ཨོ་སི་ཊོ་ལི་ཡའི་ནིའུ་སའོ་ཐི་ཝལ་མངའ་སྡེའི་ནང་འདི་ལོར་ཕྱི་ཟླ་ ༦ པའི་ནང་ཏོག་དབྱིབས་ན་ཚ་སླར་ཡང་ཁྱབ་ཏེ་ཕྱི་ཟླ་ ༡༠ པའི་ཚེས་ ༡༡ བར་དུས་ཡུན་ཟླ་བ་ ༤ ཙམ་རིང་ཁྱིམ་སྡོད་བཀའ་རྒྱ་དམ་པོ་བསྡམས་ཡོད་པ་དང་། ཉེ་བའི་ཆར་མངའ་སྡེའི་ནང་ལོ་ན་ ༡༦ ཡན་གྱི་སྤྱིའི་མི་འབོར་ལས་མི་གྲངས་བརྒྱ་ཆ་ ༧༠ ལྷག་ཙམ་ལ་ཏོག་དབྱིབས་འགོག་ཁབ་ཐེངས་གཉིས་ཀ་བརྒྱབ་ཚར་བས་མ་ཚད། མངོན་གསལ་དོད་པོས་ནད་པ་གསར་པའི་གྲངས་འབོར་ཉིན་རེ་ནས་རིམ་བཞིན་ཆགས་པའི་སྐབས་འདིར། ཁྱིམ་སྡོད་བཀའ་རྒྱ་ལྷོད་དུ་བཏང་བ་དང་། ཕྱི་རོལ་དུ་ལོ་ན་ ༡༢ ཡན་གྱི་མི་གྲངས་ ༣༠ མན་འདུ་འཛོམས་ཆོག་པ་བཟོས་ཡོད་པས་མ་ཚད། ཆང་ས་དང་གཉེན་སྒྲིག་མཛད་སྒོ་སོགས་ལ་མི་གྲངས་ ༡༠༠ མན་འདུ་འཛོམས་བྱེད་ཆོག
ཉེ་ཆར་རེས་གཟའ་ཟླ་བ་ནས་ཁྱིམ་སྡོད་བཀའ་རྒྱ་གློད་རྗེས། དེ་རིང་གཞི་ནས་ནམ་མཁའ་སྔོ་ལ་དྭངས་བ་དང་བསིལ་རླུང་འཇམ་ཞིང་དྲོད་གྲང་ཤིན་ཏུ་སྙོམ་པའི་དེ་རིང་རེས་གཟའ་ཉི་མའི་ཉིན་མི་རྣམས་བྱ་བྱིའུ་དང་རི་དྭགས་སེམས་ཅན་རྣམས་ཡུན་རིང་ནང་དུ་བཅུག་ནས་ཕྱི་ལ་གློད་པ་ལྟར། ནང་མི་དང་གྲོགས་པོ་གྲོགས་མོ་ཁྱུ་དང་ཁྱུ་བྱེད་ནས་གླིང་ཁ་དང་རྒྱ་མཚོ་འགྲམ། མེ་ཏོག་ལྡུམ་ར་སོགས་ལ་འཁྱམ་འཁྱམ་དང་དགའ་དགའ་སྤྲོ་སྤྲོའི་གུང་སེང་གཏོང་བཞིན་འདུག
Source: SBS Tibetan
དེ་རིང་གྲོང་ཁྱེར་སིཌ་ནིང་གི་ཉེ་འགྲམ་ཁེམ་བྷོ་ཊོན་ Campbelltown ས་གནས་སུ་ཡོད་པའི་ཀོཤི་གྷ་ཡ་ Koshigaya གླིང་ཁ་རུ་ས་གནས་ཌེ་ཝེ་ནས་ཕེབས་པའི་བོད་མི་ཁག་ཅིག་དང་ཁེམ་བྷོ་ཊོན་ས་གནས་སུ་གནས་སྡོད་བྱས་ཡོད་པའི་བོད་མི་ཁག་ཅིག་བཅས་གླིང་ཁར་གཏོང་བཞིན་འདུག་ལ། མ་ཚད་དེ་རིང་གླིང་ཁ་དེའི་ནང་མི་རིགས་འདྲ་མི་སྣ་ཚོགས་ཀྱི་ནང་མི་དང་། གྲོགས་པོ་གྲོགས་མོ་མང་པོ་ཞིག་འཛོམས་ནས་ Happy Birth Day <<ཁྱེད་ཀྱི་སྐྱེས་སྐར་ལ་བཀྲིས་བདེ་ལེགས་>>སོགས་ཀྱི་སྒྲ་དང་། གཞས་དང་ཞབས་བྲོ་འཁྲབ་པ་སོགས་རྒན་གཞོན་དབྱེ་བ་མེད་པ་ཚང་མའི་ངོ་གདོང་ལ་འཛུམས་ཀྱི་ཁེངས་འདུག
བོད་མི་ཚོས་ཀྱང་གཞས་དང་ཞབས་བྲོ་འཁྲབ་པ་དང་ཏག་སེ་བརྩེས་པ་སོགས་ཅི་དགའ་གང་སྐྱིད་ལ་རོལ་བཞིན་འདུག་པས་མ་ཚད། གཙོ་བོར་དེ་རིང་རིག་འཛིན་བསྟན་དགའ་ལགས་ཀྱི་ཆུང་མ་བསྟན་འཛིན་ཆོས་སྒྲོན་ལགས། ཟླ་ཤས་སྔོན་ཨོ་གླིང་ནང་ཏོག་དབྱིབས་ན་ཚའི་དཀའ་ངལ་དང་དམ་བསྒྲགས་ཆེ་བའི་སྐབས་སུ་རྒྱ་གར་ནས་འབྱོར་ན་ཡང་། ཁོ་མོ་ཨོ་གླིང་ནང་འབྱོར་མ་ཐག་དུས་ཡུན་ཉིན་གྲངས་ ༡༤ ལྷག་ཟུར་བཀག་མགྲོན་ཁང་དུ་སྡོད་དགོས་བྱུང་བས་མ་ཟད། ཟུར་བཀག་རྗེས་ནས་ཀྱང་ཁྱིམ་སྡོད་བཀའ་རྒྱའི་རྐྱེན་པས་གྲོགས་པོ་གྲོགས་མོ་མང་པོ་ཞིག་གི་ཁོང་ལ་འཚམས་འདྲི་དུ་ཡོང་མ་ཐུབ་སྟབས། དེ་རིང་ཁོང་གཉིས་ཀྱི་ཕ་ཡུལ་གཅིག་པ་དང་གྲོགས་པོ་གྲོགས་མོ་ཚོས་ཁོང་བཟའ་ཚང་གཉིས་ལ་འཚམས་འདྲིའི་ཁ་བཏགས་དང་ལག་རྟགས་སོགས་ཕུལ་སོང་།
བསྟན་འཛིན་ཆོས་སྒྲོན་ལགས་ཀྱིས་ཁྱིམ་སྡོད་བཀའ་རྒྱ་ལྷོད་དུ་བཏང་བ་དང་། དེ་རིང་གནམ་གཤིས་ཡག་པོ། གྲོགས་པོ་གྲོགས་མོ་དང་ལྷག་པར་བོད་མི་མང་པོ་ཞིག་དེ་རིང་གཞི་ནས་ཐུག་སོང་བས་ཧ་ཅང་དགའ་པོ་བྱུང་སྐོར་གསུངས་དོན། “ངའི་མིང་ལ་བསྟན་འཛིན་ཆོས་སྒྲོན་ཡིན། ཉེ་ཆར་ཕྱི་ཟླ་ ༨ པའི་ནང་ཨོ་སི་ཊོ་ལི་ཡ་ལ་འབྱོར་བ་ཡིན། ང་རང་ཐོག་མར་འབྱོར་སྐབས་ཨོ་སི་ཊོ་ལི་ཡའི་ནང་ Lockdown ཁྱིམ་སྡོད་བཀའ་རྒྱ་རེད་འདུག སྐབས་དེར་ཡར་མར་མང་པོ་འགྲོ་ཆོག་གི་མི་འདུག་ལ་བོད་མི་ཡང་མང་པོ་ཐུག་གི་མི་འདུག དེ་རིང་འདིར་བོད་མི་མང་པོ་ཞིག་ཐུག་ནས་ཚོར་སྣང་ཧ་ཅང་སྐྱིད་པོ་བྱུང་སོང་། འདིར་སླེབས་པ་ནས་བཟུང་དེ་རིང་བོད་མི་མང་ཤོས་ཐུག་བྱུང་། མ་ཚད་དེ་རིང་འདིར་བོད་མི་མ་ཡིན་པའི་མི་མང་པོ་ཞིག་ཀྱང་ག་ས་ག་ལ་གླིང་ཁ་གཏོང་གི་ཡོད་པ་མཐོང་དུས་ཚོར་སྣང་ཧ་ཅང་སྐྱིད་པོ་བྱུང་སོང་”ཞེས་གསུངས་བྱུང་།
Source: SBS Tibetan
Source: SBS Tibetan
