར་བྱེད་དགོས་པ། དཔེར་ན། གསང་སྤྱོད་སོགས་སུ་དུག་སེལ་ཆུའི་མཐུན་རྐྱེན་ཡོད་པ་བྱེད་དགོས་པ་སོགས་ལམ་སྟོན་གནང་འདུག
ཏོག་དབྱིབས་ནད་དུག་སྐབས་སྤྱི་དམངས་འགྲིམ་འགྲུལ་རྩ་འཛིན་ལམ་སྟོན་སྐོར་ཞིབ་ཕྲ་གནས་ཚུལ་དྲ་ཐག་འདི་ནས་གཟིགས་རོགས། https://www.infrastructure.gov.au/transport/files/COVID19_public_transport_principles_29052020.pdf
