NTSIAB LUS:
- Tej xov xwm uas tau teev rau lub caij txheeb pej xeem xyoo 2026 rau hnub zwj Quag (Tuesday) tim 11 lub 8 hli ntuj yeej yog ib co xov xwm uas yuav tsis coj mus qhia rau lwm tus thiab yeej muaj cai lij choj pov puag tsis pub coj mus qhia rau lwm tus.
- Tej npe thiab tej chaw nyob los yeej tsis pub coj mus qhia rau lwm tus dua ntawv qhov khaws cia ntawm ABS xwb.
Nyob rau hmo txheeb pej xeem ces neeg Australia yuav raug nug kom qhia yus ntiag tug tej xov xwm — suav yus tej npe thiab chaw nyob — rau Australian Bureau of Statistics (ABS). Txhua tus neeg nyob Australia yuav tsum tau koom sau cov ntawv txheeb pej xeem. Yog tsis sau ces yuav raug nplua ib hnub twg txog $364 los yog tseem qhia tej xov xwm cuav thiab ces yuav raug nplua txog li ntawm $3,640. Tab sis yog koj mus txawv teb chaws lawm ces koj tsis tas sau txawm li cas los koj yuav tsum tau qhia rau ABS paub.
Thiab yeej yuav ua tib zoo khaws tej xovxwm no zoo yuav tsis coj mus qhia rau lwm tus thiab tsis muaj peev xwm yuav coj mus qhia rau tub ceev xwm, tsis qhia rau cov registered migration agents los yog yeej tsis qhia rau tsoom fwv ib lub tuam chav hauj lwm twg li.
Jenny Telford ces yog tus general manager uas tswj cov kev txheeb pej xeem thiab pej xeem (Census and Population division) ntawm ABS tau hais tias cov kev khaws tej neeg tej xov xwm kom tau txais kev nyab xeeb thiab tsis pub coj mus qhia rau lwm tus paub ''yog ib co hauj lwm tseem ceeb tshaj plaws''.
Nws tau qhia rau SBS news tias:
"ABS yeej muaj ntau cov kev pov puag, suav cov tau txais kev pov puag ntau yam ntawm tej cai lij choj, txhais tias peb tsis muaj peev xwm yuav qhia tej xov xwm no raws ib txoj xub ke twg uas yuav muaj peev xwm txheeb tau ib tug neeg ntiag tug twg los yog txheeb tau ib tsev neeg twg."
"Thaum koj sau daim ntawv txheeb pej xeem (Census form), ces peb yuav muab koj tej npe thiab tej chaw nyob tshem tawm ntawm tag nrho tej lus teb ntau yam ntawm daim form no rau thaum tseem ntxov uas peb los txheeb tej xov xwm no, thiab peb yeej kub siab tiag tiag yuav muag tej npe thiab tej chaw nyob no txov pov tseg thaum peb txheeb tej xov xwm txheeb pej xeem no tiav lawm thiab tsim tau cov statistics uas Australia xav tau lawm."
Leej twg muaj peev xwm txheeb tau tej xov xwm no?
Txij xyoo 1911 los ces tej npe thiab tej chaw nyob yeej raug teev/khaws tam li yog ib feem ntawm haiv neeg cov kev txheeb pej xeem thiab tej cuab yig (National Census of Population and Housing).
ABS mam li cej luam tej xov xwm tej xovxwm uas txheeb tau no coj los pab ''kom teev tau tej xov xwm raug thiab zoo rau txhua yam xov xwm uas khaws tau los'' kom thiaj tsim tau ib co statistics zoo.
Lub koom haum no kuj qhia txog tej hom phiaj uas yuav tau teev txog tej neeg tej chaw nyob tias yuav coj mus siv:
- Pab kom teev tau tej pej xeem kom raug thiab kwv yees tias muaj tej neeg nyob ntawm ntau cheeb tsam npaum li cas
- Ua tib zoo xyuas kom txhua yim neeg yuav tau sau tej xov xwm txheeb pej xeem
- Thiab yuav qhia kom paub tias ho puas muaj cov kev tsiv teb tsaws chaw li cas hauv teb chaws Australia no.
Tom qab lub caij uas tau txheeb tej xov xwm txheeb pej xeem tiav lawm, ces yeej tsis pub ib tug neeg twg uas ua hauj lwm cuam tshuam nrog tej xov xwm txheeb pej xeem no saib tej xov xwm (npe, chaw nyob) thiab tej lus teb uas yuav muaj peev xwm txheeb tau tias yog ib tug twg ntxiv lawm.
ABS muaj peev xwm thiab tsis muaj peev xwm qhia rau leej twg?
Tej npe teev ntawm daim ntawv txheeb pej xeem xyoo no ces yuav raug khaws cia txog li ntawm 18 hli (1 xyoos 6 hli) tom qab tau txheeb pej xeem tiav lawm, uas khaws cia txog ntua lub 2 hlis ntuj xyoo 2028. Hos tej chaw nyob ces tseem yuav khaws cia yam tsawg li 36 hli (3 xyoos) txog hnub lub 8 hli ntuj xyoo 2029.
Tej neeg yeej muaj peev xwm xaiv kom khaws lawv cov xov xwm no cia 99 xyoos tam li yog ib feem ntawm Australia cov kev khaws tej ntaub ntawv no cia hu ua Census Time Capsule uas raug khaws cia ntawm National Archives of Australia (NAA). Tej xov xwm no yeej raug ua tib zoo xyuas kom tau txais kev ruaj ntseg, lub koom haum no yog lub khaws thiab ceev tsoom fwv tej ntaub ntawv tseg cia uas tsis pub rau zej tsoom saib thiab tsis pub rau nom tswv rau lub caij ntawd raws li ABS qhia.
Thiab yeej tsis muaj peev xwm yuav mus txheeb tej neeg ntiag tug tej xov xwm mus txog ntua xyoo 2125. Yog tias ib tug twg xaiv txoj xub ke cia coj lawv tej xov xwm mus khaws cia ntawm lub koom haum NAA, ces yuav tsis muaj peev xwm thim yus cov kev txiav txim siab no lawm raws li ABS hais.
Tag nrho txhuas tus neeg ua hauj lwm rau ABS suav tej neeg ua hauj lwm ib ntus, yuav tsum tau ua raws cai li yuav tau tsis txhob qhia ib co xov xwm dab tsi rau lwm tus thaum khaws tej xov xwm txheeb pej xeem no. Tsis hais tej neeg ua hauj lwm ntawd yuav cov cov tau ua hauj lwm nrog lub khoom haum no dhau los los sis yog tej neeg tseem ua hauj lwm tam sim no li.
Thiab yeej muaj cov kev nplua rau tej neeg uas qhia tej xov xwm txheeb pej xeem no rau lwm tus rau lub caij tseem khaws tej xov xwm no (tsis hais qhia ncaj qha los yog qhia raws lwm txoj xub ke qhia) ces yuav raug nplua nyiaj txog $26,400 thiab yuav raug rau txim kaw tsev laj cuj txog li ntawm 2 xyoos.
Tsis tas li ntawd los yeej muaj tsab cai 1905 Census and Statistics Act los pov puag tej neeg ntiag tug tej xov xwm thiab.
Mloog tau xov xwm tshiab ntawm SBS Hmong, download SBS Adio app, caum SBS Hmong ntawm Facebook,mloog tau Youtube, Spotify, Podfollow, iHeart Radio, Google Podcast thiab Apple Podcast.
