澳洲網球公開賽外圍賽場內，再次響起熟悉的廣東話打氣聲。
香港網球「一哥」黃澤林，在男單外圍賽次圈表現出色，直落兩盤以 7 比 6、6 比 0 擊敗西班牙球手拉馬斯雷斯，距離生涯首次躋身澳網正賽，只差一步。
比賽期間，場內不時傳來「好波」的喝采聲。賽後，黃澤林接受 SBS廣東話訪問，形容今場比賽體力消耗甚大。「非常好，不過今日都好熱、都幾攰，所以而家要快啲返去休息，準備聽日比賽。」
回顧比賽過程，首盤戰況激烈，雙方你來我往，打到決勝局才分出勝負。黃澤林表示，賽前已經預計對手並不容易應付。「未打之前都知道呢一場波對手 qualify 幾次大滿貫，所以一啲都唔容易打。」
捱過首盤後，黃澤林在第二盤完全掌控節奏，連環破發，用了約 25 分鐘再下一城，鎖定勝局。連日作戰，加上墨爾本天氣及體能消耗，談到如何調整心態迎接下一場比賽，黃澤林形容現階段如「考試時間」。
他說：「平時所有練習都已經做好，而家去到 kind of 考試、一個測驗咁樣，咁就繼續努力。」
場邊不少香港球迷入場支持。每當黃澤林得分，觀眾席上隨即聽到熟悉的廣東話喝采聲。對於這份支持，黃澤林坦言十分感動。
他說：「我希望越嚟越多香港人可以嚟支持我。墨爾本其實都有好多香港人，可能住喺度，或者嚟旅行睇 AO。我希望可以留耐少少，享受呢一個舞台。」
臨離場前，黃澤林亦向一直支持他的香港球迷，送上感謝與承諾。「多謝大家支持，我都會搏盡，希望大家睇到我哋一啲都唔輸蝕，可以同佢哋死過、搏盡、咬住。」
現場有來自不同背景、不同城市的球迷，包括多位由香港專程來到墨爾本，一同為這位香港球手打氣。
Bernice 原本計劃在澳網開賽前返回香港，因行程改變，有機會親身入場支持黃澤林。「因為留多咗一個星期，先可以睇到 Coleman 打外圍賽，仲要可以睇到一個香港球手，真係好難得。」
她形容今場比賽氣氛相當緊張。「打到 6 比 6 要搶 7 ，去到 9 比 7 嗰下真係好史詩式，好似有半個主場咁樣，俾到信心 Coleman。」
她亦對第二盤的表現印象深刻。「第二局真係氣勢如虹，直落 6 比 0，我覺得好 impressive，大滿貫賽事做到呢樣真係好勁。」
居於墨爾本的李太表明立場，直言今次是專程到場支持黃澤林。「當然特登嚟啦，Coleman 嚟㗎嘛！」
雖然首盤一度感到緊張，但她對黃澤林的發球實力留下深刻印象。「第一局有少少擔心，但佢發球真係 very very good。」她的丈夫李先生亦補充一句：「世界水準。」
同樣居於墨爾本的江小姐，連續兩日入場支持黃澤林，希望能一直陪伴他走得更遠。「我已經睇咗佢第一場，所以今日再嚟支持，希望可以繼續支持佢更多場。」
提到最深刻的一幕，她笑言黃澤林連續發出 Ace 球時，令她忍不住驚呼。「佢 Ace 咗四球嗰下，我真係『嘩！』一聲。」
亦有家長帶同下一代入場，希望小朋友可以親身見證一位香港網球手，在大滿貫舞台上比賽。居於墨爾本的 Kaka 帶同兒子前來觀賽：「電視見到佢贏咗，住得又唔遠，咁近都唔嚟好似唔講得過去，所以帶埋仔仔嚟。」
她期望小朋友可以從現場感受比賽的認真與專注。「而家佢開始知道，原來網球係一個好認真、好嚴肅嘅比賽。」
居於雪梨的球迷 Kevin，與妹妹一同前來。他說：「今日特登過嚟睇，支持 Coleman。」
Kevin 形容，黃澤林是現時香港最具潛力的網球手之一。「覺得佢真係而家香港網球最勁、最有發揮潛力嘅一個。」
妹妹 Sarita 笑言：「雪梨好近啫嘛，無得唔支持啦。」
由香港專程來到墨爾本的 Wendy 坦言，今次為了支持偶像而來。「我香港住，本身都打網球，佢又打，我係佢 fans，咁大嘅盛事，梗係特登飛過嚟支持佢。」
連首次觀看澳網賽事的媽媽郭太，也被現場氣氛感染。「我覺得佢已經盡最大努力，好有潛質，仲繼續為香港爭光。」
只要再贏一場，黃澤林便可首次躋身澳洲網球公開賽正賽，繼續在大滿貫舞台上，寫下屬於自己、亦屬於香港的一頁。
瀏覽更多最新時事資訊，請登上 SBS 廣東話 Facebook 專頁、X 專頁、Instagram 專頁，或訂閱 Telegram 頻道。
SBS 中文堅守《SBS 行為守則》等政策，以繁體中文及簡體中文提供公平、公正、準確的新聞報道及時事資訊。SBS 廣東話及 SBS 普通話均已為大眾服務超過 40 年。歡迎在每天早上 9 至 11 時透過 SBS Radio 1 收聽廣東話節目及在每天早上 7 至 9 時收聽普通話節目，或透過 SBS Audio App 手機應用程式收聽直播、節目重溫及其他語音內容。按此進一步了解 SBS 中文。
