Vim li cas peb thiaj khaws tej khoom uas tej zaum lwm tus mub pov tseg?
Tau muaj plaub tug neeg ntawm zos Logan tau coj lawv tej khoom lub koom txoos Kerbside Nation, thiab tej lus teb ntawd tseem muaj lus teb tob tshaj lo lus nug no lawm thiab. Vim tej khoom ntawd yog tej yam qhia txog ib tug twg tsev neeg, kab lis kev cai, ntau yam tseem ceeb, cim thawj, ib tug twg tej dab neeg thiab tej cim thawj. Yog li tej khoom uas lwm tus saib tsis khuab qhov muag thiaj yog tej uas tseem ceeb heev rau ib co neeg twg.
Lub koom txoos Kerbside Nation uas ua ntawm Living Museum of Logan no yog tej yam rov qab ua rau tej neeg ntiag tug muaj cov kev xav txawv rau lawv tej khoom lawm.
Vajhuam Anthony Vwj uas yog tus koom tswj lub koom txoos no hais tias:
lub koom txoo no xav kom tej neeg saib tej khoom ib puag ncig yus thiab nug tias seb ho qhia tau dab tsi txog ib co neeg, tej chaw los yog tej khoom uas ib tug twg ua tswv, qhia txog tej kev nco, tej dab neeg thiab tej keeb kwm ntawm yam khoom ntawd. Thiab xav kom tej neeg Logan qhia lawv tej dab neeg tsis yog yuav tsim artworks qhia txog lawv,Vanghoua Anthony Vue
'Kuv tau koom tes nrog tej neeg zos Logan tham thiab xeeb seb yam khoom twg lawv yuav khaws cia, yuav siv los yog yuav pov tseg, tej khoom no yog ib qho chaw pib sib tham, qhia txog ib zaj dab neeg thiab kuj muaj peev xwm siv coj los tsim tej artwork tshiab,'
'Tej txiaj ntsim tseem ceeb tshaj plaws ntawm lub koom txoos no yog pub cib fim rau tej neeg pom txog lawv lub neej, tej dab neeg thiab muaj kev sawv cev rau lawv ntawm tej art thiab kab lis kev cai.'
Yog li ntawd tej khoom muaj txiaj ntsim tshaj nyiaj txiaj thiab ntiag tug tej dab neeg uas coj mus tso rau ntawm Living Museum of Logan qhia txog qhov tseem ceeb ntawm tej khoom uas qhia txog ib co cim thawj thiab qhia txog tias yog ib feem ntawm ib lub zejzog twg.
Txawm tias ntau yam khoom (Tape Cassette recorder, nruas, nyiaj txiaj kis laus, qav tooj thiab tsheb motorbike etc) yog tej khoom uas tej zaum yuav tsis tsua muaj nqe sab seem nyiaj txiaj pes tsawg los yeej yog tej khoom uas tseem ceeb heev rau tej neeg no cov kev xav uas ua rau lawv xav khws tej khoom no tseg cia.
Ntawm peb lawm ces tej txiaj kis laus no tsis yog ib co khoom qub xwb, tab sis yog tej yam qhia txog tej keeb kwm tiag uas peb tsev neeg tau ua lub neej nrog dhau los.Magaret Xiong
Alice Hinton uas yog tus co-curator ntseeg tias lub koom txoos no yog tej yam qhia txog ib tug twg tej khoom tias muaj kev sib cuag nrog ib co tsam thawj tseem ceeb ntawm ib tug twg lub neej.
Tsis tas li ntawd los Alice kuj hais ntxiv tias ''Vajhuam Anthony Vwj yeej xav kom sawv daws ras txog lub tswv yim tej khoom uas lwm tus yuav pov tseg kuj tseem muaj lwm tus yuav muaj peev xwm rov qab mus siv dua los yog siv ua lwm yam ntxiv. Thiab ib tug twg yam khoom uas lawv tsis xav tau tsis xav yuav lawm kuj tseem yog tej yam khoom muaj nqi rau lwm tus,''
"Txuas ntxiv ntawd los nws kuj yuav siv tej khoom uas tej neeg muab pov tseg ntawm tej ntug kev (Kerbside recycling items) coj mus ua sculpture mus display ua art thiab. Vajhuam thiaj xav kom tej neeg sawv daws tig ntawm lub tswv yim uas pheej yuav muab tej khoom pov tseg coj rov qab los siv dua ib zaub ntxiv thiab lub kom tau coj mus faus kom tsawg, ua kev pov puag peb tej ib puag ncig.''
''Peb sawv daws nyias yeej muaj nyias ib yam khoom tseem ceeb ntawm tsev uas tsim nqi heev thiab muaj txiaj ntsim rau peb siab ntsws uas xav tso cia rau ntau phaum neeg tom ntej, ces ib yam khoom twg los yeej muaj nqi tib yam li ib daim duab kim thiab,''
Lub hom phiaj ntawm lub koom txoos Kerbside Nation Exhibition ntawm Living Museum of Logan no ces yog peb xav kom tej neeg tuaj koom ras tias muaj tej khoom dab tsi ntawm kuv tsev uas tseem ceeb heev rau kuv, kuv muaj peev xwm yuav rov qab siv li cas los yog coj mus siv ua tau dab tsi, thaum tej neeg tuaj xyuas cov exhibition no ces peb xav kom tej neeg xav txog qhov no.Co-curator of Kerbside Nation Exhibition at the Living Museum of Logan - Alice Hinton
Qhov tseem ceeb ntawm lub koom txoos no yog tej yam uas yeej sib cug tau nrog lwm tus. Uas cia siab tias tej neeg uas tau mus xyuas tej khoom no yuav pom txog ib lub zeem muag ntawm lawv tej dab neeg txog lawv tej khoom qub ntawm lawv tsev tsis hais yog tej duab, ib yam khoom ua si thaum tseem yau, zuag ntsis plaub hau, ib yam khoom dab tsi uas ib tug twg nyiam.
Cov kev qhia txog tej dab neeg txog tej khoom ntawm plaub tug neeg zos Logan no qhia txog tej kev nco, kab lis kev cai, cim thawj, keeb kwm thiab kev tsiv teb tsaws chaw cuam tshuam txog tej khoom uas lawv xav khaws tseg cia no.
Kerbside Nation Exhibition thiaj yog ib lub koom txoos tseem ceeb tshaj qhov coj tej khoom mus tso rau sawv daws saib thiab qhia txog tej neeg lawm xwb. Vim yog tej yam qhia kom peb ras txog tias tej khoom uas peb khaws ceev tseg cia yeej yog tej uas ib txwm qhia tias peb yog leej twg, peb tuaj qhov twg tuaj thiab muaj tej dab tsi cuam tshuam txog tej khoom ntawd uas peb xav qhia kom ntau phaum neeg yav pem suab nco cia.
Mloog tau xov xwm tshiab ntawm SBS Hmong, download SBS Adio app, caum SBS Hmong ntawm Facebook,mloog tau Youtube, Spotify, Podfollow, iHeart Radio, Google Podcast thiab Apple Podcast.
