གནམ་ལོ་གསར་དུ་བཞད་པའི་དགའ་སྟོན་ལ་༧སྤྱི་ནོར་༧གོང་ས་སྐྱབས་མགོན་ཆེན་པོ་མཆོག་གིས་གཞིས་བྱེས་བོད་མི་ཡོངས་ལ་འཚམས་འདྲི་དང་བཀའ་སློབ་གནང་དོན།
“བོད་ཕྱི་ནང་དང་སོག་པོ། ཧི་མ་ལའི་རི་བརྒྱུད་བོད་པའི་ལོ་གསར་བརྩི་མཁན་ཚང་མར་ལོ་གསར་འཚམས་འདྲིའི་བཀྲིས་བདེ་ལེགས་ཞུ་རྒྱུ་ཡིན། དུས་ཡུན་ཞིག་རྫོགས་ནས་ལོ་གསར་པ་དེ་སླེབས་ཀྱི་ཡོད་པ་རེད།
ལོ་རྙིང་པ་དེའི་ནང་སོ་སོས་དགེ་སེམས་གང་འདྲ་ཞིག་སྐྱེས་ཡོད་མེད་དང་སྤྱིར་ཆོས་པ་དེའི་ནང་ནས་སངས་རྒྱས་ཀྱི་ཆོས་པ་ཞིག་བྱས་ནས་བསྡད་ཡོད་དུས་འདས་པའི་ལོ་དེའི་ནང་ཐོས་བསམ་སྒོ་གསུམ་གང་འདྲ་བྱུང་ཡོད་མེད་ལ་བསམ་བློ་ཞིག་བཏང་། ཕྱིར་མིག་ཞིག་བལྟས་ནས། ཐོས་བསམ་སྒོམ་གསུམ་ག་ཚོད་ཐུབ་ཐུབ་ཅིག་བྱུང་ཡོད་ན་དེ་ལ་རྗེས་སུ་ཡི་རང་བྱེད་དགོས་པ་དང་། ལོ་གསར་པ་འདིའི་ནང་སྔོན་གྱི་བཅོམ་ལྡན་འདས་རང་ཉིང་དང་། ཀླུ་སྒྲུབ་ཡབ་སྲས། དེ་ག་ནང་བཞིན་འཇམ་མགོན་བླ་མ་ཙོང་ཁ་པ་ཡབ་སྲས་ཀྱིས་མཛད་པའི་ལེགས་བཤད་རྨད་དུ་བྱུང་བ་ཡོད་པ་དེ་ཚོར་ཐོས་བསམ་སྒོམ་གསུམ་མུ་མཐུད་བྱེད་ནས་མི་ཚེ་དོན་དང་ལྡན་པ་ཞིག་དང་། བཅོམ་ལྡན་འདས་ནས་བཟུང་དྲིན་ཅན་རྩ་བའི་བླ་མ་བར་གྱི་རྩ་རྒྱུད་ཀྱི་དྲིན་ཅན་རྩ་བའི་བླ་མ་རྣམས་ཀྱི་ཐུགས་དགོངས་རྫོགས་པ་ཞིག་བྱ་རྒྱུ་ཡིན་བསམས་ནས་སྙིང་སྟོབས་བསྐྱེད། དམ་བཅའ་བཞག་དགོས་པ་དེ་གལ་ཆེན་པོ་རེད་”ཅེས་དང་།
ཡང་མགོན་པོ་གང་ཉིད་ཀྱིས་”བཙན་བྱོལ་དུ་ཡོད་པའི་བོད་མི་དང་ཡུལ་ལུང་འདྲ་མིན་ནང་ཡོད་པ་དེ་ཚོ། ལྷག་པར་བོད་གངས་ཅན་ལྗོངས་ལ་ཡོད་པ་རང་དབང་དང་བྲལ་ཡང་སྙིང་སྟོབས་ཞུམ་པ་མེད་པ་བྱས་ནས་བཞུགས་ཡོད་པ། ང་ལ་དད་པ་དང་དགའ་མོས་བྱེད་མཁན་ཚོས་༧རྒྱལ་བ་རིན་པོ་ཆེ་རྒྱ་གར་འཕགས་པའི་ཡུལ་ལ་སངས་རྒྱས་ཀྱི་བསྟན་པར་ཞབས་འདེབས་དཔྱིད་ཕྱིན་པ་བསྒྲུབས་དང་སྒྲུབ་མུས་རེད་བསམས་པ་བྱེད་ནས། ཁྱེད་རང་ཚོ་ཚང་མ་བློ་བདེ་པོ་བྱེད་ནས་སྡོད་ཅེས་”བཀའ་བརྩལད་འདུག
ཡང་དབུས་བོད་མིའི་སྒྲིག་འཛུགས་ཀྱི་དྲ་ཚིགས་ཐོག་གནས་ཚུལ་བཀོད་གསལ་ལྟར་སྲིད་སྐྱོང་བློ་བཟང་སེངྒེ་མཆོག་གིས་ལོ་གསར་འཚམས་འདྲི་གནང་དོན་” བོད་མིའི་བླ་ན་མེད་པའི་དབུ་ཁྲིད་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་ལ་གུས་ཕྱག་སྔོན་དུ་ཕུལ་བའི་ཐོག་ནས་ཆོས་བརྒྱུད་ཁག་གི་བླ་ཆེན་རྣམ་པ་དང་། གཞིས་བྱེས་བོད་མི་ཡོངས། དེ་བཞིན་རྒྱ་གར་དང་འཛམ་གླིང་གང་སར་གནས་པའི་བོད་དོན་རྒྱབ་སྐྱོར་བ་ཡོངས་ལ་བོད་རྒྱལ་ལོ་ ༢༡༤༨ རབ་གནས་ལྕགས་གླང་ལོའི་གནམ་ལོ་གསར་དུ་བཞད་པའི་དགའ་སྟོན་ལ་ངས་བོད་མིའི་སྒྲིག་འཛུགས་བཀའ་ཤག་གི་ཚབ་ཞུས་ཏེ་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན། ལོ་གསར་པའི་ནང་རྣམ་པ་ཚོས་གཙོས་ནང་མི་ལྷན་རྒྱས་སྐུ་ཁམས་གསལ་ཐང་དང་། དེ་བཞིན་སྤྱི་ཚོགས་ཁྱོན་ཡོངས་ཡར་རྒྱས་གོང་ནས་གོང་དུ་འཕེལ་བར་ཤོག་ཅེས་སྨོན་འདུན་ཞུ་རྒྱུ་ཡིན།” ཞེས་གསུངས་འདུག
ཡང་སྲིད་སྐྱོང་མཆོག་གིས་” སྤྱི་ནོར་༧གོང་ས་༧སྐྱབས་མགོན་ཆེན་པོ་མཆོག་གིས་མང་གཙོ་གསོལ་རས་སྩལ་བ་དེ་འཛམ་གླིང་ནང་ངོམ་ཆོག་པ་ཡོད། བོད་མི་ཚོས་འོས་བསྡུའི་ཆ་ཤས་གང་མང་བླངས་ཏེ་སྔར་ལས་ལྷག་ཡག་པ་བྱུང་ན་ང་ཚོ་དགའ་དགོས་པའི་གནས་སྟངས་ཆགས་ཀྱི་རེད། ལོ་གསར་པའི་ནང་རྣམ་པ་ཚོ་སྤྲོ་པོ་དང་། སྐུ་གཟུགས་གསལ་ཐང་། བོད་ནང་གི་བོད་མིའི་མངོན་འདོད་བསྒྲུབ་ཐུབ་པའི་སྨོན་འདུན་ཞུ་གི་ཡོད།
བོད་ནང་གི་བོད་མིའི་མངོན་འདོད་བསྒྲུབ་སླད་ང་ཚོ་ཚང་མས་ལས་འགུལ་སྤེལ་རྒྱུ་དང་། བོད་ནང་གི་ཛ་དྲག་གནས་སྟངས་འཛམ་གླིང་ཡོངས་ལ་ཁྱབ་སྤེལ། དེ་བཞིན་བོད་དོན་ལ་རྒྱབ་སྐྱོར་ཤུགས་ཆེ་ཐོབ་ཐབས་བྱ་རྒྱུ་དང་། དེ་ལྟར་བྱུང་ན་བོད་ཀྱི་བདེན་མཐའ་མྱུར་དུ་གསལ་ཐུབ་ཀྱི་རེད་བསམ་ནས་ཚང་མས་ཁས་ལེན་དང་འབད་བརྩོན་གནང་རོགས་ཞེས་ཞུ་རྒྱུ་ཡིན། “ཞེས་གསུངས་འདུག
ཡང་བོད་མི་མང་སྤྱི་འཐུས་ཚོགས་གཙོ་པདྨ་འབྱུང་གནས་མཆོག་གིས་བོད་མི་རྣམས་ལ་ལོ་གསར་འཚམས་འདྲི་གནང་དོན་” བོད་རྒྱལ་ལོ་ ༢༡༤༨ རབ་གནས་ལྕགས་གླང་ལོའི་གནམ་ལོའི་རང་ཞལ་གསར་དུ་བཞད་པའི་རྟེན་འབྱུང་དགའ་སྟོན་ལ་ངས་སྐབས་བཅུ་དྲུག་པའི་བོད་མི་མང་སྤྱི་འཐུས་ལྷན་ཚོགས་ཀྱི་ཚབ་ཞུས་ཏེ་གཞིས་བྱེས་བོད་མི་ཡོངས་ལ་མཛའ་ཞིང་བརྩེ་བའི་ཐོག་ནས་འཚམས་འདྲིའི་བཀྲ་ཤིས་བདེ་ལེགས་ཞུ་རྒྱུ་ཡིན།
དོན་མེད་ང་དང་ཁྱེད། ང་ཚོ་དང་ཁོང་ཚོ་ཞེས་རྩོད་པ་དེས་རང་གཞན་གཉིས་ལའང་ཕན་མི་ཐོགས། དེར་བརྟེན་ང་ཚོ་ཚང་མས་གོང་བུ་ནུས་པ་གཅིག་ཏུ་སྒྲིལ་བའི་ཐོག་ནས་རྩ་དོན་ཐད་འབུང་དགོས་པ་དང་། དེ་བཞིན་བོད་པའི་ཆོས་དང་རིག་གཞུང་། སྐད་ཡིག གོམས་གཤིས་སོགས་ཀྱི་ཐོག་ཐུགས་བརྩོན་གནང་བ་དང་། ཉམས་པ་སླར་གསོ་དང་མི་ཉམས་རྒྱུན་འཛིན་ཐད་འབད་བརྩོན་གནང་རོགས་ཞེས་འབོད་སྐུལ་ཞུ་གི་ཡོད།
མཐའ་དོན་དུ་འཇིག་བརྟེན་ལྷ་སྡེ་མི་སྡེ་ཡོངས་ཀྱི་མགོན་སྐྱབས་བླ་ན་མ་མཆིས་པ་སྤྱི་ནོར་༸གོང་ས་༸སྐྱབས་མགོན་ཆེན་པོ་མཆོག་༸སྐུ་ཚེ་ཁྲི་ལོར་བརྟན་པ་དང་གང་ཉིད་མཆོག་གི་བཞེད་དགོངས་མཐའ་དག་ལྷུན་གྱི་གྲུབ་པར་སྨོན་འདུན་ཞུ་རྒྱུ་ཡིན།”ཞེས་གསུངས་འདུག
ཨོ་སི་ཊོ་ལི་ཡའི་ནང་མངའ་སྡེ་དང་ས་ཁུལ་འདྲ་མིན་ནང་གནས་སྡོད་བྱས་ཡོད་པའི་བོད་མི་ཚོས། བོད་ཀྱི་ཐུན་མོངས་མ་ཡིན་པའི་སྲོལ་རྒྱུན་ལོ་གསར་སྲུང་བརྩི་དང་། དེ་ཡང་ས་གནས་ཁག་ཅིག་ལ་བོད་རིགས་མཐུན་ཚོགས་ཀྱི་ངོས་ནས་ལོ་གསར་གོ་སྒྲིག་དང་། གཞན་ཡང་གྲོགས་པོ་གྲོགས་མོ་དང་། ནང་མི་ཉེ་འབྲེལ་ལྷན་འཛོམས་ཀྱིས་སོ་སོའི་གནས་སྟངས་དང་དུས་ཁོམ་ལ་དཔག་པའི་ལོ་གསར་སྲུང་བརྩི་འདྲ་མིན་ཞུ་བཞིན་འདུག
