New South Wales (NSW) lub koom haum State Emergency Service (SES) kwv yees tias ntshe yuav muaj dej nyab loj tshaj tej tau teev tseg rau lub sij hawm 70 xyoo dhau los no ntawm lub zos Forbes rau hnub zwj Kuab (Friday) no.
Thiaj tau hais kom tej neeg ntawm lub zos Central West ntawm xeev NSW tsiv tawm ua ntej 4 pm hnub no.
Lub chaw ntsuam thiab kwv yees huab cua Bureau of Meteorology (BoM) tau hais tias tej zaum yuav muaj dej nyab loj ntawm tus dej Lachlan ntawm tus choj Forbes Iron Bridge thiab ntshe yuav muaj cov theem dej nce siab tuaj tshaj (10.55 metres) uas tau nyab hnub no thiab ntshe dej tseem nce siab tuaj txog 10.8 m rau hnub zwj Kuab (Friday) - muaj ntsis zoo sib xws li tej xwm txheej dej nyab tau muaj rau lub 6 hli ntuj xyoo 1952 ntawd.
Nicole Hogan uas yog tus neeg ua hauj lwm pab NSW lub koom haum SES tus coj tau hais tias lub zos Forbes yeej tsis tau pom dua tej dej nyab loj npaum li no rau lub sij hawm tsis ntev los no li.
Hogan hasi tias "Thiaj ua rau peb pom tias muaj tej xwm txheej dej nyab rau ntau thaj chaw ntawm lub zos Forbes rau lub caij tshav ntuj nrig ntsuab xiab."
"Txawm tias tsis los nag lawm, los dej tseem ntsws ntawm tej paj dej rau qab deg ces thiaj ua rau tej dej nce siab tuaj thiab thiaj rov qab tau
ua rau muaj dej nyab loj tuaj ntxiv.''
NSW lub koom haum SES thiaj tau muaj cov kev ceeb toom tshiab kom tej neeg ntawm lub zos North Wagga (uas nyob sab hauv tej ntsa thaiv dej), lub zos Gumly Gumly thiab qee cheeb tsham ntawm lub zos North Gunnedah tsiv tawm rau thaum tsaus ntuj hnub zwj Feej (Wednesday).
Thiab yeejt au hais kom tej neeg nyob sab hauv tus ntug thaiv dej ntawm lub zos North Wagga thiab lub zos Gumly Gumly yuav tau tsiv tawm mus rau lwm qhov chaw ua ntej sij hawm 8 am hnub zwj Kuab (Friday).
Lub chaw ntsuam huab cua kwv yees tias tus dej Murrumbidgee River ntawm lub zos Wagga Wagga yuav puv ze txog cov theem dej nce siab (9.60m) uas yuav ua rau muaj dej nyab loj rau tom qab tav su dua hnub Friday no.
Tsis tas li no los kuj tseem muaj cov kev ceeb toom siv tam sim no rau lub zos Alice Edwards Village ntawm Bourke rau lub caij uas ntshe tus dej Darling River tseem nyuav nce siab tuaj txog 13.20m rau lub limtiam ob ntawm lub 11 hlis ntuj (8-11 Nov) uas yuav muaj dej nyab loj ntawd.
Ces tej zaum thiaj yuav ua rau dej nce siab tshaj 13.8 m rau lub limtiam peb thiab yuav cais lub zos no rau lub sij hawm 10 hnub.
NSW SES yeej tau mus pab 547 cov kev thov kev pab cuam thiab tau mus cawm 27 cov xwm txheej dej nyab ntawm tej zos Cowra, Tamworth, Albury, Gundagai, Forbes thiab Gunnedah rau lub sij hawm 24 teev (1 hnub) dhau los no (Los txog sij hawm 3 pm hnub zwj Feej (Wednesday), tim 2 November 2022 no).
Uas yeej tau muaj tshaj 10,000 cov kev thov kev pab cuam txij li tau pib muaj tej xwm txheej dej nyab no rau lub 9 hlis ntuj dhau los no.
Ntawm Victoria, ces kuj muaj cov kev ceeb toom kom tej neeg tsiv tawm rau lwm qhov chaw - thiab tseem tsis tau txais kev nyab xeeb rov qab mus tsev - uas tseem siv cov kev ceeb toom no rau Echuca thiab Echuca Village tam sim no.
Tus Murray River ntawm Echuca thiaj li yuav puv tshaj tej xwm txheej dej nyab loj (94.40 metres) mus txog ntua limtiam tom ntej no.
Lub koom haum Weatherzone, uas yog ib koom haum ntsuam huab cua ua luam tau qhia tias yeej muaj qee thaj chaw ntawm Queensland thiab NSW mas raug huab cua no tshaj plaws rau thaum sawv ntxov rau lub 11 hlis ntuj rau thaum sawv ntxov hnub zwj Teeb (Thursday) no rau lub caij ntau caum xyoo los no rau lub tsam thawj uas muaj cov cua txias tau txav mus thoob rau cheeb tsam sab hnub tuaj qab teb ntawm teb chaws Australia.
Piv txwv li, Penrith ntawm Sydney sab hnub poob ces yeej muaj xov xwm qhia tias no heev txog li 6.8 degrees Celsius tag kis no sawv ntxov - ces thiaj yog cov huab cua no tshaj plaws rau lub 11 hlis ntuj txij li xyoo 1995 los no.
Ntawm Tamworth Airport los kuj teev tau huab cua txog 2.9 degrees Celsius - uas yog ib cov huab cua qes tshaj plaws rau thaum sawv ntxov ntawm lub 11 hlis ntuj txij li xyoo 1957 los no thiab.
Lub chaw ntsuam huab cua Weatherzone tau hais tias tau pib Australia lub caij khaub zeeg cua chaw sov (Lub 11 hlis ntuj txog lub 4 hlis ntuj) lawm.
Kuj kwv yees tias ntshe yuav muaj khaub zeeg cua rau Australia ntau tshaj tej khaub zeeg cua tus zauv nrab (rau lub sij hawm 9 txog 10 xyoo no thiab).
Soj qab taug tau xov xwm tshiab txog cov kev kwv yees huab cua ntawm lub chaw ntsuam thiab kwv yees huab cua:
Taug tej xov xwm tshiab txog tej xwm txheej dej nyab ua tau muaj kev pauv hloov tshiab tau ntawm:
Yog tias koj paub rau cov xwm txheej muaj kev phom sij rau koj txoj sia ces kom hu rau tus xov tooj Triple Zero (000). Thiab hu rau cov koom haum li NSW SES tus xov tooj 132 500 thiab Victoria Emergency Services tus xov tooj 1800 226 226 tau yog tias nag xob nag cua, cua hlob, ntoo vau los yog ceg khaub ntoo tsim teeb meem rau koj lub tsev puas los yog yuav ua rau ib tug twg tsis tau txais kev nyab xeeb.
Yog koj xav tau tej xov xwm no ua lwm hom lus ces hu rau lub koom haum Translating and Interpreting Service (TIS) tus xov tooj 131 450 (freecall) thiab hais kom lawv hu rau lub koom haum VicEmergency Hotline nrog koj tham.
Yog tias koj ho tsis lag ntseg, los yog tsis tshua hnov lus, los yog hais lus tsis meej/hais tsis tau lus ces kom hu rau lub koom haum National Relay Service raws tus xov tooj 1800 555 677 thiab hais kom lawv hu rau lub koom haum VicEmergency Hotline nrog koj tham.
