SBS Examines: Nce tej nqe muag khoom kim

Puas yog tias Australia tej chaw muag roj tsheb nce nqe muag roj kim? Neeg Australia xav li cas? Tej tswv yim twg thiaj daws tau tej xwm txheej no?

Daim phiaj qhia nqe roj ntawm Footscray, Melbourne, Wednesday, March 18th, 2026. Source: AAP / Jay Kogler/AAPIMAGE

Lub caij uas ntiaj teb tseem poob rau tej xwm txheej tsis tau roj tsheb txaus siv no, tau ua rau ib txhia neeg Australia xav tias tej zaum tej tuam txhab muag roj txhob txwm nce nqe muag roj kim.

Tej kws paub txog lagluam yeej hais tias lawv cov kev nce nqe kim yeej tsis txhaum cai, vim tsoom fwv teb chws Australia tsuas tsim tau ib tsab cai los tswj tej tuam txhab muag khoom supermarket xwb tsis yog tswj tag nrho txhua yam lagluam kom tsis txhob nce nqe muag khoom kim.

Lub tsam thawj no los tsoom fwv Australia kuj tau nrhiav yuav roj ntawm ntau lub teb chaws kom Australia tej neeg tsav tsheb, tej neeg ua liaj ua teb thiab tej neeg tsav tsheb thiab tej neeg nyob ntawm tej zos cheeb tsam tuaj ntug nroog thiab tej zos toj siab tsis tau roj tsheb txaus siv. Thiab yeej tau txo se rau tej roj tsheb txog rau lub 6 hli ntuj (2026) no, 'tab sis xyov tej chaw muag roj puas txo tej nqe roj tsheb rau tej neeg tsav tsheb' raws li tus nom ywj pheej ntawm lub rooj nom ywj pheej Kooyong hais.

Australia tus coj (Thawj pwm tsav Anthony Albanese) yeej tau hais tias ''yog tseem muaj tej tsov rog ntawm Middle East ntev npaum li cas ces yuav ntsib tej xwm txheej tsis tau roj tsheb siv no ntev npaum li ntawd rau teb chaws Australia thiab ntiaj teb txuas ntxiv xwb."

Tib lub caij no los Iran thiab Meskas yeej tseem txwv txiav thiab thaiv tsis pub ntiaj teb tej nkoj thauj roj mus hla suam hiav txwv Strait of Hormuz ces thiaj khuam daig rau tej roj siv.

Lub koom haum Australian Competition and Consumer Commission (ACCC) thiaj taw qhia kom siv nom tswv tej twj li NSW lub app FuelCheck, thiab Service Victoria kom thiaj txheeb thiab paub tias tej nqe roj qhov twg pheej yig dua.

Professor David Byrne uas yog tus coj ntawm lub chaw teeb txheeb lagluam nto npe ntawm University of Melbourne thiaj hais tias yuav tau siv ntau txoj xub ke los tsim hluav taws xb siv mas thiaj yuav pab kom peb ntxeem dau tej nqe roj uas kim heev tam sim no.

Australia tus thawj pwm tsav Anthony Albanese tej lus hais rau Australia tej neeg tsav tsheb txog tej xwm txheej tsis muaj roj tsheb txaus siv.

SBS Nepali, SBS Russian thiab SBS Chinese koom sau zaj xov xwm no.

Mloog tau xov xwm tshiab ntawm SBS Hmong, download SBS Adio app thiab caum SBS Hmong Facebook page thiab mloog tau SBS Hmong Youtube.