ሕንዳዊው - እንግሊዛዊ ደራሲ ሳልማን ሩሽዲ ኒውዮርክ ንግግር ለማድረግ በተጋበዙበት አዳራሽ መድረክ ላይ ሳሉ አንገትና ሆዳቸው ላይ ከ10 እስከ 15 ጊዜያት በስለት ተወግተዋል።
ወዲያውኑም ወደ ሆስፒታል በሂሊኮፕተር ተወስደዋል።
ደራሲው በደረሰባቸው የስለት ውግ ሳቢያ ጉበታቸው የተጎዳ፣ አንድ ዓይናቸው ሊጠፋ እንደሚችልና መናገርም የተሳናቸው መሆኑን የደራሲው ወኪል አንድሩ ዋይሊ ተናግረዋል።
ሩሽዲ ሕክምና እየተከታተሉ ባሉበት ሆስፒታል የመተንፈሻ መሳሪያ የተገጠመላቸው መሆኑንም ተገልጧል።
ሳልማን ሩሽዲን በስለት የወጋው ተጠርጣሪ የ24 ዓመት ወጣት ሃዲ ማታር በቁጥጥር ስር መዋሉን ፖሊስ አስታውቋል። ሆኖም አደጋውን ለማድረስ ምን እንዳነሳሳው ፖሊስ ፍንጭ አልሰጠም።
የ75 ዓመቱ ደራሲ "The Satanic Verses" በሚለው የ1980ዎቹ መጽሐፋቸው ለዓለም አቀፍ ዝናና የሞት ዛቻ ዳርጓቸዋል።
Share
