ཁེམ་བྷེལ་ཊོན་ Campbelltown ནི་ཨོ་སི་ཊོ་ལི་ཡའི་གྲོང་ཁྱེར་གྲགས་ཅན་སིཌ་ནི་ Sydney ནས་ལྷོ་ནུབ་མཚམས་སུ་བར་ཐག་སྤྱི་ལེ་ ༥༠ ཙམ་གྱི་སར་ཡོད་པའི་གྲོང་ཁྱེར་ཆུང་ཆུང་ཞིག་ཡིན། སིཌ་ནི་གྲོང་ཁྱེར་བར་རྒྱུན་དུ་དུས་ཡུན་སྐར་མ་ ༡༥ ཙམ་རེའི་མཚམས་སུ་མེ་འཁོར་འགྲོ་བསྐྱོད་ཡོད་པ་དང་སིཌ་ནི་གནམ་ཐང་བར་དུ་སྤྱི་ལེ་ ༤༠ ལྷག་ཡོད། སིཌ་ནི་གནམ་ཐང་བར་མེ་འཁོར་ནས་ཀྱང་འགྲོ་བསྐྱོད་བྱེད་ཆོག་ལ། ཐག་ཉེ་བའི་རྒྱ་མཚོ་འགྲམ་དུ་འགྲོ་བར་དུས་ཡུན་ཆུ་ཚོད་ཕྱེད་ཀ་ཙམ་ལས་མི་འགོར།
ས་གནས་འདིར་སྤྱི་ཡོངས་དྲོད་གྲང་སྙོམ་པོ་ཡོད་པའི་མ་ཚད། མཁའ་རླུང་གཙང་མ་དང་། ས་ཆ་གུ་ཡངས་མོ། འགྲོ་བསྐྱོད་ཧ་ཅང་སྟབས་བདེ་ཡིན། ཨོ་སི་ཊོ་ལི་ཡའི་གྲོང་ཁྱེར་སིཌ་ནི་ཁུལ་དུ་ས་གནས་གཞན་དང་བསྡུར་ན་ཁང་གླ་ཁེ་ཤོས་དང་ཁང་རིན་ཆུང་ཤོས་གྲས་ཡིན། ས་གནས་གཞན་ལྟར་མེ་དང་ཆུ་ལོག་སོགས་གོད་ཆགས་ཀྱི་ཉེན་ཁ་དེ་ཙམ་མེད།
Queen street Campbelltown Source: SBS Tibetan
ཕྱི་ལོ་ ༡༨༠༠ ཙམ་གྱི་ནང་དབྱིན་ཇིས་དབང་སྒྱུར་སྐབས་ས་གནས་འདི་ཁུལ་ནི་ལུག་གསོ་ཚགས་བྱེད་ས་གཞི་རྒྱ་ཆེ་ཤོས་ཤིག་ཡིན་འདུག ད་ལྟའི་ཆར་ཡང་ཡར་མར་འགྲུལ་བཞུད་སྐབས་ས་ཆ་འདིའི་ཉེ་འགྲམ་སྤྱི་ལེ་བརྒྱད་དགུ་ཙམ་གྱི་མཚམས་སུ་འབྲོག་པའི་རྟ་དང་ནོར་ལུག་སྟོང་ཕྲག་མང་པོ་མཐོང་རྒྱུ་འདུག
གཞན་ཡང་ས་གནས་འདི་ལ་སློབ་གྲྭ་དང་། སྨན་ཁང་། ཚོང་ཁང་། སྦྱོང་བརྡར་ལྟེ་གནས་སོགས་སྤྱི་ཚོགས་ཞབས་ཞུའི་སྡེ་ཚན་ཆེ་ཆུང་སྣ་ཚོགས་འཐུས་སྒོ་ཚང་པོ་ཡོད་པའི་མ་ཚད། དེ་ཚོར་བསྐྱོད་པར་འགྲིམ་འགྲུལ་ཐག་ཉེ་དང་ཧ་ཅང་སྟབས་བདེ་ཡོད།
ལོ་ངོ་བཞི་ལྔ་ཙམ་གྱི་གོང་དུ་ས་གནས་འདིར་བོད་མིའི་ཁྱིམ་ཚང་ཁ་ཤས་ལས་མེད་ཀྱང་། རིམ་བཞིན་ས་གནས་གཞན་ནས་གནས་སྤོ་བྱེད་ནས་ཡོང་མཁན་དང་། རྒྱ་གར་ནས་གསར་དུ་འབྱོར་མཁན་བཅས་ད་ལྟའི་ཆར་ཁྱོན་བོད་མིའི་ཁྱིམ་ཚང་གྲངས་ ༢༠ ཙམ་དང་བོད་མི་གྲངས་ ༦༠ ལྷག་ཙམ་གནས་སྡོད་བྱེད་བཞིན་ཡོད། ད་ལྟའི་ཆར་ས་གནས་འདི་ལ་ཁང་པ་ཉོ་མཁན་ཡང་ཇེ་མང་དུ་འགྲོ་བཞིན་འདུག་ལ། བོད་མི་ཚོས་ས་གནས་འདི་ལ་བོད་མིང་ <<བཀྲ་ཤིས་གླིང་>>ཞེས་འབོད་བཞིན་ཡོད།
Koshigaya Park, Campbelltown Source: SBS Tibetan
བོད་མི་རྣམས་འདི་ལ་གནས་སྡོད་དང་ས་གནས་འདི་ལ་སྤོ་ཡོང་དགོས་དོན་གཙོ་བོ་ཞིག་ནི་འདི་གའི་ཁང་པ་དང་ཁང་གླ་གོང་ཁེ་པོ་དང་། འགྲིམ་འགྲུལ་སྟབས་བདེ། དགོས་མཁོའི་མཐུན་རྐྱེན་འཛོམས་པོ། ཟང་ཟིང་མེད་པ། ཁོར་ཡུག་གཙང་མ། ས་ཆ་གུ་ཡངས་མོ་དེ་ཡིན་སྐོར་འགྲེལ་བརྗོད་གནང་གི་འདུག
འདིར་ཡོད་བོད་མིི་ཚོས་ས་གནས་གྲོང་སྡེ་ལྷན་ཁང་དང་། སྤྱི་ཚོགས་ཞབས་ཞུའི་ཚོགས་སྡེ་ཁག་དང་འབྲེལ་བ་དམ་ཟབ་ཉར་བཞིན་ཡོད་པ་དང་། དེ་དག་ནས་ལས་ཀའི་གོ་སྐབས་དང་མཐུན་རྐྱེན་རོགས་རམ་ཡང་མི་ཉུང་བ་རག་བཞིན་ཡོད།
ཐོག་མར་ས་གནས་འདིའི་མི་མང་གིས་བོད་དང་བོད་མིའི་སྐོར་ཤེས་རྟོགས་དེ་ཙམ་མེད་པ་ལྟར་དུ་སྣང་ཡང་། ད་ལྟའི་ཆར་བོད་མི་སྐོར་ཤེས་རྟོགས་ཡོད་མཁན་མངོན་གསལ་ཇེ་མང་དུ་ཕྱིན་འདུག་པས་མ་ཚད། ལྷག་པར་ས་གནས་མི་རིགས་གཞན་གྱིས་བོད་མིར་བལྟ་སྟངས་གང་འཚམ་བཟང་པོ་འདུག་པ་ནི། གཙོ་བོར་༸གོང་ས་མཆོག་གི་མཚན་སྙན་གྲགས་དང་དེ་བཞིན་འདིར་ཡོད་བོད་མི་མང་ཆེ་བའི་ཀུན་སྤྱོད་དང་བོད་མི་ཞིག་ཡིན་པའི་འགན་འཁུར་མ་བརྗེད་པ་དེས་ལོས་ཡིན།
ད་ལྟ་ས་གནས་འདིའི་བོད་མི་ཚོས་གཅིག་གིས་གཅིག་ལ་ངོ་སྤྲོད་ཀྱིས་ལས་ཀ་ཡང་གང་འཚམ་འབེལ་པོ་ཆགས་འདུག་པས་མ་ཚད། དམིགས་བསལ་གཙང་བཟོའི་ལས་ཀ་དང་རྒན་གསོ་ཁང་གི་ལས་ཀ། དེ་བཞིན་དབང་པོ་སྐྱོན་ཅན་ཞབས་ཞུ་ཁང་སོགས་ཀྱི་ལས་ཀ་ཧ་ཅང་འབེལ་པོ་རེད་འདུག
འདིར་ཡོད་བོད་མི་ཚོས་རྒྱ་གར་ནས་གསར་དུ་འབྱོར་མཁན་བོད་མི་རྣམས་ལ་གནམ་ཐང་ནས་བསུ་ལེན་དང་། ཁང་པ་བཙལ་རོགས། སློབ་གྲྭ་དང་སྨན་ཁང་ཁག འབྲེལ་ཡོད་སྡེ་ཚན་ཁག་ལ་འཁྲིད་ནས་ཐོ་འགོད་དང་སྐད་སྒྱུར་རོགས་རམ་གང་ལེགས་གནང་གི་ཡོད། ད་ལྟའི་ཆར་ས་གནས་འདི་རང་ནས་ཆེད་ལས་སྐད་སྒྱུར་རག་པར་དཀའ་ངལ་མེད།
Botanic Garden Source: SBS Tibetan
ས་གནས་འདིར་བོད་མིའི་ཁྱིམ་ཚང་སུ་ཞིག་ཁང་པ་གཞན་ལ་གནས་སྤོ་བྱེད་སྐབས་བོད་མི་ཕན་ཚུན་རོགས་རམ་གྱིས་མི་དང་མོ་ཊ་གཉིས་ཀ་ཡོང་ནས་ཅ་ལག་དབོར་རོགས་དང་། ཁང་པ་གཙང་བཟོ་སོགས་རོགས་རམ་གནང་གི་ཡོད་པས། དེ་ནི་ས་གནས་འདི་དང་ལུང་པ་འདིའི་ནང་མི་རིགས་གཞན་དང་བསྡུར་ན་བོད་མི་རྣམས་ཀྱི་ཐུན་མོང་མ་ཡིན་པའི་དགེ་མཚན་དང་ཁྱད་ཆོས་ཤིག་ཆགས་ཡོད།
རྒྱུན་དུ་འཁྲུངས་སྐར་དང་ལོ་གསར་སོགས་བོད་པའི་དུས་ཆེན་ཁག་ལ་བོད་མི་རྣམས་མཉམ་འཛོམས་ཀྱིས་སྤྲོ་སྐྱིད་གཏོང་གི་ཡོད་པ་དང་། འདི་ལོར་བོད་པའི་ལོ་གསར་དེ་ཚེས་པ་ ༩ ཙམ་བར་བོད་མི་རྣམས་ཁྱིམ་ཚང་རེས་མོས་ཀྱིས་མགྲོན་ལ་བོས་རེས་བྱས་ཡོད་པས། བོད་མི་ཁག་ཅིག་གིས་འདི་ལོའི་བོད་ཀྱི་ལོ་གསར་ནི་བཙན་བྱོལ་དུ་འབྱོར་བ་ནས་བཟུང་ཉིན་གྲངས་མང་ཤོས་དང་གྲ་རྒྱས་ཤོས། སྐྱིད་ཤོས་དེ་བྱུང་སོང་ཟེར།
ས་གནས་འདིའི་བོད་མི་ཚོས་<<བཀྲ་ཤིས་གླིང་གི་དབྱར་སྐྱིད་>>ཅེས་ལོ་རེར་གླིང་ཁ་ཐེངས་རེ་གཏོང་སྲོལ་ཡོད་ཅིང་། ཉིན་དེར་ས་ཆ་སྐྱིད་ས་ཞིག་ལ་བོད་མི་རྣམས་འཛོམས་ནས་ཁྱིམ་ཚང་རེ་ཡིས་ཐུན་མིན་གྱི་ཞལ་ལག་སྣ་ཚོགས་འཁྱེར་ནས་འོང་བ་དང་། ཉིན་གང་རིང་ཤོ་བག་དང་། ཏག་སེ། ཀེ་རམ་སོགས་རྩེད་རིགས་སྣ་ཚོགས་དང་། གཞས་དང་ཞབས་བྲོ། ཐག་འཐེན་སོགས་རྩེད་མོ་རིགས་ཅི་དགའ་གང་སྐྱིད་ལ་རོལ་གྱི་ཡོད་པ་རེད།།
