Muaj pov thawj qhia tias AI (Artificial Intelligence) tab tom ua rau muaj kev pauv hloov rau tej hauj lwm lawm, tab sis yog yuav hloov ua kiag tej hauj lwm. Txawm li cas los yeej ua rau muaj ntau yam sib txawv rau Australia tej neeg ua hauj lwm thiab.
Natalie tau rov qab mus ua hauj lwm tsis ntev los no tom qab nws so yug me nyuam tag ces nws tau poob nws txoj hauj lwm lawm thaum hloov kho lub tuam txhab nws ua hauj lwm lawm.
Nws tau hais tias ''Ua rau kuv ceeb loj kawg nkaus li, ua rau kuv txhawj thiab tu siab heev."
Nws ntseeg tias tej artificial intelligence muaj feem ua rau muaj cov kev pauv hloov no, thiab tau qhia rau SBS Examines tias tsim nyog yuav tau kub siab tshaj qub los txheeb tias tej technology no yuav tau txais txiaj ntsim dab tsi rau tej lagluam, tsis yog pheej yuav ua rau muaj teeb meem rau tej neeg ua hauj lwm xwb.
Yog peb tham txog AI raws li ib lub tuam txhab twg cov kev xav lawm: Ces peb yuav tau txheeb tias seb AI pab kom tej tuam txhab muaj peev xwm ua dab tsi thiab puas pab kom muaj cib fim loj hlob. Tsis tas li ntawd los yuav tau txheeb tias seb puas yuav muaj dab tsi cuam tshuam txog tej neeg ntiag tug li cas thiab.
Associate Professor Penny Williams uas yog ib tug teeb txheeb txog tej hauj lwm ua yav pem suab ntawm tsev kawm qib siab Queensland University of Technology hais tias yeej tseem tsis tau totaub kom ntxaws tias AI ho yuav ua rau muaj teeb meem rau tej neeg ua hauj lwm li cas.
Nws tau qhia rau SBS Examines tias "AI yeej tab tom ua rau muaj kev pauv hloov rau tej hauj lwm lawm, tab sis yeej tseem tsis tau muaj pov thawj ntau txhais qhia tias AI yuav hloov ua tag nrho tej hauj lwm,''
"Tab sis peb yeej pom tias muaj pov thawj ntau heev qhia tias ua rau muaj cov kev pauv hloov rau cov kev ua num, los yog yuav ua num li cas, thiab muaj tej txheej txheem ua hauj lwm li cas thiab tej neeg yuav muaj peev xwm ua tej hauj lwm ntau npaum li cas."
Assoc Prof Williams tau hais tias tag nrho tej tsoom fwv, tej lagluam thiab tej neeg ua hauj lwm yeej muaj lub luag hauj lwm nrog xyuas kom kub siab txog tib neeg rau cov kev pauv hloov no uas nws tau hais tias:
"Tsoom fwv muaj lub luag hauj lwm yuav tsum tau ua tib zoo xyuas kom peb muaj tej cai zoo los tswj cov kev siv AI, tsis tas li ntawd los tej tswv lagluam yuav tsum tsim tej cai thiab tej kev taw qhia txog cov kev siv AI rau txoj xub ke yog thiab tsim nyog siv ntawm lawv tej koom haum. Txuas ntxiv ntawd los peb yuav tsum xav kom ntxaws tshaj qhov yuav tau txais txiaj ntsim xwb, thiab yuav tsum xav tias yuav muaj tau teeb meem dab tsi rau tej neeg ua hauj lwm thiab, piv txwv li cov kev tau txais kev noj qab nyob zoo rau cov kev ua hauj lwm, los yog cov kev poob hauj lwm thiab. Thiab yog tham txog nqe no ces nyob ntawm peb ib tug twg kawm me ntsis txog AI thiab. Kom peb nco tias peb yeej muaj tej chaw ua hauj lwm thiab, peb yuav tau txheeb tias seb peb yuav siv AI li cas, yuav siv thaum twg, peb ho ntseeg siab npaum li cas rau peb tej output, peb puas muaj peev xwm sim siv, kawm thiab siv, thiab peb muaj peev xwm los txiav txim siab ntawm peb tus kheej tias thaum twg tsis tsim nyog siv."
This episode of SBS Examines hears from people whose jobs have been impacted by AI, and asks how this technology is changing work.
Mloog tau xov xwm tshiab ntawm SBS Hmong Thursday 6 pm, Sunday 11 am; saib tau ntawm digital TV tshooj 302 — SBS Radio 2; download SBS Adio app, caum SBS Hmong ntawm Facebook, mloog tau Youtube, Spotify, Podfollow, iHeart Radio, Google Podcast thiab Apple Podcast.
