Kaub li qhia tias nws siv sij hawm 10 lub xyoo los tsim cov system tiv thaiv kom tub sab txhob nyiag thiab txhob dawj tau tsheb lawm. Lub tswv yim thaum xub thawj mas yog tsim coj los siv rau tub ceev xwm thaum nws tseem ua hauj lwm tam li yog ib tug tub ceev xwm, tab sis vim yuav tau ua ntau yam thiab cuam tshuam txog tej neeg cov privacy thiab ces thiaj tau muaj cov system no tso tseg lawm.
Txuas ntxiv ntawd los ces nws thiaj tau tsim coj los ua luam ntiag tug lawm xwb. Thaum muaj ib tug tuam los pav ntawm cov teb chaws Middle East pom nws cov system no ces thiaj tawm tswv yim kom nws coj mus zwm rau hauv America cov stock market, uas nws yuav tau ua ntau yam li zwm kom tau daim copyright, patent thiab coj mus zwm rau hauv US stock market uas yuav qhib sai sai tom ntej no.
Cov twj no ces yog tus neeg ntawd tsis yog tus tswv ces yeej tsav tsis tau lub tsheb ntawd khiav txawm nws dawj tau lub tsheb ntawv tsav lawm, tab sis lub tseb ntawd yuav tuag thiab yuav quaj suab nrov nrov qhia tias yog tus neeg ntawd yog tub sab nyiag tsheb los sis yog seb puas yog tus tswv tiag mas thiaj ua kom lub tsheb ntawd txhob quaj thiab tsav tau mus ntxiv xwb.
Kaub Lis kuj qhia tias nws zoo siab tias yog ib yam twj uas Hmoob yog tus tsim tau thawj zaug coj los siv thiab zoo dua lwm cov twj muaj siv ntawm teb chaws America, thiab qhov tseem ceeb mas Hmoob yog tseem yog tus tswv cov twj thiab cov lagluam no thiab.
Nws hais tias yeej tau coj cov twj no mus siv rau ntau cov teb chaws Asia li Thaib, Nplog, Cambodia, thiab tom ntej no tseem xav coj mus siv rau Phillippines nrog rau Indonesia siv ntxiv thiab. Nws yeej muaj lub hom phiaj xav kom cov lagluam no nthuav dav li xav tau cov neeg pab muag thiab cov neeg nruab los pab ntxiv. Tab sis nws hais tias yam twj no tsuas yog ib yam ntawm ntau yam uas nws tseem xav ua txuas ntxiv rau yav pem suab xwb.
Mloog tau SBSHmong rau hnub zwj Teeb (Thursday) thaum 6 pm AEDT thiab hnub zwj Hnub (Sunday) thaum 11 am AEDT los yog koom tau ntxiv ntawm Facebook, google podcasts, spotify, thiab apple podcasts los yog download SBS Radio App kom koj mloog tau SBS Hmong.
