Australia cov kev txheeb pej xeem xyoo 2026 poob rau hnub zwj Quag (Tuesday) zwj thaj tim 11 lub 8 hli ntuj, thiab txhua leej txhua tus ntawm Australia yuav raug suav. Tej xov xwm tau los ntawm cov kev txheeb pej xeem no yuav coj los siv txheeb kom peb totaub tias peb nyob qhov twg, peb hais tej lus dab tsi ntawm peb tsev (Suav tej lus piav tes nrog), tsim nyog tsim cov kev pab cuam dab tsi uas peb xav tau siv thiab seb Australia tab tom muaj kev pauv hloov li cas tam li yog ib haiv neeg. Cov kev raug suav yuav ua tib zoo xyuas kom koj tej zejzog, kom tej kab lis kev cai thiab kev ntseeg tau txais kev sawv cev. Ntxiv no yog tej uas tsim nyog koj paub txog cov kev sau daim ntawv txheeb pej xeem rau koj tsev neeg.
Ntsiab lus:
- Cov kev txheeb pej xeem no yog ib co uas txhua leej txhua tus yuav tsum tau sau rau hmo txheeb pej xeem (11/08/2026).
- Koj tej lus teb yuav pab tej koom haum tsim kev pab cuam kom totaub tias seb tam sim no kom xav tau kev pab dab tsi, thiab tej zaum ho yuav muaj cov kev pauv hloov li cas rau cov kev xav tau kev pab no li cas rau yav pem suab.
- Tsis hais tej xov xwm ntawm ib tug twg uas koj teev rau hauv daim ntawv txheeb pej xeem no yuav ua tib zoo khaws kom tau txais kev ruaj ntseg thiab yuav tsis muaj peev xwm coj los siv txheeb koj.
- Tej xov xwm tau los ntawm cov kev txheeb pej xeem no yuav yog ib co tseem ceeb rau ntau cov kev txiav txim siab los tsim tej kev pab cuam uas yus tej zejzog yuav tau siv.
- Puas yog tias cov kev txheeb pej xeem no tsuas yog cov kev suav tej neeg nkaus xwb?
- Leej twg yuav tsum tau sau daim ntawv txheeb pej xeem?
- Yog tias kuv tsis nyob tsev rau hmo txheeb pej xeem ne?
- Lawv yuav nug tej lus nug dab tsi rau kuv?
- Yog tias kuv muaj kev txhawj xeeb txog kuv ntiag tug tej xov xwm tias yuav coj mus siv li cas ne yuav ua li cas?
- Vim li cas thiaj tseem ceeb heev uas teb tej lus nug txheeb pej xeem kom raug?
- Tej xov xwm txheeb pej xeem ho yuav pab tau tej zejzog coj ntseeg ntau yam kab lis kev cai li cas?
- Puas muaj cov kev pab sau tej ntawv txheeb pej xeem no?
Puas yog tias cov kev txheeb pej xeem no tsuas yog cov kev suav tej neeg nkaus xwb?
Txhua txhua tsib xyoos ib zaug twg ces lub koom haum Australian Bureau of Statistics (ABS) yeej suav txhua tus neeg thiab tej cuab yig ntawm Australia ib zaug twg. Tej no yog cov kev txheeb pej xeem thiab tej cuab yig uas paub tias yog cov kev txheeb pej xeem (Census).
Tej xov xwm uas khaws tau ntawd yuav pab tsim tej kev pab cuam rau yus tej zos los yog tsim tej kev pab cuam uas yus lub zejzog yuav tau siv.
Emily Walter uas yog ABS tus kis tswj cov kev txheeb haiv neeg no tej pej xeem hais tias cov kev txheeb pej xeem yog ib co kev khaws tej xov xwm ntau tshaj paws ntawm Australia thiab yog cov kev qhia txog lub teb chaws no tej statistics uas tseem ceeb tshaj plaws.
Wlter hais tias "Yog tej xovxwm qhia tias peb yog leej twg, .... thiab qhia tias peb tab tom muaj kev pauv hloov li cas rau ib lub caij twg. Cov kev txheeb pej xeem yuav ntug tej lus nug txo gpeb cov kev noj qab nyob zoo, kev kawm, peb tej kab lis kev cai, thiab peb tej kev ua hauj lwm, uas tag nrho tej xov xwm no yuav qhia tau qhov dav dav tias peb lub teb chaws Australia no tej lagluam, peb tej zejzog thiab peb tej kab lis kev cai zoo li cas."
Tej xov xwm tau los ntawm cov kev txheeb pej xeem no kuj yuav pab ua tib zoo xyuas kom peb tsim tau tej kev pab cuam raug thiab tsim tej hauv paus txhim kho uas muaj rau tej neeg ntiag tug, rau tej cuab yig thiab rau tej zejzog tau siv rau ntawm thaj chaw twg los yog thaum twg uas lawv xav siv. Tej no suav cov kev pab cuam txhais lus/txhais ntawv, tsim teej kawm, tsim kev kho mob, tsim cov community programs, tsim tej public transport thiab tsim cov kev pab cuam rau tej neeg pib neej tshiab ntawm Australia.
Leej twg yuav tsum tau sau daim ntawv txheeb pej xeem?
Txhua tus neeg nyob ntawm Australia rau hmo txheeb pej xeem zwj thaj tim 11 lub 8 hli ntuj xyoo 2026 no yuav tsum tau raug suav.
Thiab yuav tsum tau sau cov ntawv txheeb pej xeem. Txhais tau tias txhua yim neeg yuav tsum tau koom, thiab ib tug twg yuav tsum raug teev rau ib daim ntawv txheeb pej xeem.
Ms Walter hais tias "Txhais tias yeej suav/teev tej tub kawm pej kum haiv, tej neeg tuaj xyuas/ntoj ncig Australia, tej neeg thov tau ib hom visa twg siv, tej me nyuam mob liab tib si nrog tib si. Vim ib txhia neeg ces tsis nco teev txog lawv tej me nyuam mos ab nrog lawv daim ntawv txheeb pej xeem!"
Thaum sau daim ntawv txheeb pej xeem no rau koj tsev neeg rau hmo txheeb pej xeem, ces koj yuav tsum tau teev txhua tus neeg uas nyob ntawm koj tsev nrog.
Yog tias kuv tsis nyob tsev rau hmo txheeb pej xeem ne?
Yog tias koj mus txawv teb chaws rau hmo txheeb pej xeem (11/08/2026), ces koj tsis tas sau daim ntawv txheeb pej xeem.
Tab sis yog tias koj tsuas mus ntoj ncig ntawm teb chaws Australia xwb, piv txwv li mus camping los yog mus so ntawm koj tej phooj ywg xwb, ces koj yuav tau sau daim ntawv txheeb pem xeem no tsis hais koj yuav nyob qhov twg li. Cov kev txheeb pej xeem no yeej muaj ib lo lus nug tias seb koj ib txwm nyob qhov twg.
Koj tsis tas sau daim ntawv txheeb pej xeem no kiag rau hmo txheeb pej xeem, tab sis koj tej lus teb yuav tsum qhia tias koj nyob qhov twg rau hnub tim 11/08/2026. Thiab koj yeej muaj peev xwm sau daim ntawv txheeb pej xeem no kom sai npaum li sai tau thaum koj tau txais cov lus taw qhia yog koj paub tias koj yuav mus rau ib qho chaw twg rau hmo txheeb pej xeem.
Lawv yuav nug tej lus nug dab tsi rau kuv?
Lub caij ntau hnub ua ntej yuav txog hmo txheeb pej xeem ces tej cuab yig feem coob yeej tau txais ib tsab ntawv tshab txhais tias yuav sau daim ntawv txheeb pej xeem li cas hauv online. Tab sis yeej muaj ib txhia cuab yig ces tau daim ntawv sau txheeb pej xeem.
Ms Walter hais tias cov kev txheeb pej xeem no yeej suav cov lus nug txog kev noj qab nyob zoo, kev kawm, kev ua hauj lwm thiab lwm yam uas yuav qhia tau txog qhov dav dav ntawm ib tsev neeg thiab ib lub zejzog twg.
Nws hais tias "Tej lus nug thiaj yuav tug tias seb puas muaj ib tug neeg twg yog cov neeg muaj caj ceg neeg txum tim Aboriginal and Torres Strait Islander, hais hom lus dab tsi ntawm tsev, yug ntawm lub teb chaws twg, yus niam yus txiv yug ntawm lub teb chaws twg, yus caj ceg poj koob yawm koob yog leej twg, yus coj kev ntseeg dab tsi, xyoo twg yus tuaj txog Australia, ces thiaj li yuav nug txog tej sab seem zoo li ntawd."
Yog tias kuv muaj kev txhawj xeeb txog kuv ntiag tug tej xov xwm tias yuav coj mus siv li cas ne yuav ua li cas?
Yeej muaj ib co kev pov puag koj tej privacy.
Cov kev txheeb pej xeem no tsis yog cuam tshuam txog ntiag tug xwb tab sis yog ib co xov xwm uas tau los ntawm Australia tej pej xeem.
Cov kev txheeb pej xeem no yuav nug koj lub npe thiab chaw nyob kom tsim tau tej xov xwm zoo txog ntau yam sib txawv. Tsis tas li ntawd los nyob rau tej txheej txheem ua thaum ntxov ces yeej muaj tej npe tshem tawm ntawm lwm cov xovxwm uas yus teev thiab.
Yeej muaj cai tswj tsis pub peb qhia tej xov xwm txheej pej xeem no rau ib tug twg, los yog qhia rau tsoom fwv ib lub tuam chav twg los sis yog siv tej xov xwm no coj mus txheeb thiab paub txog ib tug twg.Emily Walter
Txhais tias tej xov xwm koj qhia ntawd yeej tsis raug coj mus qhia rau lwm tus paub, yeej raug khaws cia yam tau txais kev ruaj ntseg thiab tsis muaj peev xwm yuav siv coj los txheeb tau yus. Tsis tas li ntawd los tej koom haum ntau yam suav tsoom fwv tej tuam chav tib sib yeej tsis muaj peev xwm yuav siv tau yus tej xov xwm ntiag tug tsuas yog ABS thiaj pom ntawm yus cov ntawv txheeb pej xeem (Census form) xwb.
Ces tej xov xwm uas rau kho dua tshiab kom tsis txhob paub tias yog leej twg no thiaj raug tej koom haum zejzog, tej koom haum NGOs, tej lagluam thiab tej tsoom fwv siv.
Welcoming Australia ces kuj yog ib lub koom haum li hais no. Lawv yeej ua hauj lwm nrog tej nom tswv zos, tej sporting clubs, tej tsev kawm qib siab thiab tej chaw ua hauj lwm thoob plaws teb chaws no.
Aleem Ali uas yog tus tuam thawj tswj lub koom haum Welcoming Australia tshab txhais tias vim li cas cov kev qhia qhov tseeb thiaj tseem ceeb heev.
Ali hais tias "Yog yus tsis teev yus tej lus, yus cov kev ntseeg, yus tej kab lis kev cai, ces tej neeg ua cov kev txiav txim siab faib nyiaj coj mus tsim kev pab cuam yuav tsis paub tsis pom txog yus."
Vim li cas thiaj tseem ceeb heev uas teb tej lus nug txheeb pej xeem kom raug?
Cov kev teb tej lus nug txheeb pej xeem kom raug yog ib co kev ua tib zoo xyuas kom lwm tus kub siab txog yus cov kev tawm tswv yim thiab yuav teev yus lub zejzog nrog thaum npaj tsim tej teej kawm, tej koom haum zejzog, cov kev pab cuam txhais lus/txhais ntawv thiab lwm cov kev pab tseem ceeb.
Mr Ali thiaj nqua hu kom sawv daws teb tej lus nug yam qhia siab dawb paug thiab teb kom raug.
Cov kev tau koom txheeb pej xeem yog ib lub meej mom uas lwm tus kub siab txog yus, thiab yog ib co kev qhia tias tsim nyog yus lub zejzog tau tej peev txheej ntau yam dab tsi los pab.Aleem Ali
Peter Doukas uas yog tus tuam thawj tswj Australia lub koom haum sawv cev rau cov neeg zejzog pawg tsawg (Federation of Ethnic Communities’ Councils of Australia - FECCA) hais tias tej koom haum zoo li lub koom haum sawv cev rau tej zejzog pawg tsawg yeej tau koom tes nrog ABS los qhia tej xov xwm txog cov kev txheeb pej xeem ua ntau hom lus los tshab txhais txog qee cov kev txhawj xeeb.
Nws hais tias "Cov kev tau tej xov xwm raug thiab yog thiab cov kev pab kom tej neeg totaub tias yog ib feem tseem ceeb heev ntawm zej tsoom lub neej ntawm Australia no yog ib co tseem ceeb heev."
Aleem Ali hais tias tej xov xwm tau los ntawm cov kev txheeb pej xeem no yog tej yam tseem ceeb heev rau lub koom haum Welcoming Australia ''... vim rau qhov pab kom pab tau tej koom haum uas peb ua hauj lwm nrog kom zoo siab tos txais thiab cia lwm tus muaj feem koom, thiab kom muaj peev xwm ua tau hauj lwm zoo tshaj qub ntxiv nrog tej neeg zejzog ntau yam sib txawv."
Tej xov xwm txheeb pej xeem ho yuav pab tau tej zejzog coj ntseeg ntau yam kab lis kev cai li cas?
Tej kev txheeb pej xeem yeej tseem ceeb heev rau tej neeg.
Tej xov xwm uas nej qhia yeej yuav pab tej koom haum zejzog, tej lagluam thiab tsoom fwv kom muaj peev xwm txiav txim siab tias yuav tsim tej kev pab cuam dab tsi los pab rau nej tej zejzog raws li qhov tsim nyog tau txais.
Aleem Ali hais tias tej xov xwm txheeb pej xeem raug saib tam li yog ib daim luaj chib lig (map) qhia tias peb yog lej twg tam li ib haiv neeg.
"Piv txwv li thaum uas tej xov xwm ntawv qhia tias muaj neeg coob ntawm ib thaj chaw twg tsi ntsees uas paub lus Askiv tsawg ces kuj muaj peev xwm siv tej pov thawj no .... coj mus pab tsim co vkev kho mob uas muaj cov kev pab txhais lus pab rau tej tsev kho mob zos. Tsis tas li ntawd los kuj pab txheeb tias seb ho puas muaj tej zejzog uas tseem tsis tau paub txog uas tej kev kho mob ib txwm siv yeej tsis tshua kub siab txog thiab yeej tsis tshua muaj nyiaj pab thiab."
Thiab thaum uas yus xam rau kis dav dav lawm ces yeej muaj ntau cov zejzog neeg coj ntseeg ntau yam kab lis kev cai sib txawv ntawm teb chaws Australia no, tej no thiaj yog tej tseem ceeb heev uas uas peb yuav tau ua tib zoo xyuas kom muaj kev lees paub thiab muaj kev sawv cev rau tej zejzog ntawd.
Mr Doukas hais tias "Piv txwv li ... tej zejzog uas tuaj ntev thiab nyob ruaj lawm ces tej zaum yeej xav tau ib co kev pab tsi ntsees twg rau cov kev pab li pab tej laus, los tej nyuam qhuav tuaj txog tshiab ces xav tau txais kev pab txhais lus los yog pab tej yam yooj yooj yim kom lawv pib tau lub neej tshiab, thiab tej kev pab cuam tshuam txog tej teej kawm.''
Puas muaj cov kev pab sau tej ntawv txheeb pej xeem no?
Thiab nyob rau lub cai uas yuav txog hnub txheeb pej xeem los txog ze zuj zus no, ABS tab tom ua hauj lwm nrog tej koom haum, tej lagluam thiab tej koom haum zejzog thoob teb chaws Australia los ua tib zoo xyuas kom tej neeg muaj peev xwm sau tau tej ntawv txheeb pej xeem txhua txhia qhov chaw. Tsis hais ntawm tej nroog, tej zos cheeb tsam tuaj ntug nroog los sis tej zos toj siab uas nyob deb, thiab ua tib zoo xyuas kom tej neeg uas tsis nyob tsev, piv txwv li so ntawm tej tsev tos qhua, tsev kho mob, tej campsites, tej caravan parks los kom tau txais kev pab sau tej ntawv txheeb pej xeem no tib si.
Mr Ali hais tias ABS yeej yuav muaj ib co ntawv quav ua ntau tsem, muaj tej xov xwm kaw ua suab taw qhia thiab muaj tej yeeb yaj kiab (videos) ua ntau yam lus qhia txog cov kev sau daim ntawv txheeb pej xeem no.
"Nej yeej muaj peev xwm mus ntsib ib lub chaw qhia tej neeg sau ntawv txheeb pej xeem thov kev pab yus tim ntsej tim muag kiag tau, thiab kuj tseem muaj xov tooj pab yus ntawm Census Contact Centre. Thiab yog tias yus xav tau neeg txhais lus los yus yeej musj peev xwm siv cov kev pab txhais lus hu ua TIS National services thiab."
Yog li ntawd thiaj xav kom nco ntsoov tias hmo txheeb pej xeem yog hnub zwj thaj tim 11 lub 8 hli ntuj xyoo 2026. Thiab yog tias koj nyob ntawm Australia no rau hmo no, ces ua tib zoo xyuas kom koj raug suav nrog Australia cov kev txheeb pej xeem thiab.
Tsuas siv sij hawm me ntsis mus teb tej lus nug txog cov kev txheeb pej xeem no xwb, tab sis tej xov xwm uas yus qhia rau daim ntawv txheeb pej xeem kuj muaj peev xwm pab los tsim ntau cov kev pab rau yus tej zejzog rau ntau xyoo ntxiv tom ntej no.
Yog xav tau xov xwm ntxiv txog cov kev txheeb pej xeem, txheeb tau ntxiv ntawm Census lub vas sab (Website). Thiab yog koj xav tau xov xwm ua koj hom lus los sis yog xav tau txais kev pab ces txheeb tau ntawm Language support page.
This content was produced in partnership with the Australian Bureau of Statistics.
Subcribe los yog caum mloog tej xov xwm kaw ua suab Australia Explained kom paub txog ntau yam xov xwm tseem ceeb thiab tej lus taw qhia koj koj pib tau lub neej tshiab ntawm teb chaws Australia.
Yog tias koj muaj ib co lus nug dab tsi los yog muaj ib co tswv yim dab tsi? Ces xa email rau peb rau ntawm australiaexplained@sbs.com.au
Mloog tau xov xwm tshiab ntawm SBS Hmong, download SBS Adio app, caum SBS Hmong ntawm Facebook,mloog tau Youtube, Spotify, Podfollow, iHeart Radio, Google Podcast thiab Apple Podcast.
