Ntsiab lus:
- Australia 26 tus txiv neej uas tau mus koom ntiaj teb cov kev sib tw ncaws pob yog cov neeg coj ntseeg kab lis kev cai thiab hais ntau hom lus suav plaub (4) tug uas yog cov neeg thoj nam dhau los.
- Nyob rau lub caij uas Australia pab neeg ncaws pob sib tw tau zoo no, lawv thiaj tau tsim ib daim yeeb yaj kiab (video) los ua kev zoo siab rau ntau tus neeg sib tw uas yog cov neeg tsiv teb tsaws chaw.
Lub caij uas tau muaj tej lus tawm tsam tsis nyiam neeg tsiv teb tsaws chaw muaj ceem tuaj ntxiv ntawm teb chaws Australia, Australia pab txiv neej ncaws pob Socceroos uas yog ntiaj teb ib pab muaj ntau tsav neeg ncaws ua ke xa ib tsab xo muaj fwm chim heev rau Australia tej zejzog coj ntau yam kab lis kev cai thiab hais ntau yam lus tias yog ib feem ntawm teb chaws Australia, raws li tej neeg uas txhawb thiab pab tej neeg tsiv teb tsaws chaw hais.
Australia pab Socceroos tau ua rau ntiaj teb ceeb tom qab muaj peev xwm sib tw yeej Turkey (Türkiye) 2-0 thaum sib tw hnub zwj Hnub (Sunday), uas Nestory Irankunda uas yog tus hluas hnoob nyoog 20 xyoo thiab yog ib tug neeg thoj nam dhau los thiab yog tus hluas tshaj plaws uas tau tua noj thaum sib tw ntiaj teb cov kev sib tw ncaws pob yog tus xub tua noj thawj lub pob rau Australia.
Tsis tas li ntawd los ntawm 26 tus txiv neej uas ncaws rau Australia pab Socceroos no los yeej muaj cov neeg ncaws pob no yam tsawg li 15 tug yog cov neeg pawg tsawg uas coj tej kab lis kev cai thiab hais lus sib txawv — uas tau ras los ua pib qho tseem ceeb ntawm pab no cov kev mus koom ntiaj teb cov kev sib tw ncaws pob, rau lub caij uas muaj ntau tus neeg ncaws pob no tau tsim ib daim yeeb yaj kiab (video) ua kev zoo siab qhia txog lawv cov kev yog neeg tsiv teb tsaws chaw rau lub caij uas lawv sib tw tau zoo heev no.
Tej neeg sib tw ncaws pob no yeej tau qhia txog tias lawv yog ntau tsav neeg sib txawv thiab qhia tias lawv xav li cas rau lub teb chaws Australia tiam vam meej no — uas lawv hais tias ''sawv daws yeej muaj peev xwm ncaws pob''.
Uas ib tug neeg ncaws pob twg ntawm Australia pab Socceroos no yeej tau hais tias "Tsis hais koj yog tus neeg tuaj qhov twg tuaj li, sawv daws yeej muaj peev xwm ncaws pob."
Awer Mabil uas yog ib tug neeg ncaws pob los ntev rau Socceroos los kuj yog ib tug ntawm plaub tug neeg ncaws pob uas yog neeg thoj nam dhau los, thiaj tau rov qab los teev txog tsab xo no rau hnub zwj Feej (Wednesday) rau ib co ncauj lug yooj yooj yim rau tej neeg uas raug yuam kom yuav tau tsiv tawm ntawm lawv tej teb chaws mus tias: "Peb yeej sawv nraim nrog nej thiab yuav pab nej vim paub zoo tias nej ntxeem dhau dab tsi los lawm."
Yog nug txog daim yeeb yaj kiab (video) no lawm ces Mabil uas yog ib tug neeg uas yug ntawm ib lub yeej thoj nam ntawm teb chaws Kenya uas nws niam thiab txiv yog neeg South Sudanese ces nws tau hais tias, Australia cov kev txhawb nqa lub tswv yim ntau tsav neeg coj ntseeg ntau yam kab lis kev cai thiab hais ntau hom lus yog tej tau ua rau teb chaws Australia ''yog ib lub teb chaws zoo tshaj plaws hauv ntiaj teb."
Nws tau hais tias "Thiab tos ho yog lub teb chaws zoo tshaj plaws hauv ntiaj teb los twb vim yog tias: muaj tej neeg thoob ntiaj teb nyob ua ke ntawm lub teb chaws no thiab tam sim no los Australia pab txiv neej ncaws pob Socceroos log yog pab sawv cev rau tej hais ntawd, vim rau qhov yeej muaj ntau tsav neeg sib txawv hnav tib hom tsoos sawv cev rau lub teb chaws no."
Tej neeg uas txhawb nqa tej neeg tsiv teb tsaws chaw hais tias Australia pab neeg ncaws pob uas muaj ntau tsav neeg sib txawv tej lus tawm tswv yim no yog ib nqe lus tseem ceeb tam tsam nrog tej lus tsis nyiam neeg tsiv teb tsaws chaw thiab tej laj fai kum xeeb uas pheej tawm tsam nrog lub tswv yim multiculturalism no. Ces qhov no thiaj yog ib co kev muaj yeej txawv.
Thiaj ua rau Noël Yandamutso Zihabamwe uas yog tus teeb tsa lub koom haum African Australian Advocacy Centre tau qhia rau SBS News tias ''Tej lus no yog ib tsab xo muaj fwj chim heev uas qhia rau neeg Australia caj ceg neeg Africa tias lawv yog ib feem ntawm lub tebchaws no, thiab yog ib feem tseem ceeb ntawm Australia haiv neeg no tej dab neeg."
"Yog tej yam uas pab kom tej zejzog muaj kev zoo siab, kom lwm tus kub siab txog thiab lees paub txog lawv rau ntiaj teb tej sam thiaj sib tw tseem ceeb tshaj plaws.
"Hais tsi ntsees rau ntiaj teb cov kev sib tw ncaws pob no, uas yog tej yam txhawb siab rau tej hluas kom ntseeg tias lawv cov kev yog ib tsav neeg twg yog ib lub zog tsis yog ib co teeb meem yuav ua rau lawv tsis muaj peev xwm yuav ua tau ib yam dab tsi tiav.''
Zihabamwe tau hais tias peb tej me nyuam ces yeej dhia mus dhia los ua kev zoo siab thaum lawv tau pom daim yeeb yaj kiab no.
Nws tau hais tias ''Tej no qhia tias Socceroos tsis yog ib pab neeg ncaws pob xwb tab sis yog ib lub cim qhia txog ntau tsav neeg sib txawv ntawm lub teb chaws Australia tiam vam meej no."
Thiaj tau muaj nws tej lus tawm tswv yim no tom qab ib hnub uas Pauline Hanson uas yog tus coj ntawm pab nom One Nation tau cav tias siv tsis tau lub tswv yim multiculturalism thiab tsim nyog Australia yog lub teb chaws uas tsuas ''coj tib co kab lis kev cai xwb.''
- All the FIFA World Cup 2026 coverage on our World Cup page
- How to watch the FIFA World Cup 2026 on SBS
- Watch all 104 matches of the FIFA World Cup 2026 at our On Demand hub
- When the Socceroos matches start
Peter Doukas uas yog tus coj lub koom haum sawv cev rau ntau cov neeg zejzog pawg tsawg ntawm teb chaws Australia (Federation of Ethnic Communities Council of Australia - FECCA) tsis lees paub tej lus tawm tswv yim ntawd.
Nws tau qhia rau SBS News tias "Cov kev muaj ntau tsav neeg sib txawv yog peb lub zog li qhov peb tab tom pom ntiaj teb cov kev sib tw ncaws pob no,''
"Yeej tsis muaj leej twg nug tias Australia pab txiv neej ncaws pob Socceroos no puas ua siab dawb siab ncaj rau teb chaws Australia li. Yeej tsis muaj leej twg yuav nug tias lawv puas muaj peev xwm yuav sawv cev rau peb, thiab peb los yeej muaj kev vam kev cia siab tias lawv yuav muaj peev xwm sib tw txuas ntxiv kom txog thaum kawg.
"Tej no qhia tias tej neeg thoj nam uas tau tuaj rau Australia no tsis yog tias tuaj pab xwb tab sis tseem sawv cev rau lub teb chaws no ntawm ntiaj tej sam thiaj thiab."
'Sawv daws yeej muaj cai ncaws pob'
Hnub zwj Feej (Wednesday) ntawd ces Mabil kuj tau cheem tej neeg nthuav xov xwm me ntsis thiabtau ua tsaug rau David Basheer uas yog tus neeg tawm tswv yim txog ntiaj teb cov kev sib tw ncaws pob rau SBS thiab qhia txog tias SBS muaj feem xyuam dab tsi rau nws lub neej — thiab tau hais tias nws yeej tsis ceeb dab tsi uas tej neeg Australia totaub zoo txog Socceroos tsab xo qhia tias lawv yog cov neeg ntau tsav neeg sib txawv.
Mobil hais tias "Ntawm kuv ces, kuj yog tej yam yooj yim ua xwb. Thiab tam li yog cov neeg ncaws pob, ces peb nyias yeej muaj nyias tej dab neeg sib txawv, thiab peb tau los sib koom ua ib pab ua ke.
"Cov laj thawj uas vim li cas thiaj muaj neeg kub siab txog ces yog peb hais tej lus no raws li qhov tseeb tiag xwb, yeej tsis kho dab tsi li.
"Tej lus ntawd ces yog tej lus uas tej neeg ncaws pob xav hais thiab tau coj los tso ua ke, ces thiaj ua rau muaj kuab heev, vim rau qhov tias yeej cuam tshuam rau tej neeg Australia ntiag tug thiab.''
Beau Busch uas yog tus coj lub koom haum Professional Footballers Association tau qhia rau SBS News tias daim yeeb yaj kiab no yog tej yam qhia tias Socceroos ''yog ib lub zog zoo''.
Nws tau qhia rau SBS News tias "Thoob ntiaj teb tam sim no ces peb tab tom pom tias yeej muaj neeg xav khwv tswv yim ntau yam tsim kev sib tawg tswj rau tej neeg,''
"Qhov uas Socceroos tau muaj peev xwm ua ces yog cov kev tau xa ib tsa xo muaj fwj chim heev txog kev koom npaj, kev kub siab txog, kev hlub tshua, uas peb xav tias yog tej yam uas muaj fwj chim kawg nkaus li."
Lub tsam thawj no ces lawv tseem npaj yuav mus sib tw nrog teb chaws Meskas rau hnub zwj Cag (Saturday) tim 20 lub 6 hli ntuj xyoo 2026 sij hawm 5 am AEST, thiab yeej muaj neeg ua kev zoo siab ntau yam rau Socceroos dua ntawm cov kev ua kev zoo siab rau lawv cov kev sib tw lawm.
— Mahnaz Angury koom nthuav zaj xov xwm no.
Saib tau tag nrho 104 cov kev sib tw ncaws pob FIFA World Cup 2026™ uas saib tau tshiab tshiab kiag thiab saib tau dawb ntawm SBS On Demand, saib tau cov kev sib tw txwm 1 teeb, saib tau cov kev sib tw ua txiav ua cov toom luv, thiab saib tau cov kev sib tw tseem ceeb ntawm ib co kev sib tw twg thoob plaws ntawm cov kev sib tw no tau ntawm SBS, SBS VICELAND thiab SBS On Demand.
Mloog tau xov xwm tshiab ntawm SBS Hmong, download SBS Adio app, caum SBS Hmong ntawm Facebook,mloog tau Youtube, Spotify, Podfollow, iHeart Radio, Google Podcast thiab Apple Podcast.
