What is a Royal Commission? Credit: Canva
Naririnig natin ang terminong Royal Commission sa
usaping gobyerno at politika sa Australia, lalo na
kung may malaking isyu na may seryosong epekto sa
publiko. Pero, alam mo ba kung anong ibig sabihin
nito? Ang Royal Commission ang pinakamataas at
pinakamakapangyarihang uri ng public inquiry sa
Australia. Itinatatag ito kapag may alegasyon ng
malubhang pagkukulang, katiwalian o sistemikong
problema sa loob ng isang organisasyon, industriya
o ahensya ng gobyerno. May kapangyarihan ang Royal
Commission na tumawag ng mga saksi, humingi ng
dokumento at magsagawa ng public hearings o
pampublikong pagdinig. Ibig sabihin, pwedeng
obligahin ng mga indibidwal at institusyon na
magsalita sa ilalim ng panunumpa. May iba't ibang
pananaw dito. Para sa marami, mahalaga ang Royal
Commission dahil nagdadala ito ng transparency at
pananagutan. Maraming pagbabago sa batas at
pulisiya ang nagmula sa mga rekomendasyon nito
tulad ng mga reporma sa banking, aged care at
child abuse prevention. Pero para sa iba, matagal
at magastos ang proseso, minsan inaabot ng ilang
taon bago lumabas ang pinal na ulat, at hindi rin
awtomatikong naipapatupad ang lahat ng
rekomendasyon. Gayunpaman, ang mga natuklasan ng
Royal Commission ay nagsisilbing malakas na
batayan para sa reporma at mas maayos na
pamamahala. Sa madaling salita, ang Royal
Commission ay paraan ng gobyerno para siyasatin
ang katotohanan at ituwid ang mga sistemang
pumalpak.
