Thaum uas Amandeep Singh Bhullar thov tau cov skilled work regional visa tuaj txog ntawm Adelaide xyoo 2017 ces nws twb tau totaub zoo txog qee yam uas tsuas muaj tsawg tus neeg Austraia thiaj yuav qhuav pib rov qab los pib txheeb xwb: uas yog cov kev kawm kom paub ua ib yam hauj lwm dab tsi tsi ntsees.
Bathinda yeej tuaj ntawm qaum teb teb chaws Indiaj tuaj, Bhullar los yeej yog ib tug neeg paub txuas hluav taws xob thiab yog tus muaj tej txuj ci no zoo uas yuav khwv tau nyiaj zoo.
Tab sis tom qab yuav laug txog li 10 xyoo no, tus neeg txuas hluav taws xob thiab ua tswv solar business no hais tias ntau xyoo dhau los no nws thiaj nyuam qhuav pom tias ua tau li hais ntawd xwb.
Tus neeg hnoob nyoog 45 xyoos o yeej yog ib tug neeg txuas hluav taws xob uas yeej khwv tua nyiaj ib xyoos twg yuav laug txog li $200,000, thiab yog nws tseem txuas rau tej lagluam thiab tseem ua cov specialist contractor tiab mas tej zaum haj yam yuav khwv tau nyiaj ntau tshaj ntawd ntxiv.
Nws kuj tau ua lagluam nruab tej phiaj ziab tshav tsim hluav taws xob siv thoob xeev South Australia uas yeej khwv tau nyiaj ib hlis twg txij li ntawm $40,000 - $50,000, txawm li cas los tej nyiaj no tsuas yog cov uas tseem tsis tau them se, tsis tau them rau tej nqe yuav tej twj siv, tsis tau them tej nqe ntiav neeg ua hauj lwm, thiab tsis tau them tej nqe ua lagluam.
Qhov yus tsis muaj peev xwm cav tau li ces yog qhov uas tseem muaj neeg xav tau tej neeg paub ua tej hauj lwm no heev.
Bhullar tau qhia rau SBS News tias ''Yeej tseem muaj tej hauj lwm no ua."
Thiab yeej xav tau tej neeg ua hauj lwm no ntau tuaj ntxiv thiab yeej khwv tau nyiaj ntau tuaj ntxiv.
Bhullar zaj dab neeg no thiaj qhia txog cov kev pauv hloov nthuav dav heev txog Australia tej lagluam, uas yeej tseem xav tau tej neeg muaj txuj ci paub ua hauj lwm heev rau lub caij uas tej lagluam khawb peev txheej zoo heev, uas tau haj yam pab kom ua tau tej lagluam vaj tse, tej hauv paus txhim kho, thiab ntau cov projects tsim coj los hloov tej tam sim no kom tau hluav taws xob siv.
Ces thiaj pom tias tej kiab khw lagluam ntiav dag zog thiaj tau muab tej txuj ci saib tseem ceeb ntau tuaj ntxiv.
Tib lub caij no los yeej muaj qee cov kiab khw ntiav dag zog uas tej neeg ua hauj lwm hauv tej office los kuj ib nyuag ntaug zog lawm thiab, rau qhov yeej muaj kev cej luam tias tau ntiav qee yam hauj lwm twg tsawg, vim rau qhov tau muaj tej kawm tiav tshiab coob tuaj ntxiv mus sib tw nrhiav hauj lwm ua.
Tsis tas li ntawd los qee cov hauj lwm los kuj khwv tau nyiaj hauj lwm hauj sim li qub piv rau cov kev khwv tau nyiaj hauj lwm ntau sai tuaj ntxiv tom qab ntxeem dhau tus kab mob kis thoob ntuj.
Tej neeg uas paub ua tej hauj lwm zoo li neeg kho mob, kws lij choj thiab tej kws uas paub ua ib co hauj lwm twg tsi ntsees yog cov uas tseem khwv tau nyiaj ntau heev raws li tej xov xwm tshiab ntawm lub koom haum Australian Bureau of Statistics (ABS).
Txawm li cas los kuj muaj cov kev sib tu ncua rau cov kev khwv nyiaj ntawm tej neeg uas kawm thiab paub ua ib yam hauj lwm dab tsi tsi ntsees thiab kawm tiav qib siab tsawg zujzus tuaj ntxiv rau ib txhia hauj lwm lawm thiab, ces thiaj li ua rau rov qab muaj neeg kub siab txog tias ntau yam txuj ci muaj nqi li cas rau tej kiab khw ntiav dag zog.
Thiaj pom tias tej xwm txheej no thiaj muaj kev cuam tshuam nthuav dav tshaj tej nyiaj uas tej neeg ntiag tug khwv tau lawm thiab (rau qhov yeej cuam tshuam txog cov kev txhim kho lub teb chaws thiab tej lagluam nrog). Lub caij uas Australia tseem tab tom npaj tsim kom tau tej vaj tse ntau tuaj ntxiv thiab xyuas kom tsim tau tej hauv paus txhim kho uas siv cov renewable energy tuaj ntxiv thiab daws tej xwm txheej uas pheej nrhiav tsis tau tej neeg muaj txuj ci paub ua hauj lwm txaus los ua hauj lwm no, kuj tau maj mam muaj cov kev pauv hloov rau haiv neeg no tej kev kawm thiab cov qeb theem khwv nyiaj lawm.
Cov kev pauv hloov no thiaj rov qab muaj kev hloov tej hauj lwm uas tej neeg yuav ua, muaj fwj chim cuam tshuam txog tsoom fwv tej cai, thiab tau ua rau muaj ib lo lus nug tob tshaj qub ntxiv nug tias: tej txuj ci twg thiaj yog cov txuj ci uas tseem ceeb tshaj plaws rau Australia tej lagluam yav pem suab?
Shift showing in training pipelines
Thiaj pom tias cov kev pauv hloov uas tej kiab khw lagluam xav tau tej neeg muaj txuj ci paub ua hauj lwm no thiaj cuam tshuam txog Australia cov system uas xyaum thiab qhia kom tej neeg paub ua hauj lwm, uas tsoom fwv yeej tab tom npaj rov qab los pab kom tsim tau tej neeg muaj txuj ci paub ua hauj lwm kom thiaj muaj peev xwm los tsim kom tau tej vaj tse thiab tej hauv paus txhim kho raws li tej hom phiaj tau teeb tseg.
RAws li tsoom fwv tej xov xwm tshiab uas tau coj los qhia, ces yeej muaj tej neeg Australia coob tshaj 25,000 tus tau mus xyaum kawm ua ib co hauj lwm uas yuav tau siv ib co txuj ci twg tsi ntsees (Apprenticeships) raws li cov Key Apprenticeship Program rau lub caij 10 hli dhau los no, uas tej hauj lwm tsim vaj tse thiab ua luam yog cuam tshuam txog cov kev teev ntaub ntawv nyiaj txiaj yog cov muaj neeg coob heev mus teev npe kawm tshiab.
Lub caij 7 hli ntuj xyoo 2025 txog rau lub 4 hlis ntuj xyoo 2026 no ces twg muaj tej neeg mus kawm carpentry apprenticiships yog cov kawm coob txog ib feem peb ntawm cov program li tau teev txog no. Ua ke no los kuj muaj tej neeg kawm txuas dej (5,330 tus) thiab muaj tej neeg kawm txuas hluav taws xob (4,832) tus thiab.
Raws li tej xov xwm uas tau los ntawm lub koom haum National Centre for Vocational Education Research hais, ces tos ho muaj tej neeg mus kawm coob ntxiv tuaj los twb vim yog rov qab pib muaj cov kev los xyaum qhia tej neeg kawm ua tej hauj lwm no, ces lub caij peb hlis txog rau lub 9 hli ntuj xyoo 2025 thiaj ua rau muaj tej neeg kawm apprentice ua ib co hauj lwm twg ntau tuaj ntxiv yuav laug txog 18 feem pua piv rau xyoo ntxov dua ntawd.
Txawm li cas los raws li tsoom fwv pawg kws Jobs and Skills Australia (JSA) uas tau nyiaj pab mus ua cov kev teeb txheeb txog cov kev qhia tej neeg ua hauj lwm nrog lwm yam teeb meem ces kuj tau txheeb tau thiab qhia meej lawm tias Australia yeej tseem muaj tej teeb meem tu ncua nrhiav tsis tau tej neeg paub ua hauj lwm txaus siv rau lub caij uas Australia muaj tej neeg no tsis txaus siv thiab.
JSA tej xov xwm yeej qhia tias yeej muaj tej neeg paub ua cov hauj lwm contructions thiab trade 18 hom tsis txaus siv rau ib lub caij twg txij xyoo 2021 thiab 2025, suav cov hauj lwm tseem ceeb li neeg txuas hluav taws xob, neeg txuas dej, neeg txuas ntoo uas tsev, neeg puab pob zeb ci ua tsev thiab tej neeg vov vuas tsev.
Claire O'Neil uas yog tus nom tswj dej num vaj tse tau qhia txog cov kev los qhia kom tej neeg paub ua cov hauj lwm no nthuav dav tuaj ntxiv yog ib co tseem ceeb ntawm tus tsoom fwv no tej hauj lwm vaj tse.
Nws tau nthuav ib co xov xwm tawm tias "Yog tias peb xav tsim kom tau tsev ntau ntxiv, ces peb yuav tsum muaj tej neeg paub ua tej hauj lwm ntau yam ntxiv, tej no yog cov program uas peb tab tom pab $10,000 rau tej tswv lagluam kom ua tej hauj lwm no."
Tsoom fwv tej cai thiab tej xov xwm yeej qhia tias muaj ib co kev pauv hloov nthuav dav heev uas yuav tau xub kub siab txog ua ntej, thiab cov kev kawm kom paub ua ib co hauj lwm tsi ntsees yog ib co tseem ceb ntawm Australia tej tswv yim npaj tseg los pab nws tej lagluam tsis yog lawm txoj xub ke kawm txuj.
Tsis muaj neeg ua hauj lwm txaus ua rau tau nyiaj hauj lwm ntau ntxiv
Txawm tias tej xwm txheej nrhiav tsis tau tej neeg paub ua hauj lwm txaus los ua hauj lwm ib nyuag ntaug zog thoob Australia txij li tom qab tau ntxeem dhau kab mob COVID lawm uas muaj neeg ua hauj lwm tsawg, los yeej tseem xav tau tej neeg ua hauj lwm trades ntau li qub.
Raws li lub koom haum JSA tej xov xwm tshiab qhia ces yeej tseem muaj tej neeg no tsis txaus siv txog li 29 feem pua xyoo 2025 — uas ib nyuag tsawg zog piv rau 33 feem pua xyoo 2024, thiab muaj tsis txaus siv ntau tshaj plaws txog 36 feem pua xyoo 2023.
Txawm li cas los tej hauj lwm tsim vaj tse no ces yeej txheeb tau tias muaj tej neeg ua tej hauj lwm no raug txheeb tau tias muaj tsawg yuav laug txog li ib nrab uas muaj tsis txaus siv — hais tsi ntsees rau tej uas tseem yuav tau kawm ntau xyoo thiab kawm xyaum kom paub ua ib co hauj lwm twg tsi ntsees uas yuav kawm kom tiav.
JSA cov kev tshuaj ntsuam 2025 Occupation Shortage qhia tias tej neeg ua cov hauj lwm ua muaj tej txuj ci theem 3 (Skill Level 3 occupations) — uas teev ntau yam neeg ua hauj lwm trades thiab tej technicians — ces yog cov uas nrhiav tau tsawg tshaj plaws los ua hauj lwm pab tej lagluam.
Ces thiaj muaj tej xwm txheej nrhiav tsis tau neeg ua tej hauj lwm no phem tshaj qub ntxiv vim xav tau tej neeg ua hauj lwm no ntau tshaj qhov yuav muaj peev xwm nrhiav tau neeg los ua hauj lwm lawm.
Andrew Giles uas yog tus nom tswj tej dej num Skills and Training hais tias yeej tau los daws tej xwm txheej no lawm, tab sis kuj tseem muaj kev sib tu ncua loj kawg nkaus li thiab.
Nws qhia rau SBS News tias ''Peb yeej tab tom los tswj tau tej xwm txheej no zoo tuaj ntxiv lawm, tab sis kuj tseem muaj cov kev sib tu ncua loj kawg nkaus ntawm peb tej kiab khw lagluam ntiav dag zog, hais tsi ntsees txog qee cov neeg muaj txuj ci uas paub ua hauj lwm (Skilled trades)."
Giles hais tias yog xav kom ua tau tej vaj tse li tsoom fwv xav ua ces yuav tsum tau xyuas kom nrhiav tau tej neeg ua tsev kom ntau tuaj ntxiv, vim li ntawd tej nom tswv thiaj tau kub siab heev txog cov kev hais kom tej neeg mus kawm xyaum ua tej hauj lwm no, npaj cov sob kawm TAFE uas kawm dawb, thiab npaj cov kev qhia kom tej neeg kawm tau thiab paub ua tau tej hauj lwm no zoo, thiab muaj cov kev lees paub tej neeg tsiv teb tsaws chaw tej txuj ci kom sai tshaj qub ntxiv.
Nws hais tias "Peb lees paub tias tej no yeej nyuaj, thiab tsis yog tib lub tswv yim nkaus xwb yuav cia li daws tau tej teeb meem no. Vim yuav tau kub siab tiag, siv dag zog tiag nrog xyuas uas yog ib co hauj lwm tseem ceeb heev ntawm peb tus tsoom fwv no."
Vim li cas tej nyiaj hauj lwm thiab sib txawv tsawg zujzus
Lub tswv yim uas tseem xav tias university degree thiaj ib txwm yuav khwv tau nyiaj ntau dua yog ib lub uas ntshe yuav tsis tshua muaj peev xwm siv tau txuas ntxiv lawm.
Giles hais tias "Tau ntev heev lawm uas yeej muaj neeg Australia coob heev tau pom tias cov skilled trades yog lwm txoj xub ke xaiv rau lawv lawm thiab."
Nws cav tias cov kev xav qub li no cov nyom nrog qhov tseeb ntawm Australia tej kiab khw lagluam ntiav dag zog lawm.
Nws hais tias ''Qhov kuv xav hais ces ntshe yuav tsis muaj qhov tias kawm qib siab zoo dua kawm cov hauj lwm vocational ntxiv lawm."
Ob co hauj lwm no yeej tseem ceeb tib yam lawm.
Raws li ABS tej xov xwm teev txog tej nyiaj hauj lwm uas khwv tau theem nrab xam raws limtiam ces yeej tseem pom tias tej neeg ua hauj lwm hauv office thiab ua lwm yam hauj lwm tseem yog cov khwv tau nyiaj ntau dua. Tej neeg ua hauj lwm professional, scientific thiab technical services ces yeej khwv tau nyiaj xam raws tus zauv nrab ib limtiam twg tau txog li $2,376, hos tej neeg ua hauj lwm cuam tshuam txog nyiaj txiaj thiab tuav pov hwm (Insurance services) ces tsus tau $2,339 xwb. Tej neeg ua hauj lwm ua vaj tse ces tau txog li ntawm $1,958 ib limtiam twg.
Hauv ntaub ntawv ces yeej tseem teev tias cov neeg ua hauj lwm hauv office (white-collar jobs) tseem yog cov khwv tau nyiaj ntau dua, tab sis yog xam raws tus zauv nrab lawm ces tej zaum kuj yuav zais tej yam dab tsi tseem ceeb uas sib txawv ntawm tej lagluam ntau yam thiab.
Tej hauj lwm uas tsim tej services suav ib tug twg txij li yog tus kws lij choj ua hauj lwj ntev, tus neeg sab laj, tus coj uas nyuam qhuav kawm tiav tsis ntev no uas nyuam qhuav pib ua lawv tej hauj lwm.
Hos yog tham txog tej hauj lwm tsim vaj tse ces suav tej neeg tseem kawm thiab xyaum ua ib co hauj lwm twg, thiab cov neeg uas tseem pib ua hauj lwm nrog tej tradies uas twb paub ua hauj lwm lawm, tej subcontractors thiab tej tswv lagluam ces yog cov uas khwv tau nyiaj ntau dua.
Cov kev pauv hloov tseem ceeb dua tsis yog cov kev pauv hloov ntawm tej lagluam tab sis yog cov kev pauv hloov ntawm tej txuj ci paub ua hauj lwm.
Yog tias muaj ib co neeg muaj txuj ci paub ua ib co hauj lwm twg tsawg siv, ces tej neeg ua hom hauj lwm ntawd yeej yuav khwv tau nyiaj ntau tuaj ntxiv — tsis hais txoj hauj lwm ntawd xav tau tej neeg kawm qib siab los yog kawm TAFE li.
Thiab yog muab saib rau qhov dav dav lawm, ces tseem pom tias zoo li yeej tseem khwv tau nyiaj hauj lwm tsis tau ntau thoob plaws ntawm tej lagluam li.
Shane Garrett uas yog tus chief economist ntawm lub koom haum Master Builders Australia, uas yog lub koom haum loj uas saib xyuas tej lagluam building and construction industry hais tias muaj pov thawj tsawg heev qhia tau tias muaj cov kev khwv tau nyiaj hauj lwm ntau sib txawv deb heev teeb plaws ntawm ntau cov lagluam li.
Nws qhia rau SBS News tias "Thoob plaws rau tej lagluam ces tej nyiaj hauj lwm khwv tau ib teev twg tsuas khwv tau ntau tuaj ntxiv txog li 3.3 feem pua los txog rau lub 3 hlis ntuj xyoo 2026 no xwb."
Garret hais tias yeej pom tias zoo li no thoob plaws rau txhua 18 hom lagluam, uas khawv tau tej nyiaj hauj lwm txij li ntawm 2.8 mus txog 4.3 feem pua xwb. Hos ntev ntxiv tuaj los yeej muaj ntsis sib xws li no ua ntuv zus thiab.
Txawm yuav khwv tau cov nyiaj hauj lwm ntau tuaj ntxiv muaj ntsis sib xws thoob plaws rau ntau cov lagluam los txhais tsis tau tias tej neeg ua hauj lwm yuav khwv tau nyiaj tib yam. Thiab tej neeg tseem khwv tau nyiaj sib txawv.
Giles hais tias "Tej neeg yeej pom tias khwv tau nyiaj zoo heev rau cov hauj lwm skilled trades, thiab tam sim no yog ib txoj xub ke uas tej neeg kub siab txog heev."
Tej no thiaj yog qhov dav dav ntawm cov kev totaub txog tias muaj cov kev hloov rau cov kev kawm thiab tej nyiaj uas khwv tau li cas lawm.
JSA tej xov xwm yeej qhia tias muaj ib co neeg kawm vocational qualification rau cov hauj lwm engineering, mining thiab technical trades yog cov khwv tau nyiaj ntau dua $100,000 ib xyoos twg, ces muaj qee tus thiaj khwv tau nyiaj ntau dua tej kawm tiav qib siab uas nyuam qhuav pib ua hauj lwm ntau yam.
Txhais tsis tau tias yuav ua rau tsis muaj neeg xav kawm qib siab lawm thiab. Cov kev kawm tiav qib siab tseem yog ib co uas khwv tau nyiaj ntau tshaj plaws rau ntau cov hauj lwm, hais tsi ntsees rau tej neeg kawm kho mob, cai lij choj thiab ua tej coj tseem ceeb ntawm tej tuam txhab lagluam.
JSA ib tsab ntawv cej luam xyoo 2025 tau kwv yees tias yuav muaj cov kev ntiav neeg ua hauj lwm ntau tshaj 90 feem pua rau lub caij 10 xyoo ntxiv no rau tej neeg uas kawm tiav ib co txuj ci twg tom qab kawm tiav xyoo 12. Thiab kuj tau kwv yees tias tej neeg ua tej hauj lwm no tshaj 54 feem puas yog cov uas yuav tsum kawm kom tiav qib siab (Bachelor degree los yog siab tshaj ntawd), hos tshaj 40 feem pua ces yog cov uas kawm cov vocational education, thiab cov kev xyaum thiab kawm kom paub ua hauj lwm no yog ib txoj xub ke tseem ceeb.
Vim li cas AI thiaj tab tom hloov tej hauj lwm thiab trades lawm
Lwm yam uas tab tom hloov tej kiab khw lagluam hauj lwm ces yog artificial intelligence (AI).
Lub koom haum Organisation for Economic Co-operation and Development (OECD) cov kev teeb txheeb txog AI thiab cov kev nrhiav neeg ua hauj lwm qhia tias AI yuav muaj feem tseem ceeb tshaj plaws rau ib co dej num twg tsi ntsees ntawm ib co hauj lwm twg, tsis yog yuav cuam tshuam tag nrho rau tej hauj lwm — hais tsi ntsee txog tej num uas yuav tau ua tas mus li, tej num uas yuav tau tshuaj ntsuam thiab txheeb, los yog cov hauj lwm content-based work.
Ua ke no los JSA cov kev teeb txheeb Generative AI Capacity Study yeej qhia tias yuav tsis muaj cov kev siv AI los hloov xwm yeem rau neeg Australia txhua cov neeg ua hauj lwm thiab tsuas nyob rau ntawm seb tej neeg ho ua hom hauj lwm twg xwb.
Yog peb xaus lus ces yeej muaj pov thawj qhia tias AI tab tom ua rau muaj cev pauv hloov kho ntau tej hauj lwm ntau dua qhov AI yuav raug siv los hloov los ua tej hauj lwm — tab sis yeej yuav tsis muaj teeb meem sib paug zos rau cov kev pauv hloov no thiab.
Yeej muaj tej hauj lwm ntawm ntau hom hauj lwm ces yeej ua tej qub tas mus li xwb, tej no ces yog tej uas yuav raug tej tshuab tooj tshuab hlau ua los yog cov twj AI pab ua ntau tshaj plaws lawm.
Hos tej neeg ua cov hauj lwm trades ces tseem yuav tau siv dag zog, yuav tau daws tej teeb meem rau ntawm ib qho chaw ua hauj lwm kiag, yuav tau hloov thiab yoog raws tej xwm txheej uas tsis muaj peev xwm twv tau tias zoo li cas — uas yog tej xwm txheej uas tej digital technology muaj peev xwm qog ua tau nyuaj dua.
Tej kws txuas hluav taws xob ces yuav txuas ib co hluav taws xob twg siv, tej neeg txuas dej ces kuj yuav txheeb seb tej dej paim los yog puas li cas ntawm tej tsev qub, hos tej neeg uas tswj cov kev ua vaj tse ces yog cov yuav tau sib txuas lus rau ntawm tej chaw ua vaj tse uas tej zaum yuav hloov siv tej twj los yog los yog hloov siv tej twj tshiab, tab sis tej hauj lwm feem ntau ces yeej tseem yuav tau siv dag zog li qub.
Bhullar tshab txhais kom sawv daws nkag siab yooj yim tias: "AI tau ua rau muaj tej technology tshiab rau peb siv ua peb tej hauj lwm lawm, tab sis AI yeej tsis muaj peev xwm hloov tau peb. Vim tseem yuav muaj ib tug twg los nruab rau peb siv, los tswj thiab los kho."
Cov kev tsiv teb tsaws chaw thiab shortage economy
Txawm muaj cov AI thiab tej kiab khw ntiav dag zog li muaj tam sim no siv los ntshe yeej tsis muaj peev xwm yuav daws tau tej kev nrhiav tau tej neeg paub ua hauj lwm tsis txaus los siv, tej economists thiaj hais tias ntshe tseem yuav tau siv cov skilled migration txuas ntxiv los ua ib cov kev pab tseem ceeb, hais tsi ntsees rau cov neeg ua hauj lwm tsim vaj tse thiab ua ntau yam lagluam, vim rau qhov tej chaw qhia thiab xyaum tej neeg ua hauj lwm yeej tsis muaj peev xwm tsim tau tej neeg no txaus coj los siv raws li qhov xav tau.
Garrett tej system uas muaj siv tam sim no tseem npaj tej neeg tsis tau raws li tej lagluam tsim vaj tse xav tau.
Tseem yog ib co system uas npaj tsis tau zoo, kim heev thiab muaj cov kev lees paub tej neeg tej txuj ci (skills recognition) qeeb heev.Shane Garrett, chief economist at Master Builders Australia.
Nws hais tias tseem tsis tau kub siab tos tej neeg paub ua tej neeg tsiv teb tsaws chaw uas paub ua ntau yam hauj lwm tuaj ua hauj lwm, tsis tas li ntawd los Australia yeej tseem tsis tau ua tib zoo siv tej neeg tsiv teb tsaws chaw uas muaj txuj ci uas twb tuaj nyob ntawm lub teb chaws no kom tau txais txiaj ntsim yam puv npo raws li qhov tsim nyog thiab.
Nws thiaj cav tias qhov teeb meem nyuaj mas cuam tshuam txog cov kev teeb tsa tsis yog ib co system uas kom siv tau zoo xwm yeem.
Nws hais tias "Cov kev kub siab los xyaum qhia tej neeg kom paub ua hauj lwm yeej yog tej yam tsim nyog ua tab sis yeej tsis muaj peev xwm yuav nrhiav tau tej neeg muaj txuj ci paub ua hauj lwm uas twb muaj tsis txaus siv coj los siv lawm. Yog li ntawd tej neeg tsiv teb tsaws chaw uas muaj txuj ci thiab paub ua hauj lwm thiaj tsim tsim nyog yog ib feem ntawm tej cai tswj kev tsiv teb tsaws chaws (Immigration policy),''
Giles hais tias tsoom fwv yeej tab tom npaj kom ua tau raws li tej xub ke li hais ntawd, uas xyuas kom tos tau tej neeg tsiv teb tsaws chaw paub ua vaj tse tuaj ua hauj lwm.
Nws hais tias "Peb yeej tab tom pom tias tau pub visa rau tej neeg paub ua vaj tse ntau kawg nkaus li."
Txawm li cas los cov kev tsim tej vaj tse, tej hauv paus txhim kho (infrastructure) thiab tej energy projects los yeej tseem tab tom sib tw nrhiav tib co neeg muaj txuj ci paub ua hauj lwm uas tsuas muaj tsawg tsawg no siv xwb thiab.
Ces tej neeg ua hauj lwm li Bhullar uas tau tuaj txog teb chaws Australia uas xav tau tej neeg muaj txuj ci paub ua hauj lwm thiab kuj tseem muaj tej xwm txheej nrhiav tsis tau tej neeg li hais no txaus los ua hauj lwm thiaj ua rau nws khwv tau nyiaj ntau heev. Tab sis yeej tseem muaj kev sib tu ncua rau tej txuj ci uas tej lagluam xav tau thiab tej neeg ua hauj lwm uas muaj peev xwm cob qhia kom paub ua tej hauj lwm no kuj ua rau tej nqe kim tuaj ntxiv, ces thiaj ua rau tej tswv lagluam xav nrhiav tej neeg muaj txuj ci paub ua hauj lwm uas Australia tseem tsis tau muaj peev xwm nrhiav tau txaus siv no.
Mloog tau xov xwm tshiab ntawm SBS Hmong Thursday 6 pm, Sunday 11 am; saib tau ntawm digital TV tshooj 302 — SBS Radio 2; download SBS Adio app, caum SBS Hmong ntawm Facebook, mloog tau Youtube, Spotify, Podfollow, iHeart Radio, Google Podcast thiab Apple Podcast.
