དེ་རིང་ཞོགས་པ་ནེའུ་སོ་ཐི་ཝལ་མངའ་སྡེའི་སྤྱི་ཁྱབ་བློན་ཆེན་ལྕམ་གྷ་ལི་ཌི་མཆོག་གིས་འཆར་ཅན་གྱི་གསར་འགོད་ལྷན་ཚོགས་སྐབས། ཁ་སང་ཕྱི་ཚེས་ ༢༤ ཉིན་ནེའུ་སོ་ཐི་ཝལ་མངའ་སྡེའི་ནང་ཏོག་དབྱིབས་ནད་པ་གསར་པ་ ༩༡༩ ཐོན་ཡོད་སྐོར་གསལ་བསྒྲགས་དང་། གྲངས་འབོར་དེ་ནི་ད་ལྟའི་ཆར་མངའ་སྡེའི་ནང་ཉིན་གཅིག་གི་རིང་ཏོག་དབྱིབས་ནད་པ་གསར་པ་ཐོན་པའི་གྲངས་འབོར་མཐོ་ཤོས་དེ་ཆགས་ཡོད་པ་རེད།
ཡང་ཁོ་མོས་ཁ་སང་ཉིན་གཅིག་ནང་ནིའུ་སོ་ཐི་ཝལ་མངའ་སྡེའི་ནང་ཁྱོན་མི་གྲངས་ ༡༢༥༠༠༠ ལྷག་ལ་འགོག་ཁབ་བརྒྱབ་ཡོད་པ་དང་། ད་བར་མངའ་སྡེའི་ནང་ཁྱོན་མི་གྲངས་ས་ཡ་ ༦་༡ ལ་ཏོག་དབྱིབས་འགོག་ཁབ་ཐེངས་རེ་བརྒྱབ་ཡོད་པས་མ་ཚད། ཧ་ལམ་མི་འབོར་སུམ་ཆ་གཅིག་ལས་ཉེར་བར་ཏོག་དབྱིབས་འགོག་ཁབ་ཆ་ཚང་བརྒྱབ་ཚར་ཡོད་སྐོར་འགྲེལ་བརྗོད་གནང་སོང་། ཕྱི་ལོ་ ༢༠༢༠ ལོའི་མི་འབོར་ཞིབ་བཤེར་ལྟར་ན་ནེའུ་སོ་ཐི་ཝལ་མངའ་སྡེའི་ནང་ཁྱོན་མི་གྲངས་ས་ཡ་ ༨་༠༡༡༥༠ ཙམ་ཡོད་པ་རེད།
མངའ་སྡེ་བློན་ཆེན་མཆོག་གིས་ཁྱེད་རང་དང་། ཁྱེད་རང་གི་ནང་མི། དགའ་ས་ཉེ་ས་རྣམས་ཀྱི་ཆེད་ངེས་པར་དུ་ཏོག་དབྱིབས་འགོག་ཁབ་རྒྱག་རོགས་ཞེས་རེ་སྐུལ་དང་། ཆེད་མཁས་སྨན་པ་ཌོར་ཊ་ཆན་ལགས་ཀྱིས་འགྲེལ་བརྗོད་གནང་བར་ལྟར་ན། ཁྱེད་རང་ལ་ཏོག་དབྱིབས་འགོག་ཁབ་རག་ཡོད་ཀྱང་སྨན་གྱི་ནུས་པ་ཐོན་པར་བདུན་ཕྲག་གསུམ་བཞི་ཙམ་འགོར་གྱི་ཡོད་པ་རེད་ཅེས་འགྲེལ་བརྗོད་གནང་སོང་།
དེ་རིང་ཕྱི་ཚེས་ ༢༥ ཉིན་ཨོ་སི་ཊོ་ལི་ཡའི་ནང་ཁྱོན་ཏོག་དབྱིབས་ནད་པ་གསར་པ་ ༨༡༦ ཐོན་ཡོད་པའི་ནང་། ནེའུ་སོ་ཐི་ཝལ་མངའ་སྡེའི་ནང་ས་གནས་སུ་ནད་པ་གསར་པ་ ༧༥༣ དང་ལུང་པ་གཞན་ནས་འབྱོར་བའི་མི་ ༢ ཝི་ཊོ་རི་ཡ་མངའ་སྡེའི་ནང་ས་གནས་སུ་ནད་པ་གསར་པ་ ༣༥ དང་ལུང་པ་གཞན་ནས་འབྱོར་བའི་ནད་པ་ ༡ བཅས་ཡིན་པ་རེད།
Source: health.gov.au
ད་ལྟའི་ཆར་ཨོ་སི་ཊོ་ལི་ཡའི་ནང་ཁྱོན་མི་གྲངས་ས་ཡ་ ༡༡་༢ ལྷག་ཙམ་ལ་ཏོག་དབྱིབས་འགོག་ཁབ་རག་ཡོད་པ་དང་། དེས་ཨོ་སི་ཊོ་ལི་ཡའི་ལོ་ན་ ༡༦ ཡན་གྱི་སྤྱིའི་མི་འབོར་གྱི་བརྒྱ་ཆ་ ༥༤་༤ ཟིན་གྱི་ཡོད། དེའི་ནང་ཁྱོན་མི་གྲངས་ས་ཡ་ ༦་༥ ལྷག་ཙམ་ལ་ཏོག་དབྱིབས་འགོག་ཁབ་ཐེངས་གཉིས་ཀ་རག་ཚར་ཡོད་པས། དེས་རྒྱལ་ཡོངས་སུ་ལོ་ན་ ༡༦ ཡན་གྱི་སྤྱིའི་མི་འབོར་གྱི་བརྒྱ་ཆ་ ༣༡་༦ ཟིན་གྱི་ཡོད། ཨོ་སི་ཊོ་ལི་ཡའི་ནང་ད་ལྟའི་ཆར་ཁྱོན་མི་གྲངས་ས་ཡ་ ༢༥་༧༩ ཙམ་ཡོད་པ་རེད།
ཕྱི་ཟླ་ ༨ ཚེས་ ༢༤ བར་རྒྱལ་ཡོངས་སུ་ཁྱོན་སྨན་ཁབ་གྲངས་ ༡༧་༧༤༧་༧༨༧ ལ་འགོག་ཁབ་བརྒྱབ་ཚར་ཡོད་པ་དང་། འདས་པའི་དུས་ཡུན་ཆུ་ཚོད་ ༢༤ ནང་སྨན་ཁབ་གྲངས་ ༣༠༧་༡༩༡ བརྒྱབ་ཡོད་འདུག
ཨོ་སི་ཊོ་ལི་ཡ་གཞུང་གིས་འདི་ལོ་ཕྱི་ཟླ་ ༡༢ པའི་ཟླ་མཇུག་ཏུ་རྒྱལ་ཡོངས་ནང་ཏོག་དབྱིབས་འགོག་ཁབ་རག་འོས་ཅན་གྱི་མི་གྲངས་བརྒྱ་ཆ་ ༨༠ ཐམ་པ་ཆ་ཚང་ལ་འགོག་ཁབ་ཡོངས་སུ་རྒྱག་ཚར་བ་བྱ་རྒྱུའི་དམིགས་ཚད་བཟུང་ཡོད། གཞན་མི་འབོར་གྱི་བརྒྱ་ཆ་ ༢༠ ཙམ་ནི་ལོ་ན་མ་ལོན་པ་དང་། བུད་མེད་སྦྲུམ་མ། དམིགས་བསལ་ན་ཚའི་རྐྱེན་པས་འགོག་ཁབ་རྒྱག་མི་རུང་བ་རྣམས་ཚུད་ཀྱི་ཡོད་པ་རེད།
ཉེ་ཆར་ནིའུ་སོ་ཐི་ཝལ་མངའ་སྡེའི་སྤྱི་ཁྱབ་བློན་ཆེན་ལྕམ་གྷ་ལི་ཌི་མཆོག་གིས་ད་ལྟའི་ཆར་ཏོག་དབྱིབས་ནད་པ་གསར་པའི་གྲངས་འབོར་འཕར་བཞིན་ཡོད་ཀྱང་། དེ་ལ་ངས་དམིགས་བསལ་སེམས་ཁྲལ་བྱེད་ཀྱིན་མེད་པར་གཙོ་བོར་ད་དུང་ཉིན་ལྟར་མི་གང་མང་ཞིག་ཏོག་དབྱིབས་འགོག་ཁབ་རྒྱག་པར་ཕེབས་དགོས་པའི་འབོད་སྐུལ་གནང་སོང་བ་དང་། ཁོ་མོས་གལ་སྲིད་ང་ཚོས་མངའ་སྡེའི་ནང་ཁྱོན་མི་གྲངས་བརྒྱ་ཆ་ ༧༠ དང་ ༨༠ ཙམ་ལ་ཏོག་དབྱིབས་འགོག་ཁབ་ཆ་ཚང་རྒྱག་ཐུབ་པ་བྱུང་ཚེ་གནས་སྟངས་ད་ལྟ་ལས་ཡག་བ་གུ་ཡངས་སུ་འགྲོ་རྒྱུ་རེད་ཅེས་གསུངས་སོང་།
མ་ཚད་དེ་སྔོན་ཨོ་སི་ཊོ་ལི་ཡའི་སྲིད་བློན་སི་ཀོ་ཊི་མོ་རེ་སོན་མཆོག་གིས་གལ་སྲིད་ང་ཚོས་ཁྱོན་མི་གྲངས་བརྒྱ་ཆ་ ༧༠ ཙམ་ལ་ཏོག་དབྱིབས་འགོག་ཁབ་ཆ་ཚང་རྒྱག་ཐུབ་པ་བྱུང་ཚེ། ཏོག་དབྱིབས་ལས་རིམ་གྱི་གོམ་སྟབས་བཞི་པ་སྤོ་ཐུབ་རྒྱུ་ཡིན་སྐོར་དང་། སྐབས་དེར་རྒྱལ་ཡོངས་སུ་ཏོག་དབྱིབས་ཀྱིས་རྐྱེན་པས་དམ་བསྒྲགས་ཁག་ལྷོད་དུ་གཏང་ཐུབ་རྒྱུ་ཡིན་སྐོར་འགྲེལ་བརྗོད་གནང་ཡོད་པ་རེད།
