Tau txais txiaj ntsim dab tsi ntawm lub koom txoos paj nruag uas Michael Vwj npaj rau GY Vaj, Zoov Phab Xyooj, thiab Huab Vwj tuaj nqua yas suab ntawm Melbourne.
Michael Vue uas yog tus npaj lub koom txoos paj nruag ntawm Melbourne tsis ntev los no uas tau tos Zoov Phab Xyooj, GY Vaj thiab Huab Vwj tuaj nqua yas suab ua kev lom zem rau Hmoob Australia hais tias:
Cov kev npaj koom tej koom txoos no pab kom yus kawm tau ntau yam, thiab xav kom Hmoob sib pab sib txhawb ua ib pab ib pawg, vim lub koom txoos no pab kom peb tau sib ntsib sib sau ua ke thiab tsim kev lom zem rau Hmoob.Michael Vue - Hmong Melbourne music festival organiser
Cov kev yog ib tug Hmoob ho zoo li cas?
Michael Vwj hais tias ''Cov kev yog Hmoob yog qhov tias peb txawv - vim peb tsis muaj teb chaws, tab sis peb yeej muaj peb tej culture, tej tsoos, tej kev cai dab qhuas, ces peb yeej txawv me ntsis. Qhov peb txawv no yeej zoo, thiab yog tej yam zoo rau peb tej zejzog, peb txawv thiab ces neeg yeej nyiam thiab.''
Zoov Phab Xyooj hais tias ''Cov kev yog ib tug Hmoob ces peb plaub hau dub, tsis loj tsis siab thiab tab sis peb yeej muaj peev xwm, peb yeej muaj peb tej lus Hmoob, kab lis kev cai thiab peb muaj ntau tsav yam khaws tseg cia ua Hmoob teej tug (qeej, xauv, ncas).''
''Kuv xav kom Hmoob tej hluas mus xyaum hais lus Hmoob thiaj li txawj hais lus Hmoob, ces yus yuav tau mus xyaum thiab mloog dab neeg thiab mus qhia yus cov me nyuam kom lawv txawj xyaum hais lus Hmoob thiab.
''Tej nkauj yog Hmoob tej culture, cov kev hnav Hmoob tej tsoos thiab hais lus Hmoob nqua nkauj Hmoob yeej yog tej yam qhia txog Hmoob lub cim thawj.''
Kuv xav tias tom ntej no xav kom thaum Hmoob muaj tub kis lawm kom lawv nco ntsoov tias lawv yog Hmoob, tsis txhob hnov qab tias yus yog Hmoob, xyaum hais lus Hmoob, hnav khaub ncaws Hmoob thiab qhia yus cov me nyuam kom lawv thiaj paub tias lawv yog Hmoob.Zoov Phab Xyooj - Hmong US singer
Ua li cas thiaj hu tau nkauj tiav raws siab xav
Zoov Phab Xyooj uas yog ib tug tub nqua yas suab tuaj ntawm teb chaws Meskas tuaj koom los koom txoos no ntawm Melbourne kuj tau hais ntau yam lus.
"Kuv hu nkauj los ntev lawm, thiab tab tom pab tej tub ntxhais hluas hu nkauj thiab sau nkauj, vim lawv tsis tau kawm hu nkauj, thiab tsis muaj chaw tiag taw, ces kuv ua lees kais pab qhia lawv,
Raws yus lub hom phiaj
Zoov Phab hais tias yog xav kom hu tau nkauj raws li siab xav ces tsim nyog:
''Yus yuav tsum tau paub yus tus kheej, muaj lub hom phiaj yav pem suab thiab rau siab ua hauj lwm thiaj ncav cuag.''
Zoov Phab thiab Michael xav tias ''yuas siv tej koom txoos no tsim kom muaj cov kev sib cuag sib koom tes ntawm Hmoob tej community ntawm Australia no thiab Meskas los yog txawv teb chaws kom ntau tshaj qub tuaj ntxiv rau yav pem suab, thiab xav kom Hmoob sib txhawb nqa cov Hmoob nyob Australia no.''
Mloog tau xov xwm tshiab ntawm SBS Hmong Thursday 6 pm, Sunday 11 am; saib tau ntawm digital TV tshooj 302 (SBS Radio 2), download SBS Adio app, Facebook, Youtube, Spotify, Podfollow, iHeart Radio, Google Podcast thiab Apple Podcast.
