ཕྱི་ལོ་ ༢༠༢༠ ཟླ་ ༢ ཚེས་ ༢༩ རེས་གཟའ་སྤེན་པའི་ཉིན་སིཌ་ནི་བོད་རིགས་མཐུན་ཚོགས་ཀྱིས་གོ་སྒྲིག་འོག ཨོ་སི་ཊོ་ལི་ཡའི་གྲོང་ཁྱེར་སིཌ་ནི་ཁུལ་དུ་གནས་སྡོད་བོད་མི་ཚོས་ཌེ་ཝེ་ Dee-Why ས་གནས་སུ་ཡོད་པའི་མེ་ཁའི་ལཱ་སློབ་གྲྭའི་ནང་བོད་རྒྱལ་ལོ་ ༢༡༤༧ རབ་གནས་ལྕགས་བྱི་ལོའི་བོད་ཀྱི་ལོ་གསར་སྲུང་བརྩི་ཞུས་ཡོད་པ་རེད།
མཛད་སྒོ་སྐབས་ཐོག་མར་སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གི་སྐུ་པར་མཐོང་གྲོལ་རིན་པོ་ཆེ་བཞུགས་ཁྲི་གདན་འདྲེན་དང་སྐུ་མགྲོན་ཚོས་མཇལ་དར་སྒྲོན་འབུལ་དང་ལྷན་བཀྲ་ཤིས་ཞོལ་པ་གཟིགས་འབུལ་བཅས་ཞུས་གྲུབ་རྗེས། བོད་ཀྱི་རྒྱལ་གླུ་དང་ཨོ་སི་ཊོ་ལི་ཡའི་རྒྱལ་གླུ་བཅས་རིམ་པར་བཏང་གནས་སོང་།
བོད་ཕྲུག་ཚོས་གཞས་སྣ་འཁྲབ་སྟོན་གནང་བཞིན་པ། Source: SBS Tibetan
མཛད་སྒོ་ཐོག་སྐུ་མགྲོན་གཙོ་བོ་དབུས་གྲོས་ཚོགས་གོང་མའི་འཐུས་མི་ Jason Falinski མཆོག་དང་། ཡི་ཤུའི་ཆོས་དཔོན་སྐུ་ཞབས་ Bill Crews བཅས་ནས་བོད་ཀྱི་ལོ་གསར་ལ་འཚམས་འདྲི་དང་གསུངས་བཤད་གནང་བ་མ་ཟད། གཞན་ཡང་སྐུ་མགྲོན་དུ་ཨེ་ཤེ་ཡ་དང་ཨོ་སི་ཊོ་ལི་ཡའི་བོད་མི་མང་སྤྱི་འཐུས་གདོང་འདུས་སྐྱིད་འཛོམས་སོགས་ནས་བོད་ཀྱི་རིག་གཞུང་རྒྱུན་འཛིན་བྱ་རྒྱུ་གལ་ཆེན་པོ་ཆགས་ཡོད་སྐོར་སོགས་གཏམ་བཤད་རིམ་པར་གནང་སོང་།
ཐུན་མོངས་མ་ཡིན་པའི་བོད་ཀྱི་སྲོལ་རྒྱུན་ལོ་གསར་དེའི་ཐོག བོད་མི་ཙམ་མ་ཟད་ཕྱི་རྒྱལ་རྒྱལ་གྱི་མི་རིགས་མང་པོ་ཞིག་ཀྱང་མཉམ་ཞུགས་དང་། བོད་རིགས་མཐུན་ཚོགས་ཀྱིས་སྤྱི་ཚོགས་ཁྲོད་མི་མང་སྤྱི་དང་ལྷག་པར་དུ་བོད་མི་རྣམས་ལ་རོགས་རམ་ཤུགས་ཆེ་གནང་མཁན་་ཨོ་སི་ཊོ་ལི་ཡའི་མི་སེར་ཁག་ཅིག་ལ་ཐུགས་རྗེ་ཆེ་ཞུའི་གཟེངས་རྟགས་བྱ་དགའ་ཕུལ་གནང་སོང་།
གཞན་ཡང་སིཌ་ནི་རིག་གནས་སྐྱེད་ཚལ་ཁང་གིས་ལོ་འཁོར་ཡིག་རྒྱུགས་ཨང་རིམ་རྩེ་སོན་དང་ལྷག་པར་དུ་ཀུན་སྤྱོད་ལེགས་ཤོས་ཀྱི་བོད་རིགས་སློབ་ཕྲུག་ཁག་ཅིག་ལ་གཟེངས་བསྟོད་བྱ་དགའ་ཕུལ་གནང་སོང་།
རིག་གནས་སྐྱེད་ཚལ་ཁང་གི་སློབ་ཕྲུག Source: SBS Tibetan
བོད་ཀྱི་ལོ་གསར་སྲུང་བརྩི་མཛད་སྒོ་ཐོག་ཕེབས་པའི་ཕྱི་རྒྱལ་བ་སྐུ་མགྲོན་ Jeni Thornley ལགས་ཀྱིས།
གུས་མོ་དེ་རིང་བོད་པའི་གྲོགས་པོ་གྲོགས་མོ་ཚོ་ཐུག་པར་ཡོང་བ་ཡིན། ཁོང་ཚོས་མཛའ་བརྩེའི་སྣེ་ལེན་དང་ལོ་གསར་སྐོར་འགྲེལ་བཤད་རྒྱག་ཡོང་དུས་སེམས་པ་སྐྱིད་པོ་ཡོང་གི་འདུག རྒྱུན་དུ་༧གོང་ས་མཆོག་གི་འཁྲུངས་སྐར་དང་ལོ་གསར་དེ་འདྲ་ཡོང་ཐེངས་རེ་བོད་པའི་སྐོར་གསར་པ་རེ་ཤེས་ཀྱི་འདུག ང་རང་དམིགས་བསལ་བོད་པའི་རྒྱལ་གླུ་ལ་དགའ་པོ་ཡོད་གང་ཡིན་ཟེར་ན་ངས་འགྲེལ་བཤད་ཆ་ཚང་དབྱིན་ཡིག་ཐོག་ནས་བཀླགས་པ་ཡིན། དེ་བཞིན་ང་རང་བོད་པའི་གཞས་དང་ཞབས་བྲོ་དང་ཞལ་ལག་ལ་ཡང་ཧ་ཅང་དགའ་པོ་ཡོད། བོད་པ་ཚོས་སོ་སོའི་རིག་གཞུང་སྲུང་སྐྱོབ་དང་བརྒྱུད་འཛིན་བྱེད་པ་མཐོང་དུས་སེམས་འགུལ་ཚད་མེད་ཐེབས་ཀྱི་འདུག འཐབ་རྩོད་བྱེད་མཁན་གྱི་མི་རིགས་ཤིག་ལ་མཚོན་ན་དེ་དག་གལ་ཆེན་པོ་རེད་ཅེས་འགྲེལ་བརྗོད་གནང་སོང་།
ཡང་ལོ་གསར་མཛད་སྒོ་ཐོག་ཕེབས་པའི་སྤོ་བོ་བློ་བཟང་ནོར་བུ་ལགས་ཀྱིས། བོད་ཀྱི་ལོ་གསར་འདི་འདྲ་སྲུང་བརྩི་བྱ་རྒྱུ་དེ་གལ་ཆེན་པོ་ཆགས་ཡོད་པ་རེད། བོད་པའི་སྲོལ་རྒྱུན་རིག་གཞུང་དེ་མ་བརླག་པ་བྱེད་དགོས་པ་རེད། ལྷག་པར་དུ་ཕྲུ་གུ་ཆུང་ཆུང་མི་རབས་གཞོན་པ་ཚོས་བོད་ཀྱི་ལོ་གསར་དེ་གང་འདྲ་ཡིན་མིན་ཤེས་དགོས་པ་དེ་གལ་ཆེན་པོ་རེད། རྒྱ་མི་དམར་པོས་བོད་པའི་ཆོས་དང་རིག་གཞུང་རྩ་མེད་གཏོང་གི་ཡོད་པ་རེད། ཕྲུ་གུ་ཚོས་གཞས་དང་ཞབས་བྲོ་མང་པོ་འཁྲབ་སོང་བ། དེ་ཡང་གལ་ཆེན་པོ་ཆགས་ཡོད་པ་རེད། དེ་ཡང་བོད་པའི་སྲོལ་རྒྱུན་རིག་གཞུང་དང་རིག་གནས་ཆགས་ཡོད་པ་རེད། བོད་པའི་སྲོལ་རྒྱུན་རིག་གཞུང་ཉམས་ཚར་ན་གང་ཡང་ལྷག་ཡོད་མ་རེད། ༧གོང་ས་མཆོག་གི་ཐུགས་རྗེ་བཀའ་དྲིན་འོག བོད་མི་ཚོ་འདི་འདྲའི་རུབ་རུབ་བྱས་ནས་འདུ་འཛོམས་བྱ་རྒྱུ་བྱུང་བ་དེ་སེམས་ལ་དགའ་ཚོར་སྐྱེ་ཡི་འདུག ལོ་གསར་གྱི་འདུ་འཛོམས་འདི་འདྲ་གཞོན་སྐྱེས་ཚོར་རིག་གཞུང་ངོ་སྤྲོད་བྱེད་པའི་སྡིང་ཆ་གལ་ཆེན་ཞིག་ཆགས་ཡོད་སྐོར་ཀྱང་འགྲེལ་བརྗོད་གནང་སོང་།
Jeni Thornley third from left Source: SBS Tibetan
སྤོ་བོ་བློ་བཟང་ནོར་བུ། Source: SBS Tibetan
གཞན་ཡང་རིག་གནས་སྐྱེད་ཚལ་ཁང་གི་སློབ་ཕྲུག་ཚོས་བོད་མིའི་གཞས་དང་ཞབས་བྲོ་འཁྲབ་ནས་བོད་རང་གི་ཐུན་མོངས་མ་ཡིན་པའི་གླུ་དབྱངས་དང་ཆས་གོས་དེས་ཕྱི་རྒྱལ་བ་ཚོའི་ཡིད་སེམས་འཕྲོག་པར་བྱས་སོང་། དེ་བཞིན་གཞོན་སྐྱེས་ཚོའི་དབར་ལག་རྩེད་སྤོ་ལོ་འགྲན་བསྡུར་དང་། ཕྱི་དྲོ་བོད་མི་ཚོས་སྒོར་གཞས་སོགས་གཞས་སྣ་འཁྲབ་སྟོན་གནང་ཡོད་པ་རེད།
