Dab tsi yog qhov nyiaj tshaj plaws ntam cov kev qhia thiab kawm ntawv Hmoob? Dr Nkauj Hli Yaj tawm tswv yim txog nqe no.
"Peb Hmoob mas AI tseem tsis tau paub hais lus meej. Qhov no yog qhov nyuaj tshaj plaws rau peb vim tias peb yog ib haiv neeg me. Google los sis OpenAI los sis Google AI lawv tsis muaj lus Hmoob. Ces peb tseem tsis tau muaj cov neeg tsim AI uas hais tau lus meej meej, es peb cia li mus hauv Gemini es cia li ua li Fabkis los yog Meskas es peb sau peb cov lus kiag ces cia li ua kiag daim video rau peb kiag nas, peb tseem tsis tau muaj qhov no. Hnub twg peb muaj cov no, peb muaj cov AI txawj txhawj hais lus Hmoob zoo zoo mas, nws haj yam pab peb kom peb txawj qhia ntawv tshaj rau peb cov me nyuam.
''Yog ib qho tseem tseem ceeb yuav tsum tau hais rau cov niam cov txiv kom lawv nkag siab nawb. AI pauv tsis tau cov nai khu (lees kais) nawb, qhov no yog ib qho tseem ceeb tshaj plaws. AI pab cov me nyuam kom kub siab kawm ntawv, kom nyiam kawm ntawv, kom pom hais tias cov lus ntawd muaj tej yam pab lawv kom lawv hais lus meej tshaj, vim tias AI mas nws tsuas pab yus xwb, yam li Hmoob hais yog ib yam cuab yeej xwb. Pab yus tsim ub tsim no, tab sis qhov zoo, qhov phem, qhov yog qhov tsis yog qhov txawj qhov ntse yuav tsum yog tus xibfwb yog tus neeg qhia es cov me nyuam thiaj txawj ntse.''
Dr Nkauj Hli tseem hais ntxiv tias, qhov nyuaj tshaj plaws ntawm cov kev qhia thiab kawm ntawv Hmoob mas yog qhov tias, Hmoob muaj 8 lub suab, tej xibfwb tsis kawm linguist, tsis paub qhia, tsis paub txog Hmoob txoj kev ua lub neej (kab lis kev cai zoo), tsis kam kawm kom paub thiab tshaj lij tshaj qub ntxiv, tsis xav qhia ntawv, thiab paub li cas qhia li ntawd xwb ces thiaj qhia tsis tau ntawv Hmoob zoo. Vim Dr Nkauj Hli yeej yog ib tug paub 8 hom lus, kawm tiav linguist, pedagogy thiab anthropoligy, thiab yeej paub qhia ntawv Fabkis thiab ntawv Hmoob los tau ntau caum xyoo ces nws thiaj paub qhia.
Tsis tas li ntawd los nws tseem hais ntxiv tias, 'tsis muaj tej ntaub ntawv (resources) li cov phau ntawv Hmoob, uas seb tej xib fwb puas tau nyeem, tej me nyuam kawm kom tau saib tau pom tej duab thiaj kawm tau nco tau ntawv Hmoob zoo. Tsis tas li ntawd los yog tim tej niam txiv tsis hais lus Hmoob rau lawv tej me nyuam ces thiaj ua rau tej me nyuam kawm tsis tau ntawv.'
Nws hais tias ''yog peb txawj lus Askiv thiab tseem paub lus Hmoob thiab ces yuav ua rau peb txawj ntse tshaj lwm tus."
Mloog tau xov xwm tshiab ntawm SBS Hmong, download SBS Adio app, caum SBS Hmong ntawm Facebook,mloog tau Youtube, Spotify, Podfollow, iHeart Radio, Google Podcast thiab Apple Podcast.
